Read koho Jơnau Pơnđik 20 Bible Online

Jơnau Pơnđik 20 - koho bible

Jơnau Pơnđik 20

¹Alak tơrnòm lơh cau in dơñŏ tơnhial, phan ñô bơñul lơh cau in đơs tràl sơrbil; dilah cau lơi ngui gơ oă ir, ò di la jak chài.

²Bơta gơjrañ dờng bơtau dê tòm toh be klìu triă ơluh ơhùm; cau lơi lơh khai in gơhào gơjrañ ngan lơh iơh di bơta kis he.

³Cau lơi prap gàr să he klàs bơh bơta tòm pơndang bal, hơ̆ la bơta màng ryŭ khai dê; mìng ală cau lu sơnrang sơrbac pơndang bal.

⁴Bơh gơs kơnhai noat mrềt cau lơh alah ò bài lơòr sre; tus di kơnhai toès khai rơp lòt kanadàn, mơya ò geh ñchi lơi.

⁵Kai gơrmơ̆i tòm nùs cau be dà jrô; cau àng loh rơp bơ̆ dà tềng hơ̆,

⁶Pơnah oă cau jòng să bơh bơta dòn song he; mơya ñcau rgơi jòi geh dô nă cau nàng gơn kơnòm?

⁷Cau song ring ơm kis dô bă song ngan; ală kòn sau khai geh lơngai lơngò ngan!

⁸Bơtau ơm nggui hơđang sơbàn cahrña, ai muh mat he tơnroh ală bơta iơh.

⁹Ñcau rgơi đơs: “Añ neh lơh goh nùs añ, añ sàng goh mơ ò gơs glài?”

¹⁰Bàr bơta plai kơr, mơ bàr bơta sơnoa was, jơh bàr bơta la cù kìr Yàng Jehôwa in.

¹¹Bulah broă lơh kòn dềt dê, ƀà sàng goh ƀà song ngan, kung yal tơlik nùs nhơm khai dê.

¹²Tồr lòi iat, mat lòi sền, Yàng Jehôwa neh lơh gơs jơh bàr bơta hơ̆.

¹³Bañ jròk bic, rngòt mê gơlik gơs rƀah siơ̆u siar sơl; pò tĕ mat, gen rơp geh oă piang lă.

¹⁴Cau blơi đơs lah: “Ò niam, ò niam!” Gen lòt, mơ jòng să.

¹⁵Gơs màh mơ oă lŭ màng; mơya bơr git jak la phan mơna kas màng.

¹⁶At tĕ ào cau neh dòp leng ala cau crih mat; kup tĕ phan ai bồ, bơh khai neh lơh bơta do cau crih mat in.

¹⁷Piang lă kơnòm di bơta blac pơrlồm la bơkah lơngồt ngan, mơya tơnơ̆ bơr khai bềng bràs.

¹⁸Kơnòm bơta bơyai bal ală tơnggume geh lơh nền kơ̆ cê; tòm bơta tòmlơh ngui tĕ jak chài.

¹⁹Cau đơs gơtrềng gơtràng yal tơlik bơta ndơp ndơr; behơ̆, bañ ring lơngai mơ cau jak pò bơr.

²⁰Ồs đèng cau srat rma mè bèp rơp chơt digùl mang klam jơngo cik.

²¹Sre brê he geh mhar tŭ sơnròp, mơ lồi dut rơp ò geh lơngai.

²²Bañ đơs: “Añ rơp sal tê!” Ơm gơn tĕ Yàng Jehôwa, Kơnràñ rơp dong klàs kòn.

²³Plai kơr bàr bơta ai lơh cù kìr Yàng Jehôwa in; mơ phan kơr ò tòm toh la bơta ò niam.

²⁴Ală cơnđòa kòn mơnus dê bơh Yàng Jehôwa lơh nền; behơ̆, mbe kòn mơnus rgơi wă wơng gùng dà he dê taih?

²⁵Đơs dô bă sơrbac sơrbang lah: “Phan do la phan goh!” Mơ tơnơ̆ mơ tŭ neh ho pơgon rau, gen kơlôi sơnơng wơl, hơ̆ ngan la dô nơm dă cau in.

²⁶Bơtau jak chài lơh gơprah cau iơh, mơ lơh kong rơndeh pơrlac klơn jă bol khai.

²⁷Hwềng nùs kòn mơnus ngan la dô nơm đèng Yàng Jehôwa dê, sền sơwì ală tiah jrô ndơp nùs dê.

²⁸Bơta kơ̆ dơn mơ bơta song ngan ê gàr bơtau; khai ai nùs kơ̆ dơn mơ yò đo sơbàn lơgar he.

²⁹Bơta pràn cau klau pơnu dê la bơta gơklŏ khai dê; ai sŏ kò la bơta màng ryŭ cau kra dê.

³⁰Ală bơta sồt rmàñ mơ tềl sồt lơh goh bơta iơh, mơ gai mơng mut jrô tòm tiah ndơp ndơr nùs dê.