Read koho Cau Bơto 4 Bible Online

Cau Bơto 4 - koho bible

Cau Bơto 4

¹Dô dơ̆ tai, añ sền ală bơta rồn bơklơn gơlik gơs hơđơm mattơngai; Sền ne, dà mat ală cau kong rồn bơklơn, mơ ò gơs cau lơi pơndòm pơniang bol khai! Cau rồn bơklơn gơs gơnap gơnoar, mơya ò gơs cau lơi pơndòm pơniang cau kong rồn bơklơn!

²Behơ̆, añ kơlôi ală cau chơt, ală cau neh chơt rau la lơngai rlau mơ cau gam kis; ală cau gam ơm kis.

³Mơya lơngai rlau mơ bàr sèng cau, la cau òhềt deh, òhềt gŏ ală bơta iơh bơsak lơh gơs hơđơm mattơngai.

⁴Gen añ kung neh gŏ ală broă bòl glar mơ ală cau chài rgơi lơh broă gơlik bơh bơta tòmpơrlòng dô nă cau dê mơ dô nă cau ndai. Bơta hơ̆ kung la bơta roh lơm, jat dô ròs càl khồm.

⁵Cau bơrngơl gơla koar tê, tơnroh is poac tòm he.

⁶Chan mìng bềng dô kơndồm tê mơ ơm ring lơngai, rlau mơ bềng jơh bàr đah tê mơ kong bòl gar, mơ jat dô ròs càl khồm.

⁷Gen añ wơlke sền gŏ tai bơta roh lơm ơm hơđơm mattơngai:

⁸Gơs dô nă cau ơm is, ò gơs kòn klau hala oh mi; bulah behơ̆, bơta bòl glar khai ò dơh, mat bol khai ò tŭ lơi dil sền phan mơna; Bol khai lùp lah: “Bơh ñcau tàng añ kong bòl glar, tă să tòm añ bơh di bơta chò nùs taih?” Bơta hơ̆ kung la roh lơm, mơ la dô nơm broă lơh bòl glar.

⁹Bàr nă niam rlau mơ dô nă, bơh bol khai rơp geh jền tơngai niam bơh broă lơh he.

¹⁰Dilah cau do gơplơ̆, gen cau ne rơp yò tơngguh cau bơyô he ntào wơl; mơya bòl glar dồn sa ngan cau lơi in ơm is mìng dô nă mơ gơplơ̆, ò gơs cau lơi yò tơngguh khai ntào wơl!

¹¹Kung behơ̆, dilah bàr nă bic bal gen ram; ai mìng dô nă gen mbe rgơi ram taih?

¹²Dilah cau ơm is mìng dô nă kong cau ndai sòdră, bàr nă rơp ntào tòmdră mơ khai; dô nơm che wac pe dang kalke gơltac gơ.

¹³Dô nă cau kơnòm să rƀah mơ jak chài, rlau mơ dô nă cau bơtau kra mơ bơrngơl gơla, ò gam git iat jơnau bơto tơnggit.

¹⁴Bơh cau kơnòm să hơ̆ lik klàs bơh hìu jàm nàng lơh gơs bơtau, bulah kong deh tòm bơta rƀah siơ̆u siar tòm lơgar tòm he.

¹⁵Añ gŏ kòp nă cau kis lòt rê hơđơm mattơngai, gen lòt jat cau kơnòm să hơ̆, la cau pơrdòn gơnoar cau bơtau ne.

¹⁶Làng bol dòn duh hơđơm gơnoar khai oă ngan ò jai kòp; bulah behơ̆, ală cau tus bơh tơnơ̆ rơp ò hừh nùs bơh khai. Nền cê ngan bơta hơ̆ kung la bơta roh lơm, jat dô ròs càl khồm.