Read koho Cau Bơto 5 Bible Online

Cau Bơto 5 - koho bible

Cau Bơto 5

¹Kơrhia tĕ jơng kòn dê tòm tŭ kòn mut tòm hìu Yàng Tom Trồ. Chan tus rềp nàng iat, niam rlau mơ ơn phan pơdơng be cau tùl gơla; bơh khai ò git wă mbe pleh bơh bơta lơh iơh.

²Bañ mhar ir pò bơr, mơ nùs mê bañ sơrbac sơrbang đơs jơnau lơi di đap Yàng Tom Trồ; bơh Yàng Tom Trồ ơm hơđang trồ, ai mê ơm tòm ù. Gen tàng mê pal đơs dô êt jơnau.

³Bơh bơta mpau tus bơh oă bơta kơlôi rcang; mơ dô nă cau bơrngơl gơla gơlik oă jơnau.

⁴Tòm tŭ mê lơh bơta ho pơgon mơ Yàng Tom Trồ, bañ lơh òbat tơm wơl; bơh Kơnràñ ò niam nùs di cau bơrngơl gơla: behơ̆, lơh tĕ wil tơl ală bơta mê neh ho pơgon.

⁵Chan bañ ho pơgon, niam rlau mơ neh ho pơgon mơya ò lơh sir.

⁶Bañ lòi bơr mê lam mê mut tòm tồi glài, mơ bañ đơs di đap cau kong sồr Yàng Tom Trồ dê, “hơ̆ la gơtup tìs.” Ñchi bơh tài lơh Yàng Tom Trồ in gơhào gơjrañ bơh jơnau đơs mê, mơ Kơnràñ tơnroh broă lơh tê mê dê taih?

⁷Tiah lơi gơs oă mpau tềng hơ̆ gơs oă bơta roh lơm mơ bơtơl oă jơnau; mơya duh rngòt tĕ di Yàng Tom Trồ.

⁸Dilah mê gŏ tòm lơgar gơs cau rƀah kong rồn bơklơn, hala gŏ bơta lơh tìs di bơta song ring mơ bơta di ngan, gen bañ ai lơh krơi; bơh gơs cau kwang jơnhoa ơm kơp sền bơh tiah jơnhoa rlau, mơ hơđang bol khai gam gơs dô nă kwang jơnhoa rlau hơđang bol khai.

⁹Mơya tòm jơh ală bơta geh sền sơwì, do la dô bơta gơs kwơ ƀòn lơgar in, hơ̆ la dô nă cau bơtau lơòr sre.

¹⁰Cau hàm kòñ jền priă ò tŭ lơi hừh nùs bơh jền priă; hala cau hàm kòñ pas sơm ò tŭ lơi làp dil jòi cồng nha. Bơta hơ̆ kung la bơta roh lơm.

¹¹Tòm tŭ phan mơna bơtơl oă kàr lơi, cau ngui sa kung bơtơl oă kàr hơ̆. Ñchi kwơ cau gơs phan mơna in, rlau mơ bơta sền gơ mơ mat taih?

¹²Bơta bic lơhă cau lơh broă bòl glar dê, bulah khai sa dô êt hala oă; mơya bơta sa hùc oă cau pas sơm dê, rơp ò lòi bol khai in bic lơhă.

¹³Gơs dô bơta rung rài dờng mơ añ neh gŏ hơđơm mattơngai: Ală cau pas sơm tơrgòm prap phan mơna bol khai dê, mơ gơ cèng wơl bơta jê sồt he in.

¹⁴Mơ jơh ală phan mơna neh roh jơh tòm bơta phi să ò kwơ; bulah bol khai la mè bèp ală kòn bol khai dê, mơ bol khai ò gơs phan lơi tòm tê bol khai dê.

¹⁵Be bol khai lik bơh kơndul mè ơm kuh lòi rồ be lơi, gen rơp rê wơl behơ̆ sơl; Bol khai ò cèng phan lơi bơh ală broă bòl glar bol khai dê, ò gơs phan lơi tê bol khai rgơi cèng.

¹⁶Bơta do kung la dô bơta rung rài dờng: Cau neh tus tòm dunnia be lơi, bol khai rơp rê wơl behơ̆ sơl. Mơ ñchi gơs kwơ bol khai in bơh ală broă lơh bòl glar jat càl khồm taih?

¹⁷Mơ tai, jơh rài bol khai pal kis tòm bơta klam jơngo, pal kong oă bơta moat jrùng, kòp jê mơ gơjrañ mañ.

¹⁸Do la ală bơta niam mơ añ neh sền gŏ: bơta di pal la sa, hùc mơ jòi geh bơta hòn chò tòm jơh ală bơta bòl glar mơ he neh lơh hơđơm mattơngai, tòm dô êt ngai tòm rài kis Yàng Tom Trồ neh ai bol he in, bơh hơ̆ la pơnah he dê.

¹⁹Kung behơ̆ sơl cau lơi Yàng Tom Trồ ai bơta pas gơs, phan mơna, gen cau hơ̆ hòn chò dòp ngui gơ mơ dòp leng pơnah he dê, mơ jòi bàn bơta hòn chò tòm broă lơh he dê, hơ̆ la dô bơta ai gòi Yàng Tom Trồ dê.

²⁰Bơh cau ò gam kah tai ală ngai rài kis he dê; bơh Yàng Tom Trồ prap bol khai in bơta hòn chò tòm nùs bol khai dê.