Read koho Esai 14 Bible Online

Esai 14 - koho bible

Esai 14

¹Mơya Yàng Jehôwa rơp nđàc sơngit di Jakôp; dô dơ̆ tai Kơnràñ rơp sac rwah Israel, mơ rơp ơn bol khai tòm lơgar tòm bol khai dê. Cau lơgar bơdìh rơp tus tòmklac mơ bol khai, mơ lơh gơs dô bă bal mơ hìu Jakôp dê.

²Ală lơgar rơp tă bol khai, mơ cèng bol khai rê wơl hơ tiah bol khai dê. Hìu Israel rơp kup ală làng bol lơh gơs phan tòm, gơs dĭ klau dĭ ùr tòm ù tiah Yàng Jehôwa dê. Bol khai rơp kup dĭ ală cau neh kup bol khai lơh gơs dĭ, mơ at bồ cau neh rồn bơklơn bol khai.

³Tòm tŭ Yàng Jehôwa ai bol mê in rlô bòl, bơh bơta jê sồt, dơrcul, lơh broă kơnjơ̆ bơh dê ală cau rồn bơklơn mê,

⁴gen bol mê rơp đơs jơnau ñŏ tơnhial do bơh bơtau Babilôn lah: “Mbe cau at bồ rồn bơklơn ò gam tai, mbe gơlơh bơta gơjrañ dờng khai dê neh lồi taih?

⁵Yàng Jehôwa neh tơrpă gai at bồ cau iơh dê, mơ gai gơnoar ală cau at bồ dê.

⁶Hơ̆ la ală cau ò dơh lơh ală làng bol tòm tŭ gơhào nùs, at bồ ală lơgar tòm bơta gơjrañ mơ bơta rồn bơklơn ò gơs cau lơi rgơi kơryan.

⁷Jơh plai ù ơm lơngap lơngai, mơ ring ngềt, ai jơnau đơs chò.

⁸Chi nho hòn chò tài bơh mê chi pơnàng Liban dê đơs lah: ‘Bơh tŭ mê neh gơpừ rau, ò gơs cau tus nàng kơl bol hi tai.’

⁹Lơgar làng ƀồc hơđơm jrô neh rcang nggồr nggàc nàng tìp mat mê tòm tŭ mê tus, gơ pơrlai hwềng ală cau làng ƀồc nàng wă rò mê, hơ̆ la ală cau bơtau ală lơgar; gơlơh bol khai in ñă ntào bơh di sơbàn bol khai dê, jơh ală cau bơtau ală lơgar dê.

¹⁰Bol khai rơp ho wơl mơ đơs mơ mê lah: ‘Mê kung neh gơlik gơs lơbơn be bol hi, mê neh gơlik gơs kung be bol hi.

¹¹Bơta hàng mơnĕ ryŭ ryơm rơp cèng mê mù tòm lơgar làng ƀồc, bal mơ sap ală kơñi pĕ mê dê; Tu lơh gơs bềl lă bic mê dê, kih rhài lơh gơs ồi tơ̆ mê!’”

¹²Ơ sơmañ àng drim, kòn klau àng drim dê, mbe gơlơh mê neh dùh bơh đang trồ, mê la cau neh tơmù ală lơgar, mbe gơlơh mê neh kong tơndùh tòm ù tiah taih!

¹³Mê neh đơs tòm nùs mê lah: “Añ rơp guh hơđang trồ; añ rơp yò sơbàn añ jê jòng hơđang ală sơmañ Yàng Tom Trồ dê; añ rơp nggui di sơbàn hơđang mơnơm la tiah jơnum, hơđang tiah jơnhoa rlau Japhôn dê.

¹⁴Añ rơp guh jòng hơđang bồ ală mhwal; añ rơp lơh añ in gơlik gơs ndròm be Bơtau Hơđang Jòng Rlau Jơh.”

¹⁵Mơya mê pal kong tơmù tòm lơgar làng ƀồc, tòm tiah jrô trồm dê.

¹⁶Ală cau gŏ mê rơp sền trol di mê, mơ kơlôi sơnơng bơh bơta neh gơlik gơs di mê, mơ đơs lah: “Hơ̆ ò di la cau do neh lơh gơlơnggơr plai ù, mơ lơh ală lơgar rơm rngòt,

¹⁷la cau neh lơh lơgar dunnia gơlik gơs ƀlàng ngềt ngơt, la cau neh tuh tơlup ală ƀòn dờng, mơ ò lòi ală cau khai neh kup geh rê hìu ò ơ?”

