Read koho Esai 13 Bible Online

Esai 13 - koho bible

Esai 13

¹Do la jơnau đơs hwơr bơh Babilôn mơ Esai, kòn klau Amôs, neh gŏ:

²Bơtào tĕ bồng bi hơđang bồ mơnơm kơlờl, hòi tĕ dờng jơnau mơ bol khai; kwài tĕ tê lơh tềl bol khai in mut tòm ală mpồng dờng ală cau ryŭ ryơm dê!

³Añ, să tòm Añ neh ai jơnau gơnoar sồr ală cau sàng goh Añ jê; Añ neh hòi pơjum ală cau ling tòmlơh Añ jê, cau hòn să Añ jê, nàng lơh gơlik gơs bơta gơjrañ dờng Añ jê.

⁴Iat tĕ, gơs jơnau ntas hơđang ală mơnơm gơlơh be jơnau ntas bơh oă làng bol! Iat tĕ, gơs jơnau ntas nggồr digùl ală lơgar, gơlơh be ală làng bol pơjum bal! Yàng Jehôwa Gơnap Gơnoar Dờng pơjum tơrgòm dô mpồl ling nàng tòmlơh.

⁵Bol khai tus bơh lơgar ngài, bơh tiah lồi plai ù mơ dut trồ dê, Yàng Jehôwa mơ ală phan tòmlơh, bơta gơjrañ dờng Kơnràñ dê, nàng tơnroh jơh plai ù.

⁶Ñìm rac tĕ, bơh ngai Yàng Jehôwa dê neh rềp; ngai hơ̆ tus kung be bơta tơnroh bơh Bơtau Gơnap Gơnoar Làm Jơh.

⁷Tài bơh bơta hơ̆, jơh ală tê rơp gơlik lơbơn lơño, kòp nơm nùs kòn mơnus dê rơp lề lac.

⁸Bol khai rơp rngòt rngơt, bơta jê sồt oă ngan rơp kup geh bol khai; bol khai kong jê sồt be cau ùr jê deh. Bol khai rơp sền rmê bal mơ gơp muh mat bol khai be ồs hơng.

⁹Do, ngai Yàng Jehôwa dê tus, iơh rmơh, bal mơ bơta gơjrañ dờng mơ gơhào gơjrañ, nàng lơh plai ù in gơlik gơs dô bă tiah srau gòi, mơ tơnroh ală cau tồi glài tòm hơ̆.

¹⁰Ală sơmañ hơđang trồ bal mơ ală mpồl gơ dê rơp ò pơnđàng bơta àng gơ tai. Mattơngai pa lik rơp klam jơngo, mơ mat kơnhai rơp ò pơnđàng sòl.

¹¹Añ rơp lơh glài dunnia bơh bơta iơh bơsak gơ dê, lơh glài cau jàñ bơsak bơh bơta tồi glài iơh bơsak bol khai dê, Añ rơp pơndut bơta jòng să cau pơnhừ să dê, mơ rơp tơmù bơta pơnhừ să cau iơh rmơh dê.

¹²Añ lơh kòn mơnus in dô êt rlau mơ màh ngan, dô êt rlau mơ màh Ôphir dê.

¹³Behơ̆ tàng Añ rơp lơh ală tap trồ gơlơnggơr, ù tiah rơp gơlơnggơr mơ gơpơrdô bơh di tiah gơ dê bơta gơjrañ dờng Yàng Jehôwa Gơnap Gơnoar Dờng dê, tòm ngai Kơnràñ gơhào gơjrañ.

¹⁴Be dô nơm il cau mòc, hala be belàt ò gơs cau wĕ bol gơ; Jơh tơl nă rơp rê wơl hơ làng tòm he dê, mơ jơh tơl nă rơp dô rê hơ lơgar tòm bol khai dê.

¹⁵Cau lơi kòl kup gen rơp kong srơp bluh; jơh ală cau kòl kup rơp gơpừ hơđơm mat đào.

¹⁶Kòn dềt bol khai dê rơp kong tơnlề rpot rpet di đap mat bol khai, hìu bol khai dê rơp kong cau phà tòmpìt mơ bau ùr bol khai dê rơp kong cau bic bơklơn.

¹⁷Sền tĕ, Añ rơp chồl cau Medi tòmdră mơ bol khai, ală cau hơ̆ ò kơlôi bơh priă, mơ ò hàm kòñ màh.

¹⁸Àtak bol khai dê rơp tơnchơt ală cau pơnu, bol khai ò nđàc sơngit di kòn se, gar mat bol khai ò nđàc di ală kòn dềt.

¹⁹Babilôn la bơta gơklŏ ală lơgar dê, bơta hòn să mơ jòng să ală cau Kalde dê, rơp tòm toh be Sôdôm mơ Gômôrơ, Tòm tŭ Yàng Tom Trồ sang tơlik bol khai.

²⁰Gơ rơp ò gơs cau ơm, hala kis tềng hơ̆ tai tòm jơh ală rài; Ală cau Arap ò sơntơp sàl bol khai dê tềng hơ̆, ală cau ê belàt kung ò lòi mpồl belàt bic rlô bòl tềng hơ̆.

²¹Mơya ală phan poan jơng tòm brê rơp bic tềng hơ̆, hìu đam rơp bềng sềm grơt; tềng hơ̆ ală sềm làkđa rơp ơm sùm; tềng hơ̆ ală be brê rơp sơnđoh kơnhơl.

²²So rhau rơp khoal tòm ală theng kơp gàr kơ̆ cê gơ dê, so brê khoal tòm hìu gơlang dờng gơ dê. Tŭ tơngai gơ dê neh tus rềp, ală ngai gơ dê ò gam jŏ jòng tai.