Read koho Esai 19 Bible Online

Esai 19 - koho bible

Esai 19

¹Dô jơnau đơs hwơr bơh Ejiptơ: “Ne, Yàng Jehôwa hào hơđang dô puk mhwal tus mhar hơ Ejiptơ. Ală rùp ràk Ejiptơ dê rơm să rngòt di đap Kơnràñ, mơ nùs cau Ejiptơ dê lề lac tòm bol khai.

²Añ rơp chồl cau Ejiptơ tòmdră mơ cau Ejiptơ, cau do rơp tòmlơh mơ cau ne, cau gơp ƀòn tòmdră mơ cau gơp ƀòn, ƀòn dờng tòmdră mơ ƀòn dờng, lơgar tòmdră bal mơ lơgar.

³Cau Ejiptơ rơp gơdô nùs, mơ Añ rơp lơh roh tơnggume broă bol khai dê; bol khai hòi lùp ală rùp ràk mơ ală hwềng cau chơt, ală cau bơjơu mơ ală cau sền dà.

⁴Añ rơp phi cau Ejiptơ tòm gơnoar cau tòm iơh bơsak, mơ dô nă cau bơtau iơh bơsak rơp at bồ bol khai,” Yàng Jehôwa la Yàng Gơnap Gơnoar Dờng đơs behơ̆.

⁵Dà tòm hiòng Nil rơp soat, mơ kơnàng hiòng rơp rañ rsơh.

⁶Ală cau bơt bơtơt rbòng rơp gơlik ƀô ồm; ală croh dà Ejiptơ dê rơp rhòi rhòi gơhuc mơ soat. Proh mơ sùt rơp ro rañ,

⁷ală chi che rò gah hiòng Nil, di bơr hiòng dà hơ̆ kung ro rañ behơ̆. Kòp bă sre neh sih gar rò gah hiòng Nil rơp gơlik ro rañ, kong khồm pơrdô thit ò gam tai.

⁸Ală cau dang bơtơng ka rơp rac ròc mơ pơt wòl, jơh ală cau đàr ka di hiòng Nil kung lơh behơ̆, ală cau đùh bơtơng tòm dà rơp moat jrùng.

⁹Ală cau lơh broă rồi brài rơp gơplơ̆ nùs, mơ ală cau tàñ bài che dơmài lơbơn rơp kòl ƀàssìl.

¹⁰Ală cau chài tàñ Ejiptơ rơp moat jrùng gơplơ̆ nùs, mơ jơh ală cau lơh ơpah gen moat jrùng lơm.

¹¹Ală cau kwang at bồ tòm Jôan la ală cau bơrngơl gơla lơm; cau cri bơyai jak chài Pharaôn dê mìng bơyai ală jơnau ò kwơ lơm. Mbe mê rgơi đơs mơ Pharaôn lah: “Añ la dô nă tòm ală cau jak chài, la kòn sau ală cau bơtau tòm rài yau dê taih”?

¹²Tŭ do ntềng đah ală cau jak chài mê dê taih? Lòi ală cau hơ̆ sơnio mê in mơ lơh mê in git ală bơta mơ Yàng Jehôwa Gơnap Gơnoar Dờng neh lơh nền tòmdră mơ Ejiptơ.

¹³Ală cau kwang at bồ tòm Jôan neh gơlik gơs cau bơrngơl gơla; ală kwang at bồ tòm Memphis kong cau pơrlồm; ală cau lơh gơs pơnai lŭ mum hìu ală jơi bơtiàn gơ dê neh lam Ejiptơ lòt tìs nrah.

¹⁴Yàng Jehôwa neh đùh hơđang bol khai dô nơm hwềng bơta tìs gùng dê, gơlơh cau Ejiptơ in tìs nrah tòm ală broă bol khai lơh, gơlơh kung be cau bơñul ñô lòt gơtòmsèng gùt dar mơ gơbruh hă.

¹⁵Bulah bồ hala tiang, ntê gòl hala tòm proh Ò gơs broă lơi cau rơp rgơi lơh cau Ejiptơ in.

¹⁶Tòm ngai hơ̆, cau Ejiptơ rơp be cau ùr, rơm să rngòt di đap tê Yàng Jehôwa Gơnap Gơnoar Dờng neh pò tòmdră mơ bol khai.

¹⁷Lơgar Juda rơp cèng bơta rngòt rngơt cau Ejiptơ in; kòp nă cau kơno yal sơnđan Juda gen rơp rngòt rngơt ngan, tài bơh bơta Yàng Jehôwa Gơnap Gơnoar Dờng neh lơh nền tòmdră mơ bol khai.

¹⁸Tòm ngai hơ̆, pram nơm ƀòn dờng tòm Ejiptơ rơp đơs jơnau Kanaan, mơ ai sơnđan Yàng Jehôwa Gơnap Gơnoar Dờng mơ srat să ho pơgon. Dô nơm tòm ală ƀòn dờng hơ̆ rơp geh sơnđan la Ƀòn Dờng Mattơngai.

¹⁹Tòm ngai hơ̆ rơp gơs dô nơm cơnòng duh khoai Yàng Jehôwa in digùl lơgar Ejiptơ, mơ dô nơm jrong Yàng Jehôwa in di nhàr lơgar.

²⁰Hơ̆ la dô nơm tềl mơ dô jơnau lơh cơng bơh Yàng Jehôwa Gơnap Gơnoar Dờng tòm lơgar Ejiptơ. Tòm tŭ bol khai hòi Yàng Jehôwa tài bơh cau rồn bơklơn bol khai, Kơnràñ rơp sồr dô bơtau dong klàs mơ dong tò, dong tă bol khai.

²¹Behơ̆ Yàng Jehôwa rơp yal tơnggit să tòm Kơnràñ cau Ejiptơ in, mơ tòm ngai hơ̆ bol khai rơp đal git Yàng Jehôwa, bol khai rơp duh khoai Kơnràñ mơ ơn phan poan jơng mơ kòi mbo lơh gơs phan ơn duh khoai; bol khai rơp ho pơgon mơ Yàng Jehôwa, mơ prap gàr ală jơnau hơ̆.

²²Yàng Jehôwa rơp pù lơh Ejiptơ, pù lơh gen sơmbòi wơl; bol khai rơp rê wơl mơ Yàng Jehôwa, mơ Kơnràñ rơp ho wơl ală jơnau bol khai rac dan mơ sơmbòi bol khai.

²³Tòm ngai hơ̆ rơp gơs dô nơm gùng me bơh Ejiptơ tus hơ Asiri. Cau Asiri rơp lòt tus hơ Ejiptơ mơ cau Ejiptơ rơp lòt tus hơ Asiri. Cau Ejiptơ mơ cau Asiri rơp duh khoai dô bă bal.

²⁴Tòm ngai hơ̆, Israel rơp lơh gơs lơgar dơ̆ pe, dô bă bal mơ Ejiptơ mơ Asiri nàng lơh gơs dô bơta lơngai hơđang plai ù.

²⁵Yàng Jehôwa Gơnap Gơnoar Dờng rơp ai lơngai bol khai in mơ đơs lah: “Lơngai Ejiptơ in la làng bol Añ jê, Asiri in la broă lơh tê Añ jê, mơ Israel in la phan jơtài Añ jê.”