Read koho Jơnau Pơnđik 6 Bible Online

Jơnau Pơnđik 6 - koho bible

Jơnau Pơnđik 6

¹Ơ kòn añ jê, dilah kòn gơs jơnau tòmho dòp leng ala cau ơm rềp mơ kòn, Dilah kòn gơs jơnau tòmkơt să he mơ cau ndai,

²Gen kòn neh kòl yar dă bơh jơnau lik bơh sơndồi kòn dê, Kòl kup bơh jơnau đơs bơr kòn dê.

³Behơ̆, ơ kòn añ jê, lơh tĕ bơta do nàng dong tă să tòm kòn, Bơh kòn neh ơm tòm tiah gơnoar cau ơm rềp mơ kòn: lòt tĕ, tơnliah să kòn, mơ rac dan mơ cau ơm rềp mơ kòn.

⁴Bañ lòi mat kòn ñềm bic, mơ sơmbir mat kòn gơdan bic.

⁵Dong tĕ să kòn klàs bơh bol khai kung be dô nơm keh brê klàs bơh cau lòt mòc, Kung be dô nơm sềm klàs bơh tê cau pơt dă.

⁶Ơ cau ơm alah, lòt tus tĕ hơ ală ngòñ, Sền sơwì tĕ ală gùng dà bol gơ dê, mơ gơlik jak chài.

⁷Bulah gơ ò gơs cau at bồ lơi, Kung ò gơs cau kwang lơi hala cau at bồ lơi

⁸Gơ git rcang lài ală phan sa gơ dê tòm kơnhai prang, Mơ pơjum tơrgòm phan ròng siam gơ dê tòm kơnhai toès.

⁹Ơ cau ơm alah, mê rơp bic tềng hơ̆ jơl tus di tŭ lơi taih? Tŭ lơi mê rơp guh bic taih?

¹⁰Bic mat dô ơthoa, ñềm mat bic dô ơthoa, koar tê ơm rlô dô ơthoa,

¹¹Gen bơta rƀah lơòi rơp tus hơ mê kung be cau ntung kơñau, Mơ bơta siơ̆u siar rơp tus hơ mê kung be cau at pềs tà tòmlơh.

¹²Cau ală alai mơ cau iơh bơsak cau lòt yơng gùt dar đơs jơnau rkwet rkwe;

¹³Khai gơliang mat, klĕ jơng, mơ ai ràs tê he lơh tềl;

¹⁴Tòm nùs khai gơs bơta rkwet rkwe, khai kòñ lơh iơh sùm sùm, mơ rsìh bơta tòmpìt tòmhà.

¹⁵Tài bơh hơ̆, bơta rung rài gơlik tus di khai dô bă nisơna; Tòm dô ơthoa khai kong roh gơprah nền cê ngan.

¹⁶Gơs prau bơta Yàng Jehôwa gơjrañ, mơ poh bơta Kơnràñ ngkòr ngkàc.

¹⁷Gar mat pơnhừ să, lơmpiat lac lèo, tê lơh gơhòr mhàm ò gơs glài;

¹⁸Nùs kòñ lơh ală bơta iơh, jơng sơrbac sơrbang ntoat tus hơ bơta iơh,

¹⁹Cau lơh cơng ò song mơ đơs jơnau blac, bal mơ cau rsìh bơta tòm pơndang digùl hìu nhă he.

²⁰Ơ kòn, prap gàr tĕ ală jơnau bơto sồr bèp dê, bañ sang lòi ală bơta sồr lam mè kòn dê.

²¹Prap gàr tĕ gơtòm nùs kòn sùm sùm, mơ wan gơ di ngko kòn.

²²Tŭ kòn lòt, ală jơnau hơ̆ rơp tề lam kòn; tŭ kòn bic, gơ sền gàr kòn; mơ tŭ kòn kah rngal wơl, gen gơ rơp tòmbơhbơr mơ kòn.

²³Bơh bơta sồr lam la dô nơm ồs đèng, boh lam la bơta àng, mơ bơta lah pơrhơng bơto tơngkah la gùng bơta kis dê.

²⁴Nàng prap gàr kòn klàs bơh cau ùr ƀơ̆ iơh, mơ klàs bơh lơmpiat rơmhòc cau ùr dri tơlàr dê.

²⁵Nùs kòn bañ hàm kòñ bơta hàng mơnĕ khai dê, bañ lòi he gơtup di sơmbir mat khai dê.

²⁶Cau rgơi ơpah ùr dri mìng dô pet piang lă lơm; Cau ùr bơrnàn lơh roh rài kis dô nă cau klau.

²⁷Gơs dô nă cau lơi ơn ồs tòm să he, mơ ào khai ò gơkòl ồs sa sơl ơ?

²⁸Hala ngan gơs dô nă cau lơi lòt hơđang ồs rnga hơng, mơ jơng he ò gơkòl lơhò ơ?

²⁹Cau lơi lòt tus hơ bau ùr cau ơm rềp mơ he kung behơ̆ sơl; Ngan dilah cau lơi ƀư di khai rơp ò klàs bơh bơta lơh glài.

³⁰Bañ sền òsơp di cau ntung kơñau, dilah khai kơñau nàng lơh hòm nùs he tòm tŭ jơgloh;

³¹Dilah khai kòl kup, ngan khai pal tơm wơl poh dơ̆ rlau; khai rơp jào jơh ală phan mơna khai dê

³²Cau lơi tìs glài rềs àr bơrnàn mơ dô nă cau ùr, ngan la dô nă cau neh roh dơngoh, Cau lơi lơh behơ̆, tơnroh să tòm he.

³³Cau hơ̆ rơp kong sồt rmàñ mơ kong sền òsơp, bơta dơñŏ tơnhial khai rơp ò geh jùt jơh.

³⁴Bơh bơta gơjrañ mañ la bơta gơjrañ dờng bau klau dê, mơ tòm ngai sal tê khai ò toh glài;

³⁵Khai rơp ò dòp phan tơwài lơi, bulah kòn ai bơtơl phan cràs dờng kàr lơi, khai kung ò bài dòp.