Read koho Jơnau Pơnđik 24 Bible Online

Jơnau Pơnđik 24 - koho bible

Jơnau Pơnđik 24

¹Bañ gơjrañ mañ di cau lơh iơh, bañ kơp kòñ ơm bal mơ bol khai.

²Bơh nùs bol khai kòñ bơta jàñ bơsak, mơ sơndồi bol khai đơs tơlik bơta roh gơcoh.

³Kơnòm di bơta jak chài, hìu tum geh bơt bơtào, mơ geh kơ̆ nền bơh bơta àng loh;

⁴Kơnòm di bơta git jak, ală ơdŭ geh bềng tơl ală phan mơna kas màng mơ hàng mơnĕ.

⁵Cau jak chài tòmlơh jak gơs bơta pràn rlau mơ cau pràn kơldang, mơ cau git jak lin rlau mơ cau pràn kơldang.

⁶Bơh bơta jak chài tề lam kòn geh jền tơngai tòm bơta tòmlơh; tiah lơi gơs oă cau jak chài gen geh pha lin rlau ƀuơn soh.

⁷Bơta jak chài la jơnhoa ir cau tùl gơla in; khai ò pò bơr di mpồng ƀòn.

⁸Cau lơi bơyai lơh bơta iơh, cau rơp sơnđan khai la cau blac chừt.

⁹Bơta kơlôi sơnơng bơrngơl gơla hơ̆ la tồi glài; cau dơñŏ tơnhial ai lơh cù kìr kòn mơnus in.

¹⁰Dilah kòn gơplơ̆ nùs tòm ngai gơlòng bòl glar, gen bơta pràn kòn dê dềt rhền ngan.

¹¹Dong tă tĕ cau gơkòl tus hơ bơta chơt, mơ bañ sang bơta dong klàs cau lòt gơsèng tus hơ tiah lơh glài tơnchơt.

¹²Dilah kòn đơs: “Sền do, bol hi ò git bơta do;” gen Bơtau kơr sơnoa nùs cau, ngan ò di sền sơwì bơta hơ̆ ơ? Mơ Bơtau ê sền gàr hwềng soàn kòn rơp ò git sơl ơ? Behơ̆ Kơnràñ rơp ò tơm wơl kòp nă jat broă lơh bol khai ò ơ?

¹³Ơ kòn, sa tĕ dà lơwe, bơh gơ la bơkah ngan; dà bồ sìng lơwe la bơkah lơngồt dò kòn in.

¹⁴Git tĕ bơta jak chài hwềng soàn kòn in kung behơ̆ sơl; Dilah kòn jòi geh bơta jak chài, kòn rơp jòi geh phan ƀàn, mơ bơta gơn kơnòm kòn dê rơp ò gơkòl roh rui.

¹⁵Ơ cau iơh, bañ kơp mòc tòmdră hìu cau song ring; bañ lơh jàñ bơsak di tiah ơm rlô cau song ring dê.

¹⁶Bơh cau song ring bulah gơplơ̆ poh dơ̆, bol khai kung rơp guh wơl; ai cau iơh bơsak kong bơta rung rài tơnroh.

¹⁷Bañ hòn chò tòm tŭ cau sò tơm kòn gơplơ̆; bañ lòi nùs bol mê chò hòp tòm tŭ gơtup pừ;

¹⁸Rngòt tŭ Yàng Jehôwa gŏ bơta hơ̆ mơ ò niam nùs, gen tă bơta gơjrañ dờng bơh di khai mòn.

¹⁹Bañ gơhào gơjrañ tài bơh cau lơh bơta iơh, kung bañ gơjrañ mañ ală cau iơh bơsak;

²⁰Bơh cau lơh bơta iơh rơp ò geh tơm wơl bơta niam, mơ đèng cau iơh bơsak rơp kong roh thit.

²¹Ơ kòn, duh rngòt tĕ Yàng Jehôwa mơ ki ngàm cau bơtau; bañ tòmklac bal mơ cau pơrlơ̆ dră;

²²Bơh bơta rung rài tus bơh bol khai gơlik nisơna; mơ ñcau git bơta roh gơprah cau do, cau ne dê taih?

²³Ală jơnau đơs do kung tus bơh cau jak chài: Bơta ò ring bal, tòm tŭ cahrña la ò niam.

²⁴Cau lơi đơs mơ cau iơh lah: Mê la song ring, rơp kong làng bol srat rma, mơ ală lơgar ai lơh cù kìr;

²⁵Ai cau lơi lah pơrhơng cau iơh ngan rơp geh niam nùs, mơ bơta lơngai lơngò rơp mù hơđang khai.

²⁶Cau lơi ho jơnau di pal, be cum di bơr sơndồi.

²⁷Rcang rơndap ală broă đah bơdìh kòn dê, mơ rcang sir jơh ală broă tòm sre kòn dê; lồc tơnơ̆ bơt bơtào tĕ hìu kòn dê.

²⁸Bañ lơh cơng tòmdră mơ cau ơm rềp mơ he ò bồ, bañ ai bơr sơndồi kòn lơh blac pơrlồm.

²⁹Bañ đơs lah: “Añ rơp lơh khai in be khai neh lơh añ in; añ rơp sal wơl khai in jat broă lơh khai dê.”

³⁰Añ neh lòt gan rềp sre cau lơh alah, mơ rềp suơn ño cau tùl gơla dê.

³¹Gŏ chi lò mrơt hòn làm tiah, ñhơt jơm ndơp ù tiah, mơ dơrñang lŭ gơ dê neh tơrlah rau.

³²Añ đal sền, gen ơn nùs di bơta hơ̆; Añ gŏ mơ dòp geh bơta bơto sồr.

³³Bic dô ơthoa, ñềm mat dô ơthoa, koar tê bic dô ơthoa,

³⁴Gen bơta rƀah kòn dê rơp tus be dô nă cau kơñau, mơ bơta siơ̆u siar kòn dê ràn tus be dô nă cau at phan tòmlơh.