Read koho Cau Bơto 11 Bible Online

Cau Bơto 11 - koho bible

Cau Bơto 11

¹Pơyoa tĕ ƀañ mê dê hơđang nha dà, bơh tơnơ̆ mơ oă ngai mê rơp bàn gơ wơl.

²Tòmpà tĕ gơ poh nă hala phàm nă in; bơh mê ò git bơta rung rài lơi rơp gơlik tus hơđang ù.

³Tŭ mhwal bềng dà, gen mìu dùh hơđang ù, Tòm tŭ dô nơm chi gơpừ bơh đah đơm hala đah đang, dilah gơpừ tiah lơi gen gơ rơp ơm tềng hơ̆.

⁴Cau lơi sền càl rơp ò sih, cau lơi sền mhwal rơp ò toès.

⁵Kung be mê ò git mbe lơi gơs nhơm tă, mơ gơlik ntìng tòm kơndul mè, behơ̆ mê ò git broă lơh Yàng Tom Trồ dê, Bơtau crơng gơs jơh ală jơi phan.

⁶Tòm àng drim, sih tĕ gar sơntìl mê dê, tus di trồ mho bañ lòi tê mê dơh wơl; bơh mê ò git gar sơntìl lơi rơp hòn niam, sơntìl do, hala sơntìl ne, hala jơh bàr bơta geh hòn niam lơm.

⁷Bơta àng la lơbơn niam; mơ bơta hòn chò gar mat in sền gŏ mattơngai.

⁸Dilah dô nă cau geh kis jŏ sơnam, gen chò hòp tĕ wil tơl tòm ală sơnam hơ̆; mơya kung kah tĕ lah klam jơngo kung gam oă. Mơ ală bơta lơi gơlik tus la roh lơm.

⁹Ơ cau kơnòm să, hòn chò tĕ tòm tŭ mê gam kơnòm să, lòi tĕ nùs mê hừh hơh tòm tŭ gam kơnòm să, lòt jat tĕ gùng dà nùs mê kòñ, mơ đal sền bơta mat mê hàm kòñ, mơya git lah bơh ală bơta hơ̆, Yàng Tom Trồ rơp hòi mê tus nàng cahrña.

¹⁰Behơ̆, bơtrơh tơlik tĕ bơta kơlôi rcang bơh tòm nùs mê, mơ tă tơlik bơta jê sồt bơh poac să mê; bơh tŭ gam kơnòm să mơ tŭ gam pơnu la bơta roh lơm.