Read koho Đơs Chò 4 Bible Online

Đơs Chò 4 - koho bible

Đơs Chò 4

¹Ơ cau kòñ gơboh añ jê, ai hàng mơnĕ ngan, ai hàng mơnĕ ngan! Mat ai be mat sềm ntòp, bơh ngkòi chèo cang mat. Sŏ ai be mpồl be mù bơh kơh mơnơm Galaat.

²Sề ai gơlơh be mpồl belàt pa siat sơnò, pa guh bơh tiah um dà, jơh ală be kòn deh bàr, ò gơs dô nơm lơi roh.

³Sơndồi ai tòm toh be dô dang che pơrhê, bơr ai niam mơnĕ ngan; tơrmồ ai gòm chèo be nggùl nai plai lừu. Dum bơh dơlam chèo cang.

⁴Ngko ai be gơlang Dabit, bơt bơtào nàng yồng ală khèl; oă rbô nơm khèl ală cau ling jak tòmlơh dê.

⁵Bàr đah toh ai dê be dô yô kòn be brê deh bàr, gơ ơm sa digùl ƀlàng bơkào gun.

⁶Jơl tus di càl àng drim, mơ mƀur gơ par dô thit, añ rơp lòt mhar hơđang mơnơm cài trŭ mơ guh hơ dòr kơlhô.

⁷Ơ cau kòñ gơboh añ jê, ai ngan hàng mơnĕ tòm jơh ală bơta, tòm ai ò gơs dô nơm tềl sồt lơi.

⁸Ơ bau ùr pa añ jê, tus tĕ bal mơ añ bơh Liban, tus tĕ bal mơ añ bơh Liban; Lik lòt tĕ bơh bồ Amana, bơh bồ mơnơm Senir mơ Hermôn, bơh trồm klìu triă, bơh mơnơm klìu sơmañ.

⁹Ơ oh ùr añ, bau ùr pa añ jê, ai neh tòmpìt nùs añ, ai neh kơñau nùs añ bơh dô bơta sền gơliang mat, bơh dô dang ñòng lŭ kràng màng di ngko ai, ai neh tòmpìt nùs añ.

¹⁰Ơ oh ùr añ, bau ùr pa añ jê, bơta kòñ gơboh ai la niam mơnĕ ò git nđò! Bơta kòñ gơboh ai la bơkah rlau mơ tơrnòm, mơ ƀô mơñà ƀô niam rlau mơ ală ƀô bơlhô ndai!

¹¹Ơ bau ùr pa añ, sơndồi ai gơcat dà lơwe, dà lơwe mơ dà toh ơm hơđơm lơmpiat ai; ƀô niam ồi ào ai dê be ƀô niam Liban dê.

¹²Oh ùr añ, bau ùr añ la suơn til kơ̆, la tồ dà kal wơl, la croh dà sềt kơ̆.

¹³Ală chi hòn tòm suơn hàng mơnĕ, gơs plai lừu mơ ală plai bơkah, bơkào phùng tien mơ chi krĕ;

¹⁴Chi krĕ, mơ bơkào phồng, chi ƀô niam mơ kơmhò kwê̆, bal mơ ală chi gơs ƀô bơlhu, cài trŭ, lư hồi bal mơ ală chi bơlhô ndai.

¹⁵Ai la dà cat tòm suơn, la tơrlung dà kis, la gùng dà hòr bơh Liban!

¹⁶Ơ càl đah đang, guh tĕ, ơ càl đah đơm, khồm tĕ; khồm tĕ tòm suơn añ, tồ ală ƀô bơlhu gơ par lik! Lòi tĕ cau kòñ gơboh añ mut tòm suơn khai, mơ sa ală plai bơkah lơngồt khai dê!