Read koho Jơnau Pơnđik 7 Bible Online

Jơnau Pơnđik 7 - koho bible

Jơnau Pơnđik 7

¹Ơ kòn, lơh jat tĕ ală jơnau añ, mơ prap gàr tòm nùs ală gơnoar sồr añ.

²Lơh jat tĕ ală gơnoar sồr añ, gen kòn rơp geh kis; Mơ prap gàr jơnau bơto tơngkah añ be gar mat kòn dê.

³Kơt tĕ gơ di ràs tê kòn, cih gơ hơđang mpàn nùs kòn.

⁴Đơs tĕ mơ bơta jak chài lah: Mê la ruh lŏ añ! Mơ hòi di bơta àng loh la cau bơyô đềt mềr kòn dê;

⁵Nàng gơ sền gàr kòn klàs bơh cau ùr bơrnàn, klàs bơh cau ùr crih mat jak đơs jơnau lơngồt bơkah.

⁶Bơh di mpồng dềt hìu he, Añ sền gan di ală mơng crang mpồng dềt añ,

⁷Gen gŏ tòm mpồl cau bơrngơl gơla, Digùl ală cau pơnu, Gơs dô nă cau kơnòm să ò gơs dơngoh jak,

⁸Lòt gan gùng rềp di mum hìu cau ùr hơ̆; Khai sơntòm lòt gùng tus hơ hìu ùr hơ̆.

⁹Tòm tŭ trồ mho, hala lồi ngai, Hala digùl trồ mang tŭ klam jơngo cik.

¹⁰Ne, cau ùr hơ̆ lik lòt rò khai, Bơka să be cau ùr dri, nùs bềng kai gơrmơ̆i.

¹¹Khai òs đơs dờng jơnau, ò git kơrhia să, Jơng khai ò ơm tòm hìu,

¹²Tŭ ƀà ơm tòm gùng, ƀà ơm tòm drà, Kơp mòc tòm ală tiah mum gùng.

¹³Khai kup koar cau pơnu mơ cum, Muh mat kơldang, đơs mơ cau pơnu hơ̆ lah:

¹⁴Añ gơs phan ơn pơdơng kah bơta nđàc; Ngai do añ neh tơm sir bơta srat să añ.

¹⁵Tài bơh hơ̆ tàng, añ lik lòt nàng wă rò bi, Añ neh jơh nùs jòi bi, mơ añ neh bàn.

¹⁶Añ neh lă ồi hơđang cơnòng bic añ, Mơ che brài Ejiptơ gơs oă bơnga,

¹⁷Ai kơlhô, cài trŭ mơ kơmhò kwê̆, Chu ƀô niam tòm tiah bic añ.

¹⁸Tus tĕ, bol he tòm bơrkoat đềt mềr bal jơl àng, Hừh nùs bal bơh bơta kòñ gơboh.

¹⁹Bơh bau klau añ ò ơm tòm hìu, Khai lik lòt hơ tiah ngài ngan,

²⁰Cèng kơldung priă bal mơ khai, Tus diàng dar sồng rê hìu.

²¹Ùr hơ̆ ngui oă jơnau bơkah lơngồt ơniai khai, Lơh khai in gơtup pừ bơh jơnau rơmhòc.

²²Gen khai lòt jat ùr hơ̆ mo, Be dô nơm kơnrồ tus hơ tiah lơh poac, Be dô nă cau tùl gơla kong cap lam tus hơ tiah kong lơh glài.

²³Jơl tus di dô nơm kam pañ bluh gan klòm khai; Be dô nơm sềm par tus tòm dă bơtơng, Mơ ò git la khai pơt dă bơta kis he.

²⁴Behơ̆ tŭ do, iat tĕ añ, Ơn tĕ nùs tồr di ală jơnau đơs bơr añ jê.

²⁵Nùs kòn bañ gơwèt tòm gùng cau ùr hơ̆, Bañ lòt tìs tòm ală gùng khai dê;

²⁶Bơh khai neh lơh oă cau kong gơpừ, Mơ cau kong khai tơnchơt oă ngan sơl.

²⁷Hìu khai la gùng lòt brah tìng dê, Lam tus di ală ơdŭ bơta chơt.