Read koho Esai 12 Bible Online

Esai 12 - koho bible

Esai 12

¹Mê rơp đơs tòm ngai hơ̆ lah: “Khoai Yàng Jehôwa, añ rơp ai jơnau ưnngài Yàng, bulah Kơnràñ neh gơjrañ di añ, bơta gơjrañ Kơnràñ dê neh wèt ngài mơ Kơnràñ neh pơndòm pơniang añ.

²Ngan, Yàng Tom Trồ la bơta dong klàs añ jê; añ rơp dòn kơnòm mơ ò rngòt rngơt. Bơh Yàng Jehôwa, Yàng Tom Trồ la bơta pràn mơ gơnap gơnoar añ jê; Kơnràñ neh gơlik gơs bơta dong klàs añ jê.”

³Bol mê rơp bơ̆ dà bơh tơrlung bơta dong klàs mơ bơta hòn chò.

⁴Mơ bol mê rơp đơs tòm ngai hơ̆ lah: “Ưnngài tĕ Yàng Jehôwa, hòi dan tĕ di sơnđan Kơnràñ; yal tơnggit tĕ ală broă Kơnràñ neh lơh digùl ală làng bol, mơ yal tơlik tĕ lah sơnđan Kơnràñ geh yò tơngguh.

⁵Đơs chò tĕ Yàng Jehôwa in bơh Kơnràñ neh lơh ală broă àng gơklŏ; yal tơnggit tĕ ală bơta do làm plai ù.

⁶Ơ làng bol Siôn, hòi driau dờng tĕ mơ đơs chò hòn chò! Bơh Bơtau Sàng Goh Israel dê la dờng digùl bol mê.”