Read koho Esai 24 Bible Online

Esai 24 - koho bible

Esai 24

¹Tŭ do, Yàng Jehôwa rơp lơh plai ù in srau gòi, mơ lơh gơ in gơkòl sang lòi ngềt ngơt; Kơnràñ lơh plai ù in gơtòmgơl rùp să, mơ lơh làng bol ơm tòm gơ gơprah gơpring.

²Tŭ hơ̆ jơh tơl nă cau rơp gơlik gơs ndròm bal, ală cau gơnoar ơn phan duh khoai kung be làng bol, cau klau tòm kung be cau klau duh broă, cau ùr tòm kung be cau ùr duh broă, cau tac kung be cau blơi, cau càn kung be cau ai càn, cau kòl dồs kung be cau tòm dồs.

³Jơh plai ù rơp gơkòl sang lòi srau gòi; mơ gơkòl tòmpìt sơmbrơt; bơh Yàng Jehôwa neh đơs jơnau do.

⁴Plai ù rơp rañ rsơh mơ ñòp ro; lơgar dunnia siar roh mơ ñòp ro; tap trồ mơ plai ù kung siar roh jơh.

⁵Plai ù kòl lơh ƀơ̆ ƀơl, bơh di ală làng bol ơm tòm gơ; bơh bol khai tìs glài mơ bơta boh lam, tìs glài mơ bơta sồr lam, gơltac sang bơta ho bal gam sùm sùm.

⁶Gen tàng bơta srat rma sa loan plai ù, làng bol ơm hơđang plai ù kong bơta jê sồt bơh bơta tồi glài bol khai dê; gen tàng làng bol ơm hơđang plai ù rơp gơpơndut wơl, mơ dô êt cau gam wơl.

⁷Tơrnòm neh soat jơh, tòm ño neh ro jrùh jơh; ală nùs hòn chò gơlik pơt wòl.

⁸Ntas sơnggơr chò hòp ò gam tai, ală sap nggồr nggàc neh dơh wơl, sap kơñi rơs bơkah tồr ò gam tai.

⁹Ò gam gơs cau ñô tơrnòm ndang đơs chò ndang tai; tơrnòm gơlik bơtang tòm bơr cau ñô gơ.

¹⁰Ƀòn dờng sơlồng sơlàng neh tơrlơm lề; kòp nơm hìu neh til jơh gen tàng ò gơs cau lơi rgơi mut.

¹¹Gơs cau hòi driau tòm gùng bơh siơ̆u tơrnòm; jơh ală bơta chò hòp gơlik bơta moat jrùng; jơh ală bơta hòn chò hơđang plai ù gơkòl sang lòi.

¹²Ƀòn dờng mìng gam rhàng srau gòi, mpồng ƀòn dờng neh tơrlơm lề lac;

¹³Ală bơta hơ̆ rơp gơlik gơs hơđang plai ù, mơ digùl ală lơgar, be tòm tŭ cau pù chi ôlibe nàng ai plai, be tòm tŭ cau dòñ plai ño tơnơ̆ mơ kơnhai pic plai.

¹⁴Bol khai ai jơnau driau dờng hòn chò; bơh đah mattơngai mut, jòng ro bơta ryŭ ryơm Yàng Jehôwa dê.

¹⁵Gen tàng bơh đah mattơngai lik, cèng bơta gơklŏ Yàng Jehôwa in, tòm ală bồt pơlào dàlềng dê, jòng ro tĕ sơnđan Yàng Jehôwa la Yàng Tom Trồ Israel dê.

¹⁶Bơh ală tiah lồi plai ù dê, bol he kơno ală bơta đơs chò bơta jòng ro lah: “Bơta gơklŏ gơrê mơ Bơtau Song Ring.” Mơya añ neh đơs lah: “Nùs añ siar roh, añ siar roh! Bòl glar añ in! Ală cau pơrlơ̆ dră! Cau pơrlơ̆ dră kư̆ pơrlơ̆ dră sùm!”

¹⁷Ơ làng bol hơđang ù, bơta rngòt rngơt, trồm tơrluh mơ dă bơtơng dùh hơđang bol mê.

¹⁸Cau lơi dô bơh jơnau rngòt rngơt dê gen rơp dùh tòm trồm jrô; cau lơi hào guh bơh di trồm jrô gen rơp yar dă. Bơh ală mpồng dềt trồ dê neh gơ pò, ală mơnàng plai ù gơlơnggơr.

¹⁹Plai ù neh bơcah jơh hir, plai ù neh tơrlah tơrlơm rpot rpet, plai ù neh gơlơnggơr dờng ngan.

²⁰Plai ù gơpơrlac kung be cau bơñul ñô; gơtơyài kung be dô nơm rnŭ lơh mơ ja, tồi glài gơ tơnàñ kơnjơ̆ hơđang gơ, mơ gơ rơp tơrlơm mơ rơp ò geh guh tai!

²¹Tòm ngai hơ̆, Yàng Jehôwa rơp lơh glài ală gơnoar at bồ hơđang trồ tòm ală tap trồ, mơ tòm ù ală cau bơtau tòm plai ù.

²²Bol khai rơp kòl tơrgòm bal dô bă be ală cau ơm jàm tòm dô nơm trồm; bol khai rơp kòl jàm tòm tiah jơngo, tơnơ̆ mơ jŏ ngai bol khai rơp kong lơh glài.

²³Mat kơnhai rơp ƀàssìl, mattơngai rơp ƀàssìl; bơh Yàng Jehôwa Gơnap Gơnoar Dờng rơp at bồ hơđang mơnơm Siôn mơ hơđang Jerusalem, Kơnràñ rơp ràng tơlik bơta gơklŏ Kơnràñ dê di đap ală kwang kra Kơnràñ dê.