Read koho Jơnau Pơnđik 15 Bible Online

Jơnau Pơnđik 15 - koho bible

Jơnau Pơnđik 15

¹Jơnau ho lơbơn niam lơh rài bơta gơhào gơjrañ; Ai jơnau sràt bơtang bơrcek nùs gơjrañ.

²Lơmpiat cau jak chài yal tơlik bơta git jak dô bă di pal; mơya bơr cau tùl gơla mìng tơlik jơnau bơrngơl gơla.

³Mat Yàng Jehôwa ơm làm bă tiah, sền sơwì cau iơh bơsak mơ cau lơbơn niam.

⁴Lơmpiat lơbơn niam tòm toh be chi bơta kis; Mơya lơmpiat rkwet rkwe lơh lề lac nùs tồr.

⁵Cau bơrngơl gơla sền òsơp bơta bơto tơngkah mè bèp he dê; Ai cau lơi kah prap bơta lah pơrhơng gơlik gơs chài rgơi.

⁶Tòm hìu cau song ring gơs oă phan màng; Mơya tòm cồng nha cau iơh bơsak gơs bơta dơrcul nùs.

⁷Sơndồi cau jak chài rsìh bơta git jak; Mơya nùs cau tùl gơla ò lơh behơ̆.

⁸Phan ơn duh khoai cau iơh bơsak ai lơh cù kìr Yàng Jehôwa in; Mơya jơnau hòi dan cau song ring dê geh niam nùs Kơnràñ.

⁹Gùng dà cau iơh ai lơh cù kìr Yàng Jehôwa in; Mơya Kơnràñ kòñ gơboh cau ting jat bơta song ring.

¹⁰Bơta lơh glài kơnjơ̆ prap lòi cau lơi in sang lòi gùng lòt song; Mơ cau gơjrañ jơnau lah pơrhơng rơp chơt roh.

¹¹Lơgar làng ƀồc mơ brah tìng gam ơm di đap mat Yàng Jehôwa sơl, Tơ ài lah nùs kòn mơnus dê!

¹²Cau bơtat bơtròh ò kòñ cau lah pơrhơng he; khai ò bài tus mơ cau jak chài.

¹³Nùs hừh hơh lơh muh mat chò hòp; Mơya tài bơh nùs moat jrùng gen hwềng nùs gơkòl dơrcul.

¹⁴Nùs àng loh jòi jat bơta git jak; Ai bơr cau tùl gơla ròng siam he mơ bơta bơrngơl gơla.

¹⁵Ală ngai cau siơ̆u siar dê, la kalke lơm; Mơya nùs hừh hơh ơm tòm bơta ñô sa sùm sùm.

¹⁶Chan gơs mìng dô êt phan mơna mơ duh rngòt di Yàng Jehôwa, Niam rlau mơ oă phan mơna mơ nùs dơrcul bơh gơ.

¹⁷Chan sa mìng biap mơ gơs bơta kòñ gơboh, Niam rlau mơ sa poac kơnrồ lơmă mơ gơs bơta gơjrañ mañ.

¹⁸Cau mhar gơjrañ tơngguh bơta tòmlơh; Mơya cau kơ̆ dơn lơh rài bơta tòm pơndang bal.

¹⁹Gùng cau lơh alah be dô nơm pơnggàr lò; Ai gùng cau song ngan gen la gùng ring ơnàng.

²⁰Kòn jak chài lơh chò hòp bèp khai; Ai kòn tùl gơla sền òsơp mè bol khai.

²¹Cau siơ̆u dơngoh jak ai bơta gơla bơrngơl lơh chò hòp; Ai cau jak chài kư̆ lòt tòm gùng song.

²²Ò gơs bơta bơyai, broă lơh ò cồng nha Mơya kơnòm oă kơlôi bơyai, gen broă geh lơh sir.

²³Bơr ho wơl jak lơh cau in chò hòp; Ai jơnau đơs di pal tŭ tơngai gen niam ò git nđò!

²⁴Gùng cau jak chài lam guh hơđang tus bơta kis, Nàng pleh bơh lơgar làng ƀồc ơm hơđơm.

²⁵Yàng Jehôwa rơp tuh tơlup hìu cau pơnhừ să; Mơya Kơnràñ lơh kơ̆ cê nhàr cau ùr bơnrau dê.

²⁶Bơta kơlôi sơnơng iơh la cù kìr Yàng Jehôwa in; Mơya jơnau sàng goh niam nùs Kơnràñ.

²⁷Cau hàm hà cồng nha ò song ring lơh sơlồng sơlàng hìu bol khai dê; Ai cau gơjrañ phan sa loă rơp geh kis.

²⁸Nùs cau song ring kơlôi sơnơng jơnau pal ho; Mơya bơr cau iơh bơsak hòr lik bơta iơh.

²⁹Yàng Jehôwa ơm ngài mơ cau iơh; Mơya Kơnràñ iat jơnau hòi dan cau song ring dê.

³⁰Bơta àng muh mat dê lơh nùs chò hòp; Mơ jơnau niam lơh pràn ală ntìng.

³¹Cau lơi iat jơnau lah pơrhơng bơta kis dê, Rơp ơm digùl ală cau jak chài.

³²Cau lơi sang lòi bơta bơto tơngkah sền òsơp hwềng soàn bol khai dê; Mơya cau lơi iat jơnau lah pơrhơng geh bơta git wă.

³³Bơta duh rngòt Yàng Jehôwa bơto sồr bơta jak chài; Mơ bơta pơndêt să lòt lài mơ bơta ki ngàm.