Read koho Jơnau Pơnđik 19 Bible Online

Jơnau Pơnđik 19 - koho bible

Jơnau Pơnđik 19

¹Chan la cau rƀah ngui sa lơh lòt dô bă song ngan, rlau mơ cau gơs bơr sơndồi rkwet rkwe mơ la dô nă cau tùl gơla.

²Nùs duh hul siơ̆u bơta git wă hơ̆ ò di dô bơta niam; mơ cau lơi sơrbac cơnđòa kong gơtup tìs.

³Bơta bơrngơl gơla lam cau tus bơta roh rui, mơ nùs khai ƀoah gơjrañ Yàng Jehôwa.

⁴Cau pas gơs geh oă bơyô; ai cau rƀah bulah bơyô kung sang lòi.

⁵Bơta lơh cơng blac ò klàs bơta lơh glài; mơ cau blac pơrlồm ò rgơi pleh klàs.

⁶Gơs oă cau jòi bơta nđàc cau dờng ơnàng; mơ kòp nă cau la cau bơyô cau jak pà phan dê.

⁷Jơh ală oh mi tòm cau rƀah dê gơjrañ khai; tơ ài la cau bơyô gen rơp sang ngài khai! Khai ting jat rac dan, bol khai ò gam tềng hơ̆ tai!

⁸Cau lơi geh bơta jak chài kòñ gơboh hwềng soàn he; ai cau prap gàr bơta àng loh jòi geh bơta lơngai lơngò.

⁹Bơta lơh cơng blac rơp ò klàs bơta lơh glài; mơ cau lac lèo rơp kong roh rui.

¹⁰Kis lơngai lơngò ò di pal cau tùl gơla in; tơ ài lah cau dĭ gơna at bồ ală kòn klau kwang bàng dê!

¹¹Cau gơs bơta jak chài òbat gơhào gơjrañ; khai bơh pơnro sơnđan mơ sang lòi bơta tìs glài.

¹²Bơtau gơhào khuh ò gơkrơi be klìu triă ơluh ơhùm; ai bơta nđàc khai be dà tŭ dùh hơđang ƀlàng ñhơt.

¹³Kòn klau tùl gơla la bơta rung rài bèp khai in; Mơ bau ùr jak pơndang be hìu ñhat dà ò dơh

¹⁴Hìu tum mơ phan mơna la sre brê ồng pàng lòi wơl; ai dô nă bau ùr jak chài bơh Yàng Jehôwa mơ tus.

¹⁵Bơta alah lơh cau in bic lơhă; Cau òbat nyà rơp kong jơgloh tơhìr.

¹⁶Cau lơi prap gàr bơta sồr lam, prap gàr hwềng soàn he dê; mơya cau lơi ò kơrhia gùng dà he dê rơp chơt.

¹⁷Cau lơi nđàc sơngit cau rƀah, hơ̆ la ai Yàng Jehôwa in càn jồm; Kơnràñ rơp tơm wơl broă bơta nđàc hơ̆ khai in.

¹⁸Pù tơmàl tĕ kòn mê dê tòm tŭ gam bơta gơn kơnòm; mơya bañ gơs nùs kòñ tơnchơt khai.

¹⁹Cau jak gơhào gơjrañ jàñ bơsak, rơp kong àñ glài; bơh dilah kòn dong tă khai, ngan pal dong tă wơl tai.

²⁰Jak iat jơnau bơto sồr, mơ dòp bơta bơto tơngkah, gen lồi dut kòn rơp jak chài.

²¹Tòm nùs kòn mơnus gơs oă kai gơrmơ̆i; mơya nùs kòñ Yàng Jehôwa dê rơp gơlik gơs.

²²Nùs dòn song lơh cau in kòñ gơboh he; mơ rƀah niam rlau mơ cau đơs blac.

²³Bơta duh rngòt Yàng Jehôwa lam tus hơ bơta kis, ò gơkòl bơta iơh.

²⁴Cau lơh alah ơn tê he tòm prềng, lồc behơ̆ ò bài cèng gơ tus hơ bơr he tai.

²⁵Pù lơh tĕ cau dơñŏ tơnhial, gen cau bơrngơl gơla gơlik gơs chài rgơi; lah pơrhơng cau àng loh, bol khai rơp dòp geh bơta git wă.

²⁶Cau rồn bơklơn bèp he, mơ ting bơtrơh mè he, la dô nă kòn klau lơh gơlik gơs ƀàssìl ƀàsso mơ toès lah sơrpah.

²⁷Ơ kòn bañ lòt tìs nrah ngài mơ ală jơnau jak chài nàng kòn geh kơno bơta bơto sồr.

²⁸Cau lơh cơng blac dơñŏ tơnhial bơta song ring; mơ bơr cau iơh loan glài iơh.

²⁹Bơta lơh nền glài prap lòi cau dơñŏ tơnhial in; mơ gai mơng rcang sir ngkòi cau tùl gơla in.