Read koho Cau Bơto 6 Bible Online

Cau Bơto 6 - koho bible

Cau Bơto 6

¹Gơs dô bơta rung rài ndai mơ añ neh gŏ hơđơm mattơngai, mơ gơklơn kơnjơ̆ hơđang jơi kòn mơnus.

²Gơs ală cau mơ Yàng Tom Trồ ai bơta pas gơs, phan mơna mơ bơta ryŭ ryơm, tian gơs ò siơ̆u bơta lơi nùs bol khai kơp kòñ; bulah behơ̆ Yàng Tom Trồ ò ai bol khai in hòn chò dòp ngui gơ, mơya la dô nă cau crih mat geh hòn chò ngui gơ. Hơ̆ la bơta roh lơm, la dô bơta jê sồt bòl glar.

³Dilah dô nă cau tơnggơs dô rhiang nă kòn, mơ kis jŏ sơnam, mơya bulah oă ngai tòm rài kis khai dê, dilah khai ò hòn chò bơh bơta niam tòm rài kis khai dê, hala chơt ò geh tơp, añ đơs lah dô nă kòn gơyò la niam rlau mơ khai;

⁴Bơh dô nă kòn rlơs gơlik roh lơm, mơ rê wơl tòm bơta klam jơngo, mơ sơnđan khai gơkòl bơta klam jơngo bồr ndơp.

⁵Mơ tai khai ò gŏ mattơngai, kung ò git bơta lơi sơl; khai geh rlô bòl rlau mơ cau ne.

⁶Bulah cau kis dô rbô nam hala bàr rbô nam, mơ ò geh dòp dô êt lơngai lơi, ò di jơh tơl nă kung rê bal dô bă tiah ò ơ?

⁷Jơh ală kòn mơnus kong lơh broă bòl glar bơh bơr he, bơta hàm kòñ ò hừh nùs.

⁸Ñchi cau jak chài gơs rlau mơ cau bơrngơl gơla taih? Mơ ñchi cau rƀah gơs bơh khai git gơwèt niam mơ cau kis taih?

⁹Bơta lơi gŏ mơ mat la niam rlau mơ bơta hàm kòñ gơlềng gơlàng; bơta hơ̆ la dô bơta roh lơm, jat càl khồm.

¹⁰Bơta lơi neh gơs gen neh geh tơmoh sơnđan rau: jơi kòn mơnus gơlik gơs mbe lơi, gen neh tơnggit bơh lài rau; mơ kòn mơnus ò rgơi tòmdră wơl mơ Bơtau pràn rlau.

¹¹Gơs oă jơnau kàr lơi, gen bơta roh lơm oă kàr hơ̆; behơ̆, ñchi bơta niam rlau taih;

¹²Bơh ñcau rgơi git bơta lơi niam kòn mơnus in tòm tŭ bol khai kis dô êt ngai roh lơm tòm rài kis, bơta hơ̆ lòt gan be mƀur taih? Bơh ñcau rgơi yal lài bol khai in ală bơta rơp tus tơnơ̆ hơđơm mattơngai taih?