Read koho Jơnau Pơnđik 16 Bible Online

Jơnau Pơnđik 16 - koho bible

Jơnau Pơnđik 16

¹Bơta kơlôi bơyai tòm nùs gơrê bal mơ kòn mơnus; Ai bơta ho wơl lơmpiat dê tus bơh Yàng Jehôwa.

²Ală gùng dà dô nă cau lơi dê digơlan sàng goh jat mat tòm khai dê; Mơya Yàng Jehôwa kơr was hwềng soàn cau.

³Jào phi tĕ ală broă he Yàng Jehôwa in, Gen ală bơta kơlôi bơyai he dê rơp geh cồng nha.

⁴Yàng Jehôwa crơng gơs ală jơi phan gơs tơnggume broă gơ dê; Tian gơs cau iơh, prap lòi ngai rung rài in.

⁵Cau pơnhừ să ai lơh cù kìr Yàng Jehôwa in; Di ngan, bol khai rơp ò geh klàs bơh bơta lơh glài.

⁶Kơnòm di bơta kòñ gơboh kơ̆ dơn mơ dòn song gen glài geh tơwài; Bơh bơta duh rngòt Yàng Jehôwa cau pleh ngài bơta iơh.

⁷Tŭ gùng dà cau lơi dê niam nùs Yàng Jehôwa, gen Kơnràñ kung lơh ală cau sò tơm khai dê ơm gơtòmsòr bal mơ khai.

⁸Chan gơs dô êt phan mơna mơ gơs bơta song ring, Rlau mơ gơs oă cồng nha bal mơ bơta ò song ring.

⁹Nùs cau kơlôi lơh nền gùng lòt he; Mơya Yàng Jehôwa sơnio lam ală cơnđòa khai dê.

¹⁰Jơnau Yàng dê ơm tòm sơndồi bơtau; Gen bơr khai rơp ò tìs tòm tŭ cahrña.

¹¹Plai kơr mơ phan kơr song ring gơrê mơ Yàng Jehôwa; ală plai kơr tòm kơldung la broă lơh Kơnràñ dê.

¹²Lơh iơh rmơh, hơ̆ la dô bơta cù kìr kwang bơtau in; Bơh kơnòm dê bơta song ring sơbàn geh bơtào kơ̆.

¹³Sơndồi cau song ring la bơta chò hòp cau bơtau in; Khai kòñ gơboh cau đơs song ngan.

¹⁴Bơta gơjrañ dờng bơtau dê la cau kong sồr bơta chơt dê; Mơya cau jak chài lơh rài bơta gơjrañ hơ̆.

¹⁵Kơnòm di muh mat àng gơcrà bơtau dê gen geh bơta kis; bơta niam nùs khai ò gơkrơi be dô puk mhwal cèng mìu bồ sơnam.

¹⁶Geh bơta jak chài, ngan màng rlau mơ màh ngan ò git nđò! Geh àng loh, ngan di pal rlau mơ priă ò git nđò!

¹⁷Gùng ơnàng bơta song ngan dê hơ̆ la pleh ngài bơta iơh; Cau lơi sền gàr gùng lòt broă lơh he gen gàr hwềng soàn he.

¹⁸Bơta pơnhừ să lòt lài bơta rung rài jat tơnơ̆; Mơ bơta tơngguh is să lòt lài mơ bơta gơtup pừ.

¹⁹Chan la pơndêt să ơm bal mơ cau siơ̆u siar, rlau mơ tòmpà phan kơñau bal mơ cau pơnhừ să.

²⁰Cau lơi prap gàr jơnau bơto tơngkah jòi geh cồng nha; Mơ cau lơi dòn kơnòm di Yàng Jehôwa ai lơh lơngai ngan.

²¹Cau lơi gơs nùs jak chài geh sơnđan la àng loh; Jơnau bơkah lơngồt gơbơtơl bơta git jak.

²²Cau gơs àng loh, ngan gơs hiòng bơta kis; Mơya bơta tùl gơla la bơta lơh glài cau bơrngơl gơla dê.

²³Bồ dơngoh cau jak chài cèng jơnau đơs jak chài, mơ bơtơl bơta bơtê jak sơndồi in.

²⁴Jơnau niam tòm toh be sìng lơwe, Bơkah lơngồt hwềng nùs in, mơ pràn kơldang să jan in.

²⁵Gơs dô nơm gùng sền gơlơh be di pal jơi kòn mơnus in; Mơya lồi dut gơ la gùng tus hơ bơta chơt.

²⁶Cau lơh broă bòl glar bơh bơr kòñ sa chồl khai lơh broă, Bơh kơndul jơgloh chồl bol khai lơh.

²⁷Cau blac chừt kòñ jòi kai lơh iơh; Mơ sơndồi bol khai gơs lơmpiat ồs hơng.

²⁸Cau lac lèo rsìh bơta tòmpìt tòmhà; Cau đơs gơtrềng gơtràng cah is ală cau bơyô đềt mềr.

²⁹Cau rhung rhang ơniai pơndòm cau bơyô he, Mơ lam khai mut tòm gùng ò niam.

³⁰Cau lơi kơđip mat kơlôi rcang bơta blac pơrlồm, Mơ cau lơi mềm bơr, neh lơh gơs bơta iơh.

³¹Sŏ kò la sơgơn bơtau bơta gơklŏ, Gơ dòp geh bơh gùng dà song ring.

³²Cau òbat gơhào gơjrañ lin rlau mơ cau pràn kơldang; Mơ cau lơi at bồ nùs he lin rlau mơ cau tòmpìt theng.

³³Cau tă khà tòm tiang ào; Mơya bơta lơh nền bơh di Yàng Jehôwa mơ tus.