Read koho Jơnau Pơnđik 28 Bible Online

Jơnau Pơnđik 28 - koho bible

Jơnau Pơnđik 28

¹Cau iơh ntoat dô bulah ò gơs cau ting jat; mơya cau song ring pràn kơldang be dô nơm klìu triă.

²Tài bơh lơgar tìs glài iơh gen tàng gơs oă cau bơtau; mơya kơnòm di dô nă cau gơs dơngoh git wă at bồ, lơgar rơp ntào kơ̆ jŏ jòng.

³Cau kwang at bồ rồn bơklơn cau dồn sa, be dô dơ̆ mìu dờng pơs jơh phan sa.

⁴Cau sang bơta boh lam jòng ro cau iơh; ai cau prap gàr bơta boh lam tòmlơh mơ bol khai.

⁵Cau tơmut he tòm bơta iơh ò wă wơng bơta song ring; mơya cau lơi jòi jat Yàng Jehôwa wă wơng jơh ală bơta.

⁶Chan rƀah lơòi lơh lòt dô bă song ngan, niam rlau mơ cau pas gơs jat gùng rkwet rkwe.

⁷Cau lơi prap gàr bơta boh lam la kòn klau jak chài; ai cau lơh yô mơ cau gơlềng gơlàng lơh ƀàssìl bèp he in.

⁸Cau lơi kơnòm di cồng nha mơ sa cồng oă rlau mơ bơta boh lam mơ lơh phan mơna he in gơbơtơl oă, gen prap lòi phan hơ̆ cau gơs nùs nđàc sơngit cau rƀah lơòi in.

⁹Cau lơi sềt tồr ò bài iat bơta sồr lam, jơnau hòi dan cau hơ̆ dê kung la dô bơta cù kìr.

¹⁰Cau lơi lơh cau song ngan tìs nrah tòm gùng ƀơ̆ iơh, să tòm cau hơ̆ rơp dùh tòm tơrlung khai neh tò; mơya cau wil tơl dòp leng lơngai lơngò.

¹¹Cau pas kơlôi sơnơng is să tòm he la jak chài; mơya cau rƀah gơs bơta àng loh sền sơwì khai.

¹²Tŭ cau song ring pha lin rlau, gen gơs bơta gơklŏ dờng; ai tŭ cau iơh bơsak bơtào tơngguh, gen cau dô pồn jơh.

¹³Cau lơi pồn prap tồi glài he rơp ò geh bơtoah; mơya cau lơi yal tơlik gơ mơ sang lòi gơ gen rơp geh nđàc sơngit.

¹⁴Cau lơi òs duh rngòt sùm sùm gơs lơngai ngan; ai cau lơi kơldang nùs rơp dùh tòm bơta sơbơng rơng.

¹⁵Dô nă cau bơtau iơh bơsak at bồ làng bol rƀah, ò gơkrơi be klìu triă ơluh ơhùm, mơ jơgơu ting jat phan kup geh.

¹⁶Kwang siơ̆u bơta git wă kung rồn bơklơn cau oă; ai cau gơjrañ di bơta sềt pơniă rơp geh kis jŏ.

¹⁷Cau gơkòl glài lơh tuh mhàm cau lơi rơp dô tus di bơtô ƀồc; bañ gơs dô nă cau lơi kơryan khai!

¹⁸Cau lơi ngui sa lơh lòt dô bă song ngan rơp geh dong klàs; ai cau lơi lòt jat gùng rkwet rkwe rơp gơdùh tòm trồm.

¹⁹Cau lơi lơòr sre rơp geh tơngkah tơngkañ piang lă; ai cau jat cau lơh alah rơp geh bềng bơta rƀah rƀừp.

²⁰Cau ơm song ngan rơp geh lơngai lơngò lìu làc; ai cau lơi sơrbac sơrbang geh pas gơs ngan rơp ò klàs bơh bơta lơh glài.

²¹Sền òsơp cau do, sền dờng màng cau ne la ò niam; bulah mìng dô pet piang lă, khai kung tìs glài.

²²Cau gơs nùs sềt pơniă, mhar gơlik pas gơs, mơ ò git lah bơta roh gơcoh ngan rơp tus.

²³Cau lơi lah pơrhơng dô nă cau lơi, tơnơ̆ rơp geh bơta nđàc rlau mơ cau ai lơmpiat đơs rơmhòc.

²⁴Cau lơi ntung kơñau phan mè bèp he dê, mơ đơs lah: Ò di la tìs glài, cau hơ̆ gơs pơnah bal mơ cau phà tơnroh.

²⁵Cau hàm hà chồl bơta tòmpìt tòmhà; ai cau lơi dòn kơnòm di Yàng Jehôwa rơp geh hòm lai.

²⁶Cau lơi dòn kơnòm di nùs he la cau tùl gơla; ai cau lơh lòt dô bă jak chài rơp geh dong klàs.

²⁷Cau lơi pà gòi cau rƀah in rơp ò siơ̆u siar; ai cau wèt mat tiah ndai rơp kong oă bơta srat rma.

²⁸Tŭ cau iơh bơtào tơngguh, gen cau dô pồn jơh; mơya tŭ bol khai roh rui thit, gen cau song ring geh bơtơl oă.