Read koho Esai 22 Bible Online

Esai 22 - koho bible

Esai 22

¹Jơnau đơs hwơr bơh thòng bơta gơtơnggŏ: Bơta lơi neh lơh mê in dơrcul, jơh tơl nă bol mê neh hào hơđang rkàng hìu taih?

²Ơ ƀòn dờng bềng jơnau driau dờng, la ƀòn dờng nggồr nggàc mơ ñô sa rui ràm? Ală cau kòl tơnchơt mê dê ò di chơt bơh đào, kung ò chơt tòm bơta tòmlơh.

³Ală cau kwang at bồ bol mê dê neh ntoat dô bal, bol khai kòl kup ò càng ngui àtak. Jơh ală bol mê la cau neh kòl kup, gen neh kong ơm jàm dô bă bal. Bulah bol khai neh dô ngài ngan.

⁴Gen tàng añ đơs lah: “Pleh mat tĕ bơh añ, lòi añ ñìm rac ròc sràt bơtang. Bañ pơnđơl nàng pơndòm pơniang añ, tài bơh bơta tơnroh cau kòñ gơboh làng bol añ jê.”

⁵Bơh Yàng Jehôwa la Yàng Tom Trồ Gơnap Gơnoar Dờng neh gơs dô ngai nggồr nggàc, jă trơm mơ sơlồng sơlàng tòm thòng bơta gơtơnggŏ, dô ngai nàng phà tơrlah ală dơrñang, hòi driau bơta dong kòl hơ ală mơnơm.

⁶Elam neh triau ding kam, bal mơ rơndeh ơseh mơ cau hào ơseh, mơ Kir neh tă ală khèl bơh tiah prap gơ.

⁷Ală thòng niam rlau jơh bol mê dê bềng ală rơndeh tòmlơh; ling hào ơseh neh ơm ntào tòm tiah bol khai dê di mpồng ƀòn dờng.

⁸Khai neh tă tơlik bơta jơm gòm Juda dê. Tòm ngai hơ̆ bol mê kơp sền di phan tòmlơh bơh tòm Gơlang Brê.

⁹Bol mê neh sền gŏ gơs oă tiah bluh tòm Ƀòn Dờng Dabit dê; bol mê prap lòi dà tòm tơnau hơđơm.

¹⁰Bol mê kòp ală hìu tòm Jerusalem, mơ bol mê sòr tơrlah ală hìu gơs dơrñang kơ̆ cê.

¹¹Bol mê bơt tơnau dà digùl bàr đah dơrñang ƀòn nàng prap lòi dà tơnau yau, mơya bol mê ò tơnggòr sền di Bơtau lơh gơs bơta hơ̆; hala ki ngàm di Bơtau neh lơh nền bơta hơ̆ bơh yau òr.

¹²Tòm ngai hơ̆ Yàng Jehôwa la Yàng Tom Trồ Gơnap Gơnoar Dờng neh hòi bol mê nàng ñìm rac mơ pơt wòl, nàng dŭi sŏ di bồ mơ soh ƀào sơnò kiat.

¹³Mơya ngan, gơs bơta hòn chò mơ ñô sa chò hòp, sreh kơnrồ mơ tơnchơt belàt, sa poac mơ ñô tơrnòm! Bol mê đơs lah: “Bol he sa ñô tĕ, bơh ngai hìng bol he rơp chơt!”

¹⁴Să tòm Yàng Jehôwa Gơnap Gơnoar Dờng neh yal tơlik bơta do tòm tồr añ lah: “Nền ngan la tồi glài do rơp ò geh toh bol mê in jơl tus di tŭ bol mê chơt.” Jehôwa Yàng Tom Trồ Gơnap Gơnoar Dờng đơs behơ̆.

¹⁵Yàng Jehôwa Gơnap Gơnoar Dờng neh đơs: “Lòt tĕ, đơs mơ cau sền gàr đam jàr la Sepna, la cau gơnoar at bồ gơlang bơtau dê mơ lah:

¹⁶‘Ñchi broă song ring mê gơs tềng do taih? Ñcau la gơp bơtiàn mê dê tềng do, mơ mê tò să tòm mê in dô nơm bơtô ƀồc tềng do; phàt dô nơm bơtô ƀồc tòm tiah jơnhoa, phàt mê in dô bă tiah ơm tòm pơnai lŭ taih?

¹⁷Yàng Jehôwa rơp sơrbì mê jàñ bơsak ngan, ơ cau klau añ jê! Kơnràñ rơp gơrwàng mê kơ̆ ngan.

¹⁸Kơnràñ rơp pồt mê kơ̆ ngan kung be pồt dô nơm plai coh, mơ sang sơrbì hơ dô nơm lơgar ơnàng. Tềng hơ̆ mê rơp chơt, tềng hơ̆ ală rơndeh lòs tòmlơh hàng mơnĕ mê dê rơp ơm bic tềng hơ̆, mê neh lơh ƀàssìl di cau tòm at bồ hìu mê dê!

¹⁹Añ rơp tă mê bơh dê gơnoar broă mê dê, mơ mê rơp kong dŭi bơh di gơnoar broă mê dê.

²⁰Tòm ngai hơ̆, Añ rơp hòi cau duh broă Añ jê la Eliakim, kòn klau Hilkia,

²¹mơ Añ rơp tơnsoh ào jrùh mê dê khai in, kơt ồi but mê dê gùt dar să khai, mơ jào gơnoar mê dê tòm tê khai. Khai rơp lơh gơs bèp ală cau ơm tòm Jerusalem mơ ală cau tòm hìu Juda.

²²Añ rơp ơn hơđang pơnì khai kai mpồng hìu Dabit dê; khai rơp pò mơ ò gơs cau lơi rgơi til, khai rơp til gen ò gơs cau lơi rgơi pò.

²³Añ rơp bơtào khai kơ̆ kung be cau pơng dô nơm đìn tòm tiah ring lơngai; mơ khai rơp gơlik gơs dô nơm sơbàn màng ryŭ hìu ồng pàng khai in.

²⁴Bol khai rơp yồng hơđang khai jơh bơta kơnjơ̆ hìu ồng pàng khai dê: kòn sau jơi bơtiàn gơ dê, ală phan ngui dềt rlau, bơh ală mơngàn tus di jơh ală gri.’”

²⁵Yàng Jehôwa Gơnap Gơnoar Dờng đơs lah: “Tòm ngai hơ̆, jơrmơng neh pơng di tiah kơ̆ cê rơp sơntă mơ dùh di tiah, mơ ală phan kơnjơ̆ yồng hơđang hơ̆ rơp roh rui.” Bơh Yàng Jehôwa neh đơs behơ̆.