Read koho Esai 27 Bible Online

Esai 27 - koho bible

Esai 27

¹Tòm ngai hơ̆, Yàng Jehôwa rơp ngui đào sồt dờng mơ gơnoar pràn nàng lơh glài lebiathan la dô nơm bơs par, lebiathan la dô nơm bơs rkwet rkwe; Kơnràñ rơp tơnchơt nagrài dờng tòm dàlềng.

²Tòm ngai hơ̆, đơs chò tĕ bơh suơn ño gơlik gơs oă plai!

³Añ, Yàng Jehôwa, la cau sền gàr gơ, Añ tuh dà gơ in sùm sùm ò dơh. Añ sền gàr gơ ngai mơ mang nàng ò gơs cau lơi lơh iơh di gơ.

⁴Añ ò gơjrañ; dilah gơ cèng Añ in tòm lò mrơt! Añ rơp lòt tòmlơh mơ bol gơ; Añ rơp chu pơrguc gơ.

⁵Hala lòi tĕ gơ sơmbat di Añ nàng geh sền gàr; lòi tĕ gơlơh gơtòmsòr mơ Añ, lòi tĕ gơlơh gơtòmsòr mơ Añ.”

⁶Tòm ală ngai rơp tus, Jakôp rơp hòn ryas, Israel rơp cat sơmbut mơ lì bơkào, mơ rơp gơlik plai bềng lìu hơđang jơh plai ù.

⁷Yàng Jehôwa neh lơh bol khai kung be Kơnràñ lơh ală cau neh lơh di khai sơl ơ? Hala bol khai neh kong tơnchơt kung be ală cau tơnchơt bol khai neh kong tơnchơt sơl ơ?

⁸Bơh bơta bơtrơh tơlik mơ bơta kup cèng, Kơnràñ tòm pơndang tòmdră mơ bol khai, Kơnràñ ngui nhơm càl khồm pơrdô bol khai tòm ngai gơs càl đah mattơngai lik khồm.

⁹Gen tàng tài bơh bơta do tồi glài Jakôp dê rơp geh tơwài, mơ bơta do rơp la cồng nha bơta tă sang tồi glài khai dê: Tòm tŭ khai lơh jơh ală lŭ cơnòng duh khoai dê gơlik be lŭ cùr bơcah rpot rpet, ală rùp ràk Asera mơ ală cơnòng duh khoai chu kơlhô rơp ò gơs tŭ lơi bơt bơtào tai.

¹⁰Bơh ƀòn dờng kơ̆ cê neh gơkòl lòi srau gòi, tiah ơm làng bol dê neh kòl sang lòi be ƀlàng bràs mơ ƀlàng ngềt ngơt; tềng hơ̆ ală kơnrồ kòn sa ñhơt, bic rlô mơ sa tơrging ală ntê chi.

¹¹Tòm tŭ ală ntê ro neh pă, ală cau ùr tus dòñ nàng sing ồs. Bơh do la dô nơm làng bol ò git wă, gen tàng Bơtau neh crơng gơs bol khai ò kòñ nđàc di bol khai, Bơtau neh mòn gơs bol khai ò yal tơlik bơta nđàc bol khai in.

¹²Tòm ngai hơ̆, Yàng Jehôwa rơp pơrjòt kòi bơh hiòng Ơphrat tus di croh Ejiptơ; mơ bol mê, ơ kòn sau Israel, bol mê rơp geh tơrgòm dơ̆ dô nă dô nă.

¹³Tòm ngai hơ̆, dô nơm kơlwòk dờng rơp geh uh. Ală cau neh roh rui tòm Asiri, mơ ală cau neh kòl cèng pơrdô tòm Ejiptơ rơp tus duh khoai Yàng Jehôwa hơđang mơnơm sàng goh tòm Jerusalem.