Read koho Jơnau Pơnđik 23 Bible Online

Jơnau Pơnđik 23 - koho bible

Jơnau Pơnđik 23

¹Tŭ kòn nggui sa bal mơ dô nă cau kwang at bồ, kơrhia sền sơwì ñcau ơm di đap mat kòn;

²Dilah kòn sa jròk, ơn tĕ dô nơm pềs di ngko kòn.

³Bañ tơhìr phan sa bơkah cau dê, bơh la phan sa pơrlồm pơndòm.

⁴Kòn bañ kong bòl glar oă nàng gơs pas sơm; ơm tĕ bañ kơnòm bơta àng loh jak chài is kòn dê.

⁵Kòn ngan neh ơn mat sền bơta pas gơs ơ? Gơ neh ò gam tai; bơh gơ ngan neh hòn pơnđar, mơ par guh be klàng bung sơl.

⁶Bañ sa piang lă cau gơs mat iơh bơsak dê, mơ bañ hàm kòñ ală phan sa bơkah khai dê.

⁷Bơh khai kơlôi tòm nùs mbe lơi, gen khai ngan la behơ̆. Khai đơs mơ kòn lah: Ñô sa tĕ; mơya nùs khai ò dô bă bal mơ kòn.

⁸Phan kòn neh sa, kòn rơp hă tơlik, mơ roh ală jơnau niam mơnĕ kòn dê.

⁹Bañ đơs tòm tồr cau tùl gơla; bơh khai sền òsơp bơta jak chài ală jơnau đơs kòn dê.

¹⁰Bañ ntròn ală jrong tềl nhàr yau, bañ mut tòm ƀlàng sre cau kòn đòi dê;

¹¹Bơh Bơtau dong tơwài bol khai ngan la gơnap gơnoar, rơp dong tò bơta yă wơn bol khai dê tòmdră mơ kòn.

¹²Ơn tĕ nùs bơh bơta bơto sồr, mơ ơn tồr iat ală jơnau git jak.

¹³Bañ sang lòi bơta pù tơmàl kòn dềt; bulah pòng khai mơ gai mơng, khai rơp ò chơt ò.

¹⁴Dilah kòn pù khai mơ gai mơng, Ngan rơp dong tă hwềng soàn khai klàs bơh lơgar làng ƀồc.

¹⁵Ơ kòn, dilah nùs kòn jak chài, gen nùs añ kung rơp geh chò hòp;

¹⁶Hwềng soàn añ rơp hòn chò, tòm tŭ bơr kòn đơs bơta di ngan.

¹⁷Nùs kòn bañ pơndròm mơ cau iơh rmơh; mơya kòp ngai pal duh rngòt di Yàng Jehôwa.

¹⁸Ngan gơs bơta lồi dut niam, mơ bơta gơn kơnòm kòn dê rơp ò roh.

¹⁹Ơ kòn, iat tĕ mơ gơlik gơs jak chài, tề lam tĕ nùs kòn tòm gùng song.

²⁰Bañ lơh dô bă bal mơ cau bơñul ñô, hala bal mơ cau jròk sa;

²¹Bơh cau bơñul ñô mơ cau jròk sa rơp gơlik gơs rƀah; ai cau jak bic rơp soh sut sèt.

²²Iat tĕ jơnau cau bèp neh tơnggơs kòn, bañ sền òsơp cau mè kòn tòm tŭ khai kra.

²³Blơi tĕ jơnau song, bơta jak chài, bơta bơto pơndòm, mơ bơta àng jak; bañ tŭ lơi tac gơ.

²⁴Bèp cau song ring dê rơp gơs bơta hòn chò dờng, mơ cau lơi deh kòn jak chài rơp niam nùs bơh khai.

²⁵Kơp kòñ mè mơ bèp kòn geh hừh hơh, mơ cau neh tơnggơs kòn geh chò hòp.

²⁶Ơ kòn, ơn tĕ nùs kòn bèp in, mơ mat kòn geh niam nùs tòm gùng lòt bèp dê.

²⁷Bơh cau ùr dri tơlàr la dô nơm trồm jrô, mơ cau ùr rềs àr bơrnàn la dô nơm tơrlung wềt.

²⁸Khai ơm kơp mòc be dô nă cau kơñau, lơh bơtơl oă khà ală cau ò dòn song.

²⁹Ñcau kong bơta jê sồt bòl glar? Ñcau tìp bơta moat jrùng? Ñcau gơs bơta tòmpìt tòmhà? Ñcau rơnđơh? Ñcau kong sồt rmàñ ò bồ? Ñcau gơs gar mat pơrhê?

³⁰Hơ̆ la ală cau nggui jŏ di gah ơlak tơrnòm, lòt liap ơlak tơrnòm neh crài.

³¹Bañ sền rmê di ơlak tơrnòm tòm tŭ gơ pơrhê, tòm tŭ gơcrà tòm khòc mơ hòr lik dô bă ƀuơn soh ngan.

³²Tơnơ̆ wơl, gơcoh be bơs, kap be bơs tur;

³³Bàr đah mat kòn rơp rmê cau ùr rềs àr bơrnàn, mơ nùs kòn rơp đơs bơta iơh rmơh;

³⁴Ngan kòn rơp be dô nă cau ơm bic digùl kơnàng dàlềng, ò gơkrơi be cau bic hơđang cồng jrong bềl yàl ơhò sơl.

³⁵Kòn rơp đơs lah: Bol khai pù añ, mơya añ ò jê; cau pòng añ, mơya añ ò git: Tŭ añ kah rngal, añ rơp rê wơl jòi gơ mơ ñô tai.