Read koho Cau Bơto 7 Bible Online

Cau Bơto 7 - koho bible

Cau Bơto 7

¹Tiơng pơnro niam rlau mơ mơñà kas màng: ngai chơt rlau mơ ngai deh.

²Lòt tus hơ hìu gơs cau chơt rlau mơ lòt tus hơ hìu yò sa dờng; bơh do la bơta lồi dut kòp nă cau dê; mơ cau kis rơp ơn gơtòm nùs.

³Jê sồt moat jrùng niam rlau mơ cau ñŏ; bơh muh mat moat jrùng, mơ nùs geh hòn chò.

⁴Nùs cau jak chài ơm tòm hìu ƀồc, ai nùs cau tùl gơla ơm tòm hìu chò hòp.

⁵Chan iat jơnau lah pơrhơng cau jak chài, niam rlau mơ iat bơta đơs chò ală cau tùl gơla dê.

⁶Bơh be ntas lò bơrtoh hơđơm dô nơm glah, kung behơ̆ sơl sap dơñŏ cau bơrngơl gơla dê. Hơ̆ kung la bơta roh lơm.

⁷Ngan, bơta rồn bơklơn lơh cau jak chài gơlik bơrngơl, mơ phan sa loă lơh roh rui nùs in.

⁸Chan bơta lồi dut dô nơm broă dê rlau mơ bơta sơntòm gơ; nùs ơt ơl rlau mơ nùs pơnhừ să.

⁹Bañ mhar gơjrañ, bơh bơta gơjrañ ơm tòm nùs cau tùl gơla.

¹⁰Bañ đơs lah: Ñchi bơh tài ngai òr niam rlau mơ ngai do? Bơh lùp behơ̆ la ò jak chài.

¹¹Bơta jak chài kung niam be phan jơtài; gơ gơs kwơ ală cau gŏ mattơngai in.

¹²Bơh bơta sền gàr bơta jak chài dê kung be bơta sền gàr jền priă dê; mơ bơta gơs kwơ bơta git jak dê hơ̆ la bơta jak chài ai bơta kis cau lơi in geh gơlơh gơs phan tòm.

¹³Sền sơwì tĕ broă lơh Yàng Tom Trồ dê; ñcau rgơi lơh song wơl ală phan Yàng neh lơh kwe taih?

¹⁴Tòm ngai pas gơs lơngai lơngò hòn chò tĕ, mơ tòm ngai rung rài kơlôi sơwì tĕ; bơh Yàng Tom Trồ neh lơh ngai do mơ ngai ne, tồ kòn mơnus in ò rgơi jòi bàn ală bơta lơi rơp gơlik tus tơnơ̆ he.

¹⁵Tòm rài kis roh lơm añ jê, añ neh gŏ jơh ală bơta: Gơs ală cau song ring, roh rui tòm bơta song ring bol khai dê; mơ cau iơh bơsak geh kis jŏ jòng tòm bơta iơh bơsak bol khai dê.

¹⁶Bañ lơh be song ring ir, kung bañ lơh be jak chài ir; ñchi bơh tài tơnroh să tòm he taih?

¹⁷Kung bañ lơh iơh bơsak oă ir, mơ bañ kis be cau tùl gơla; ñchi bơh tài mê chơt lài mơ tŭ lơh nền taih?

¹⁸Bơta niam hơ̆ la mê sơmbat kơ̆ dô bơta; mơ kung bañ kwòr tê hơ bơta ne; bơh cau lơi duh rngòt Yàng Tom Trồ rơp geh pơrdòn jơh bàr bơta hơ̆.

¹⁹Bơta jak chài lơh cau jak chài in gơs pràn kơldang rlau mơ jơt nă cau at bồ ơm tòm ƀòn dờng.

²⁰Ngan, ò gơs cau song ring lơi ơm hơđang ù lơh bơta niam, mơ ò tìs glài.

²¹Bañ ơn tồr bơh ală jơnau cau đơs, hala mê iat cau dong broă srat rma mê.

²²Bơh nùs mê kung git lah oă dơ̆ să tòm mê neh srat rma cau ndai.

²³Añ neh ai bơta jak chài lòng sơwì jơh ală bơta hơ̆; añ đơs lah: “Añ rơp gơlik gơs cau jak chài;” mơya gơ neh ngài bơh añ.

²⁴Mơ tai, bơta lơi ngài ngan, bơta lơi jrô mơ jrô ngan, ñcau rgơi jòi bàn taih?

²⁵Añ tơrwơl bơta kơlôi sơnơng añ jê, nàng git wă, sền sơwì, jòi jat bơta jak chài mơ sơntòm bồ dà ală jơi phan dê, mơ nàng git bơta iơh bơsak la bơrngơl gơla mơ bơta bơrngơl gơla la sơnrang sơnrồng.

²⁶Añ jòi bàn dô bơta sràt bơtang rlau mơ bơta chơt, Hơ̆ la cau ùr la be dô nơm dă, gơs nùs be dă mơ bơtơng; tê be che sreng; cau lơi kis niam nùs Yàng Tom Trồ rơp pleh klàs bơh khai; mơ cau gơs glài rơp kòl khai kup.

²⁷Sền tĕ, do la bơta añ neh bàn, cau bơto đơs lah: bơtơl dô bơta mơ bơta ndai, nàng jòi bàn bơta sơntòm;

²⁸Hơ̆ la bơta nùs añ gam jòi mơ òhềt bàn; tòm dô rbô nă cau klau añ neh jòi bàn dô nă; mơya tòm jơh ală cau ùr añ ò bàn dô nă cau lơi.

²⁹Sền tĕ, mìng dô bơta do añ jòi bàn: Yàng Tom Trồ neh crơng gơs cau song ngan; mơya bol khai neh bơtào oă kai gơrmơ̆i.