Read koho Đơs Chò 1 Bible Online

Đơs Chò 1 - koho bible

Đơs Chò 1

¹Sră đơs chò tòm ală bơta đơs chò niam rlau jơh mơ Salômôn neh cih.

²Lòi khai cum añ bơta cum bơh di bơr khai dê. Bơh bơta kòñ gơboh mê dê niam rlau mơ tơrnòm.

³Mơñà bong mê dê ƀô bơlhu; Sơnđan mê be mơñà ƀô bơlhu hòr lik; Gen tàng ală cau ơruh dềt kòñ gơboh di mê.

⁴Hwài tĕ añ jat mê; bol he ntoat sơrbac sơrbang lă. Cau bơtau neh cèng añ mut tòm ơdŭ khai dê. Bol he rơp hòn chò hừh hơh mơ mê; Bol he rơp jòng ro bơta kòñ gơboh mê dê bơkah rlau mơ tơrnòm. Ală cau ơruh dềt kòñ gơboh mê la song ngan.

⁵Ơ ală kòn ùr Jerusalem, añ jù, mơya hàng mơnĕ, be ală sàl Keđa, be bài kơrnìng Salômôn dê.

⁶Bañ sền trol di añ, tài bơh añ jù, mattơngai neh hur añ. Ală kòn klau mè añ jê gơjrañ di añ, Bol khai neh ơn añ kơp gàr suơn ño; mơya suơn ño is añ jê; añ ò kơp gàr.

⁷Ơ cau mơ nùs añ kòñ gơboh, yal tĕ añ in git, ntềng đah mê ê mpồl mê dê, ntềng đah mê ai gơ in bic rlô tòm tŭ trồ gùl ngai taih; Ñchi bơh tài añ pal be dô nă cau ùr cang muh mat; ơm di gah mpồl ală cau bơyô mê dê taih?

⁸Dilah ai òhềt git, Ơ cau hàng mơnĕ rlau jơh tòm ală cau ùr, lòt jat tĕ tềl mpồl dê, mơ ê ală be kòn he dê rềp di gah sàl cau ê belàt dê.

⁹Ơ cau kòñ gơboh añ jê, añ pơndròm ai be ơseh me rơndeh ơseh Pharaôn dê.

¹⁰Bàr đah tơrmồ ai niam mơnĕ bal mơ phan bơka să; ngko ai bal mơ ñòng lŭ kràng màng.

¹¹Bol he rơp lơh ai in kèn màh wan di ngko ƀềp mơ priă.

¹²Tòm tŭ bơtau nggui tòm cơnòng sa, mơñà ƀô bơlhu añ jê gơlik ƀô bơlhu niam.

¹³Cau kòñ gơboh añ jê be dô cap bơkào (cài trŭ) añ in. Ơm digùl ntơh añ jê.

¹⁴Cau kòñ gơboh añ jê be dô sơnđùng bơkào đàng tòm suơn ño Engedi.

¹⁵Ơ cau kòñ gơboh añ jê, ai hàng mơnĕ ngan, ai hàng mơnĕ ngan! Gar mat ai be mat sềm ntòp.

¹⁶Ơ cau kòñ gơboh añ jê, mê niam klau; Mơ cơnòng bic bol he dê tơlir ñhơt.

¹⁷Ală ròc hìu bol he mơ chi pơnggir; mpàn cang dơrñang mơ chi nho rề.