Read koho Jơnau Pơnđik 17 Bible Online

Jơnau Pơnđik 17 - koho bible

Jơnau Pơnđik 17

¹Chan mìng dô pet piang lă ro mơ gơs bơta gơtòmsòr bal, Niam rlau mơ hìu bềng bơta ñô sa mơ tòmlah tòm pơndang bal.

²Dĭ gơna àng loh rơp at bồ hơđang kòn cau tòm jak lơh bơta ƀàssìl ƀàsso, mơ dòp geh sre brê be kòn tòm hìu nhă.

³Glah lòs ngui nàng tŏ tiar priă, bơnhă lòs ngui nàng tŏ tiar màh; Mơya Yàng Jehôwa lòng nùs kòn mơnus dê.

⁴Cau lơh iơh kơno sơndồi iơh bơsak; Cau jak đơs blac ơn tồr iat lơmpiat bih khih.

⁵Cau lơi dơñŏ tơnhial cau dồn sa rƀah dơñŏ tơnhial Bơtau crơng gơs bol khai; Cau lơi hòn chò bơh bơta rung rài cau ndai dê rơp ò geh klàs bơh bơta lơh glài.

⁶Sơgơn bơtau ồng kra dê, hơ̆ la kòn sau; Ai bơta gơklŏ kòn sau dê hơ̆ la ồng pàng.

⁷Jơnau niam lơnhơn ò di pal cau bơrngơl in; Bơr sơndồi blac chừt kung ò di pal cau kwang bơtau in sơl.

⁸Phan sa loă tòm toh be dô nơm lŭ đèk di đap cau lơi geh gơ; Bulah gơpơrlac đah lơi, kung geh bơtoah.

⁹Cau lơi jơm ndơp bơta tìs glài jòi jat bơta kòñ nđàc; Ai cau lơi tơngkah wơl bơta tìs lơi gen cah is cau bơyô đềt mềr.

¹⁰Jơnau lah pơrhơng gơmut jrô tòm cau jak chài, Rlau mơ dô rhiang gai pòng di cau bơrngơl.

¹¹Cau iơh bơsak mìng jòi bơta tòmdră wơl; Tài behơ̆ dô nă cau iơh bơsak geh kong sồr brồ lơh khai.

¹²Chan cau tìp jơgơu me kong roh kòn, Rlau mơ tìp cau bơrngơl gơla tòm bơta sơnrang khai dê.

¹³Cau lơi ai bơta iơh tơm wơl bơta niam. Bơta rung rài ò ơm ngài mơ hìu cau hơ̆

¹⁴Sơntòm bơta tòmpìt tòmhà, be cau pò gùng dà in hòr; Dơh wơl lài mơ tŭ gơs bơta pơndang bal.

¹⁵Cau lơi sơnđan cau iơh la song ring, mơ cau lơi lơh nền glài cau song ring, Jơh bàr đah ai lơh cù kìr Yàng Jehôwa in.

¹⁶Cau tùl gơla ò gơs dơngoh kòñ bơtê git, Ñchi kwơ ơn priă tòm tê khai in nàng blơi bơta jak chài taih?

¹⁷Gơp bơyô đềt mềr bal sùm sùm; Mơ oh mi geh tơnggơs nàng dong kòl tòm tŭ tìp bơta rung rài bòl glar.

¹⁸Hơ̆ la bơta tùl gơla tòmho, dòp leng ala mơ cau ơm rềp mơ he.

¹⁹Cau lơi kòñ tòmpìt tòmhà kòñ gơboh tồi glài; Cau lơi bơtào mpồng he jơnhoa jòi bơta tơrlah tơrlơm.

²⁰Cau lơi gơs nùs rkwet rkwe ò jòi geh bơta lơngai lơngò; Mơ cau lơi gơs lơmpiat ma blac rơp dùh tòm bơta rung rài.

²¹Cau lơi deh kòn tùl gơla ngan rơp gơs moat jrùng; Ai bèp cau bơrngơl ò geh chò hòp.

²²Nùs hòn chò ngan la sơnơm ƀă tàm; Ai dơngoh kơlôi moat lơh hwềng soàn ro rañ.

²³Cau iơh bơsak leng òm phan sa loă, nàng lơh tìs ală gùng cahrña.

²⁴Gơs bơta jak chài di đap cau àng loh; Ai mat cau tùl gơla ơm tòm tiah lồi dut plai ù.

²⁵Kòn tùl gơla la dô bơta moat jrùng bèp in, Mơ dô bơta sràt bơtang mè neh deh khai.

²⁶Ai lơh ò niam mơ lơh glài cau song ring, Hala pù lơh cau gơs gơnoar tài bơh nùs song ngan khai dê.

²⁷Cau lơi kơrhia jơnau đơs gơs dơngoh jak; Ai cau gơs nùs ngềt la dô nă cau àng loh.

²⁸Tŭ ơm mŏ mŏ, bulah cau bơrngơl gơla, kung geh sơnđan la jak chài; Ai cau lơi mềm bơr he wơl geh sơnđan lah àng loh.