Read koho Jơnau Pơnđik 26 Bible Online

Jơnau Pơnđik 26 - koho bible

Jơnau Pơnđik 26

¹Bơta gơklŏ ò di pal cau tùl gơla in, be dà piar tòm kơnhai prang, be mìu tòm kơnhai toès.

²Be sềm rac par tềng do tềng dă, be sềm srài par srà thit, jơnau srat rma ò bồ kung behơ̆, ò tŭ lơi gơlik gơs.

³Gai pù ngui ơseh in, che kèp ngui alàng in, ai gai mơng prap lòi ngkòi cau tùl gơla in.

⁴Bañ ho wơl mơ cau tùl gơla jat be bơta bơrngơl gơla khai dê, rngòt kòn tòm toh be khai sơl.

⁵Ho wơl tĕ mơ cau tùl gơla jat bơta bơrngơl gơla khai dê, rngòt khai jak chài jat mat khai sơl.

⁶Cau lơi kơnòm di cau tùl gơla lòt yal jơnau, koh jơng he mơ hùc wơl bơta jàñ bơsak.

⁷Jơng cau kwet gơlte lòt bơrkhèt jơng; sèng pơnđik tòm bơr cau bơrngơl gơla kung behơ̆ sơl.

⁸Sền dờng màng cau tùl gơla, kung be kơt dô pơnai lŭ tòm sơna.

⁹Sèng pơnđik ơm tòm bơr cau bơrngơl gơla, ò gơkrơi be dô nơm lò cik tòm tê cau bơñul ñô.

¹⁰Cau lơi ơpah cau tùl gơla mơ cau nac lòt gan gùng, tòm toh be dô nă cau ling pañ kam lơh jê sồt oă cau.

¹¹Cau tùl gơla lơh wơl bơta bơrngơl gơla he, ò gơkrơi be dô nơm so neh hă, gen liap wơl.

¹²Kòn neh gŏ cau lơi jak chài jat mat khai sơl? Gam gơs bơta gơn kơnòm cau tùl gơla in rlau mơ khai.

¹³Cau lơh alah đơs: “Gơs dô nơm klìu triă tòm gùng; dô nơm klìu triă ơm tòm gùng ƀòn dờng.”

¹⁴Cau lơh alah pơrlac să hơđang cơnòng bic he, ò gơkrơi be mpồng pơrlac hơđang kai pơdar mpồng dê.

¹⁵Cau lơh alah ơn tê he tòm prềng, bòl glar nàng cèng gơ tus di bơr.

¹⁶Cau lơh alah kơlôi sơnơng is he la jak chài, rlau mơ poh nă cau ho wơl dô bă di pal.

¹⁷Cau lơi lòt gan gùng mơ gơhào nùs bơh bơta tòmlah tòmđơs ò gơrê bal mơ he, ò gơkrơi be cau at so di tồr gơ dê.

¹⁸Cau lơi sơnrang sơrbì ồs; pañ kam, tơnggơs bơta chơt roh.

¹⁹Ò gơkrơi be dô nă cau pơrlồm cau gơp ƀòn he, mơ đơs lah: “Añ kơnhơl gơ dê hơ̆!”

²⁰Ồs chơt la tài bơh siơ̆u lòng; tŭ lơi ò gơs cau đơs gơtrềng gơtràng gen bơta tòmlah tòm pơndang rơp jơh.

²¹Chah sing lơh hơng rnga, mơ lòng ngui nàng sing ồs; Cau jak tòmpìt tòmhà chồl bơchồt bơta tòm pơndang bal kung behơ̆ sơl.

²²Jơnau cau đơs gơtrềng gơtràng tòm toh be phan sa bơkah, mut tus tòm klung.

²³Bơr sơndồi ngac ngar mơ nùs iơh bơsak, ò gơkrơi be gri mơ ù ƀềp màh priă bơcă.

²⁴Cau lơi gơjrañ mañ, ngui bơr sơndồi đơs pơrlồm, mơya tòm nùs khai prap bơta blac pơrlồm;

²⁵Tŭ khai đơs bơkah lơngồt, gen bañ dòn; bơh tòm nùs khai gơs poh bơta cù kìr.

²⁶Bulah bơta gơjrañ mañ pồn ndơp tòm bơta lơh tànggơ, bơta iơh bơsak khai rơp kong ràng tơlik di đap mpồl jơnum.

²⁷Cau lơi tò trồm rơp dùh tềng hơ̆; cau lơi pơrlă pơnai lŭ, lŭ rơp klơn wơl di khai.

²⁸Lơmpiat blac chừt gơjrañ ală cau khai neh jă tơnlề; mơ bơr đơs jơnau rơmhòc bơtào gơs bơta roh gơprah.