Read koho Esai 10 Bible Online

Esai 10 - koho bible

Esai 10

¹Bòl glar cau lơi in bơtào gơs ală bơta boh lam ò song ring, mơ cih ală bơta lơh nền rồn bơklơn,

²tă tơlik gơnoar cau siơ̆u siar bơh bơta song ring, mơ tòmpìt bơta song ring bơh ală cau rƀah tòm làng bol Añ jê, ai ală cau ùr bơnrau lơh gơs phan ơn pơndòm, mơ cau kòn đòi lơh be phan tòmpìt geh.

³Ñchi bol mê rơp lơh tòm ngai lơh glài, tòm bơta rung rài rơp tus bơh tiah ngài taih? Bol mê rơp ntoat dô tus hơ ñcau nàng geh dong kòl taih? Ntềng đah bol mê rơp prap lòi phan mơna bol mê dê taih?

⁴Bol khai mìng kun tơnliah să digùl ală cau ơm jàm, hala gơpừ digùl ală cau gơkòl tơnchơt. Bơh jơh ală bơta hơ̆, bơta gơjrañ Kơnràñ dê kung ò wèt ngài, tê Kơnràñ dê gam pò tơlik.

⁵Bòl glar Asiri in la gai bơta gơjrañ Añ jê, gai mơng tòm tê bol khai la bơta gơhào gơjrañ Añ jê!

⁶Añ sồr khai lòt tòmdră mơ dô nơm làng bol ò duh rngòt, Añ sồr khai tus tòmlơh mơ dô nơm làng bol mơ Añ gơhào gơjrañ, nàng phà kup mơ tòmpìt ai phan mơna, mơ jă trơm bol khai kung be bŏ tòm ală gùng.

⁷Mơya hơ̆ ò di la bơta khai lơh nền, hơ̆ ò di la bơta khai kơlôi tòm dơngoh; mơya tòm nùs khai dê la kòñ tơnroh, mơ pơndut oă làng bol.

⁸Khai đơs lah: “Jơh ală cau kwang at bồ mpồl ling añ jê ò di la ală cau bơtau ò ơ?

⁹Kalnô ò di kung be Karkemis ò ơ? Hamat ò di kung be Arpat, Samari ò di kung be Damas ò ơ?

¹⁰Kung be tê añ neh kup ală lơgar rùp ràk dê, la ală lơgar gơs rùp pac sềr oă rlau mơ Jerusalem mơ Samari,

¹¹Añ rơp ò lơh di Jerusalem mơ ală rùp ràk khai dê kung be Añ neh lơh Samari in mơ rùp ràk khai dê ò ơ?”

¹²Tòm tŭ Yàng Jehôwa neh lơh sir jơh ală broă tòmdră mơ mơnơm Siôn mơ Jerusalem Kơnràñ rơp đơs: “Añ rơp lơh glài bơtau Asiri tài bơh nùs pơnhừ să mơ gar mat pò hơđang khai dê.

¹³Bơh khai đơs lah: ‘Añ neh lơh bơta hơ̆ kơnòm di bơta pràn tê añ jê, mơ kơnòm di bơta jak chài añ jê, bơh añ gơs bơta git wă. Añ neh ntròn nhàr lơgar ală làng bol dê, añ neh phà kơñau ală phan màng bol khai dê, kung be dô nơm kơnrồ dam, añ neh tơmù ală cau nggui hơđang sơbàn.

¹⁴Tê añ jê neh jòi bàn, kung be dô nơm rsòn, phan mơna ală làng bol dê; kung be cau tơrgòm ală tap neh gơkòl sang lòi; Kung behơ̆ añ neh tơrgòm jơh plai ù; mơ ò dô nơm lơi pò pơnđar, hala pò bơr nàng nrau hòi.’”

¹⁵Sùng rgơi yò is să gơ jòng rlau mơ cau at gơ sơl? Hala rơnđòt jòng să mơ cau at gơ sơl? Kung be dô nơm gai mơng yò tơngguh cau at gơ, hala dô nơm gai jra rơp yò tơngguh cau at gơ.

¹⁶Gen tàng, Yàng la Yàng Jehôwa Gơnap Gơnoar Dờng, rơp sồr dô bơta kòp jê tơnroh rhòi digùl ală cau ling pràn kơldang khai dê; hơđơm bơta gơklŏ khai dê dô nơm ồs rơp sa hơng ngan.