¹⁸Jơh ală cau bơtau ală lơgar bic tòm bơta gơklŏ, kòp nă tòm bơtô is he dê.

¹⁹Mơya mê neh kong sang sơrbì bơh di bơtô ƀồc mê dê, be dô nơm ƀồc cù kìr; tơnsoh mơ ală cau chơt, ală cau hơ̆ kong srơp mơ đào, hơ̆ la ală cau mù di ală lŭ trồm jrô dê. Be ƀồc chơt kong jă trơm hơđơm mpàng jơng,

²⁰mê rơp ò geh tơp bal mơ bol khai, bơh mê neh tơnroh lơgar mê dê mơ tơnchơt làng bol mê dê. Jơi bơtiàn cau lơh iơh rơp ò tŭ lơi geh tơmoh sơnđan tai.

²¹Rcang tĕ nàng tơnchơt ală kòn klau khai dê, tài bơh tồi glài ồng pàng bol khai dê; Rngòt bol khai guh tòmpìt ù tiah mơ bơtào ƀòn dờng kơ̆ cê làm plai ù.

²²Yàng Jehôwa Gơnap Gơnoar Dờng đơs lah: “Añ rơp ñă ntào tòmdră mơ bol khai. Añ rơp tơnroh bơh Babilôn sơnđan gơ dê bal mơ làng bol gam wơl, kòn sau mơ jơi bơtiàn gơ dê.” Yàng Jehôwa đơs behơ̆.

²³“Añ rơp lơh ù tiah gơ dê gơlik gơs tiah klàng kò in, mơ gơlik gơs tiah bŏ ală phan brê in; Añ rơp pơs gơ mơ pơrnơs bơta tơnroh dê.” Yàng Jehôwa Gơnap Gơnoar Dờng đơs behơ̆.

²⁴Yàng Jehôwa Gơnap Gơnoar Dờng neh srat să lah: “Di ngan, bơta Añ neh rơndap gen rơp gơlik gơs, bơta Añ lơh nền gen rơp ntào kơ̆.

²⁵Añ rơp dơrpă cau Asiri tòm lơgar Añ; Añ rơp jă lề khai hơđang ală mơnơm hơđơm jơng Añ jê. Yô khai dê rơp geh hồ tă bơh di làng bol Añ jê, mơ ơnòng kơnjơ̆ khai dê geh tă bơh di pơnì bol khai dê.”

²⁶Do la bơta rơndap neh lơh nền jơh lơgar dunnia in; do la tê pò tơlik hơđang jơh ală làng bol.

²⁷Bơh Yàng Jehôwa Gơnap Gơnoar Dờng neh lơh nền behơ̆, gen ñcau rgơi kơryan Kơnràñ taih? Tê Kơnràñ neh pò gen ñcau rgơi pơrlac wơl taih?

²⁸Jơnau yal tơnggit do neh tus tòm nam bơtau Aca sang rài:

²⁹“Ơ jơh ală cau Philistin, bañ hòn chò tài bơh gai pù ơlih bol mê neh pă; bơh di jơi bơs hơ̆ rơp tơnggơs dô nơm bơs prào, bơh hơ̆ rơp tơnggơs dô nơm bơs ồs dờng par.

³⁰Cau rƀah rlau jơh digùl ală cau rƀah rơp jòi geh phan sa, cau siơ̆u siar rơp bic rlô lơngap lơngai. Mơya Añ rơp tơnroh ryas mê dê bơh bơta jơgloh rung, gơ rơp tơnchơt ală cau gam wơl mê dê.

³¹Ơ mpồng ƀòn, ñìm rac tĕ! Ơ ƀòn dờng, nggà driau tĕ! Ơ jơh tơl nă cau Philistin, lề lac tĕ! Bơh ñhŭ tus bơh đah đang, mơ ò gơs dô nă cau lơi sang lòi mpồl ling he dê.”

³²Ñchi jơnau rơp ho wơl mơ ală cau kong sồr tus bơh làng bol hơ̆ taih? Ho tĕ lah: “Yàng Jehôwa neh bơtào Siôn, ală cau siơ̆u siar tòm làng bol Kơnràñ dê rơp jòi bàn tiah kìng crŭ tòm hơ̆.”