¹⁷Bơta àng Israel dê rơp gơlik gơs dô nơm ồs, mơ Bơtau Sàng Goh khai dê be lơmpiat ồs, tòm dô ngai gơ rơp chu pơrguc ală tòm lò mơ lò mrơt khai dê.

¹⁸Bơta hàng mơnĕ brê dơr khai dê mơ tiah bềng chi sa plai khai dê, rơp kong tơnroh jơh hir, hwềng bal mơ să jan, kung be tòm tŭ cau òsô lòt gơsèng.

¹⁹Ală chi gam wơl tòm dơr brê khai dê rơp dô êt ngan, dô nă kòn dềt kung rgơi cih khà gơ dê.

²⁰Tòm ngai hơ̆, mpồl gam wơl Israel dê, la ală cau gam kis hìu Jakôp dê, rơp ò gam sơnđìng tai di dô nă cau neh lơh bol khai, mơya rơp sơnđìng di Yàng Jehôwa, Bơtau Sàng Goh Israel dê tòm jơnau song.

²¹Dô mpồl gam wơl rơp rê wơl, hơ̆ la dô mpồl gam wơl Jakôp dê rơp rê wơl hơ Yàng Tom Trồ Gơnap Gơnoar Dờng.

²²Ơ Israel, bulah làng bol mê dê be bràs di gah dàlềng, mìng ală cau gam wơl bol khai dê rơp rê wơl. Bơta tơnroh neh lơh nền, gơtras làm jơh mơ bơta song ring.

²³Yàng Jehôwa la Yàng Tom Trồ Gơnap Gơnoar Dờng rơp lơh wil tơl bơta lồi dut, be bơta lơh nền tòm làm jơh plai ù.

²⁴Gen tàng do la jơnau đơs Yàng Jehôwa dê, la Yàng Tom Trồ Gơnap Gơnoar Dờng: “Ơ làng bol Añ la cau ơm tòm Siôn, bañ rngòt di cau Asiri tòm tŭ bol khai pù bol mê mơ gai, mơ pò gai mơng bol khai tòmdră kung be cau Ejiptơ neh lơh.

²⁵Bơh gam dô êt jŏ tai, bơta gơjrañ Añ jê rơp tus di tŭ lồi; mơ bơta gơjrañ dờng Añ jê rơp wèt hơ bơta tơnroh bol khai.”

²⁶Yàng Jehôwa Gơnap Gơnoar Dờng rơp pò gai pù lơh tòmdră mơ bol khai, kung be tòm tŭ Kơnràñ neh tòmlơh mơ cau Midian di pơnai lŭ Hôrep; gai mơng Kơnràñ dê rơp ơm hơđang dàlềng, be Kơnràñ neh lơh tòm Ejiptơ.

²⁷Tòm ngai hơ̆, ơnòng kơnjơ̆ khai dê rơp geh tă tơlik bơh di pơnì bol mê dê, mơ yô khai rơp kòl tơnroh bơh dê ngko bol mê dê. Bol khai neh guh bơh Rimmôn.

²⁸Bol khai tus tòm Aiyat; bol khai lòt gan Migrôn; bol khai prap phan ngui sa tòm Mikmas.

²⁹Bol khai lòt gan kơh mơnơm, mơ đơs lah: “Bol he rơp lơh sàl mơ bic mang tòm Geba.” Rama rơm să rngòt; Gibea Sol dê neh ntoat dô.

³⁰Ơ kòn ùr Galim, ai jơnau driau dờng tĕ! Ơ cau Laisa, ai tồr iat tĕ! Nđàc sơngit cau Anatôt!

³¹Matmena ntoat dô; làng bol ơm tòm Gebim pồn să.

³²Di di ngai hơ̆ bol khai rơp ơm dơh wơl tòm Nôp, bol khai rơp pò tê tòmdră mơ mơnơm kòn ùr Siôn dê, mơ tòmdră mơ dòr Jerusalem dê!

³³Do, Yàng la Yàng Jehôwa Gơnap Gơnoar Dờng, rơp koh ală ntê chi mơ gơnoar dờng kìr rngòt. Ală chi jơnhoa rơp kòl koh, ală chi jơnhoa rlau jơh rơp kong tơmù.

³⁴Kơnràñ rơp ngui sùng nàng kơl ală tòm chi tòm brê, Mơ Liban bal mơ ală chi dờng ryŭ gơ dê rơp gơpừ.