Read koho Esai 30 Bible Online

Esai 30 - koho bible

Esai 30

¹Yàng Jehôwa đơs: “Ơ ală kòn sau jak tòmdră, bơtào rơndap tơnggume broă ò jat nùs Añ; lơh gơs dô bă bal tòmdră mơ nùs kòñ Añ jê, bơtơl tồi glài hơđang tồi glài;

²Bol khai mù hơ Ejiptơ mơ ò lùp Añ, jòi tiah kìng crŭ tòm bơta sền gàr Pharaôn dê, mơ jòi tiah pồn să tòm mƀur Ejiptơ dê.

³Gen tàng bơta sền gàr Pharaôn dê rơp gơlik bơta ƀàssìl bol mê in, mƀur Ejiptơ dê rơp cèng bơta sền òsơp bol mê in.

⁴Bulah bol khai gơs ală cau kwang at bồ tòm Joan, mơ cau kong sồr lòt neh tus tòm Hanes.

⁵Jơh tơl nă cau rơp tus hơ bơta ƀàssìl bơh kơnòm di dô nơm làng bol ò kwơ bol khai in, ò rgơi dong kòl hala lơh gơlik cồng nha lơi, mơya mìng bơta ƀàssìl ƀàsso mơ sền òsơp.”

⁶Do la dô jơnau đơs hwơr bơh ală phan poan jơng tòm Negep: Gan ù tiah bòl glar kalke, ù tiah ală klìu triă dam mơ klìu triă me ơluh, bơs bih mơ bơs ồs par, bol khai pơdiang phan mơna bol khai dê hơđang ngkòi alàng, pơdiang phan màng bol khai dê hơđang gu làkđa dê, tus hơ dô nơm làng bol ò lơh gơlik kwơ bol khai in.

⁷Bơh bơta dong kòl Ejiptơ la ò kwơ mơ tê gòi. Gen tàng Añ sơnđan khai la Rahap nggui ò ơwañ.

⁸Tŭ do lòt tĕ, cih tĕ gơ di đap bol khai in hơđang dô nơm mpàn cih mơ cih tĕ tòm sră pồt, behơ̆ gơ rgơi lòi lơh cơng wơl ală rài tơnơ̆ gam sùm sùm in.

⁹Bơh bol khai la dô nơm làng bol jak tòmdră, kòn sau ò gơs bơta dòn, kòn sau ò bài iat jơnau bơto sồr Yàng Jehôwa dê.

¹⁰Bol khai đơs mơ ală cau sền bơta gơtơnggŏ lah: “Bañ sền tai!” mơ đơs mơ ală cau gơnoar hwơr lah: “Bañ đơs hwơr bol hi in ală bơta di ngan! Yal tĕ bol hi in ală jơnau bơkah tồr, đơs hwơr tĕ bơh ală bơta ò gơs ngan.

¹¹Lik tĕ bơh gùng, pleh tĕ bơh gùng, bañ lòi bol hi iat tai bơh Bơtau Sàng Goh Israel dê!”

¹²Behơ̆ tàng, Bơtau Sàng Goh Israel dê đơs be do: “Tài bơh bol mê neh sang lòi jơnau do mơ kơnòm di bơta rồn bơklơn, mơ bơta blac pơrlồm, mơ dòn kơnòm di bol khai.

¹³Gen tàng tồi glài do rơp gơlik gơs bol mê in kung be dô bă tiah bơcah dê dơrñang jơnhoa neh dàng mơ ồm lề, mơ gơ rơp tơrlơm dô bă nisơna.

¹⁴Gơ rơp bơcah rpot rpet be dô nơm gri mơ ù, gơ bơcah ò pơlai dô êt lơi, tian gơs nsàng gơ ò gơs dô pet lơi rgơi ngui ơn rnga ồs tòm bơnhă hala bơ̆ dà bơh tơrlung.”

¹⁵Yàng Jehôwa la Bơtau Sàng Goh Israel dê neh đơs be do: “Tòm bơta rê wơl mơ ơm rlô, bol mê rơp geh dong klàs, tòm bơta ơm mŏ mŏ mơ gơn kơnòm, rơp la bơta pràn kơldang bol mê dê; mơya bol mê ò bài.

¹⁶Bol mê đơs lah: ‘Ò, bol hi rơp hào ơseh ntoat dô!’ Gen tàng bol mê rơp ntoat dô! mơ đơs lah: ‘Bol hi rơp hào ơseh jak!’ Gen tàng ală cau ting jat bol mê kung rơp ntoat mhar!

¹⁷Dô rbô nă ntoat dô bơh mìng dô nă đơs pơhìn; pram nă cau đơs pơhìn gen jơh tơl nă bol mê rơp ntoat dô, jơl tus di tŭ bol mê mìng gam wơl kung be dô nơm jrong bồng bi hơđang bồ mơnơm, be dô nơm bồng bi hơđang dô nơm dòr.”

¹⁸Bulah behơ̆, Yàng Jehôwa kơp gơn nàng ai bơta nđàc bol mê in, Kơnràñ rơp guh nàng yal tơlik bơta nđàc sơngit bol mê in. Bơh Yàng Jehôwa la Yàng Tom Trồ song ring. Lơngai jơh tơl nă cau in gơn kơp Kơnràñ!

¹⁹Ơ làng bol Siôn la cau ơm tòm Jerusalem, bol mê rơp ò ñìm rac tai. Kơnràñ kòñ nđàc ngan, tòm tŭ bol mê dan Kơnràñ dong kòl! Tòm tŭ kơno, gen Kơnràñ rơp ho wơl bol mê in.

²⁰Bulah Yàng Jehôwa ai bol mê in piang lă jê sồt mơ dà bòl glar, ală cau bơto bol mê dê rơp ò pồn să tai; mat tòm bol mê dê rơp gŏ bol khai.

²¹Bulah bol mê pơrlac đah ma hala đah kiau, tồr bol mê rơp kơno gơs sap đơs đah ngkòi bol mê lah: “Do la gùng, lòt tĕ tòm hơ̆!”

²²Gen bol mê rơp lơh ƀơ̆ ƀơl ală rùp ràk ƀềp mơ priă mơ ală rùp duh khoai ƀềp màh bol mê dê; bol mê rơp sơrbì gơ kung be sang phan ƀơ̆ ƀơl mơ đơs mơ gơ lah: “Lik tĕ bơh do!”

²³Yàng rơp sồr mìu dùh hơđang gar sơntìl bol mê neh sih tòm ù; phan sa bơh ù tơnggơs rơp gơs oă mơ tơngkah tơngkañ. Tòm ngai hơ̆ phan poan jơng bol mê dê rơp sa ñhơt tòm ƀlàng dờng ơnàng.

²⁴Ală kơnrồ mơ alàng lơh broă tòm sre rơp sa ñhơt ro mơ rhe cau neh rsìh tòm ƀlàng.

²⁵Tòm ngai sreh tơnchơt dờng hơ̆, tòm tŭ ală theng kơp gàr tơrlah tơrlơm, ală croh dà rơp hòr hơđang kòp nơm mơnơm jơnhoa mơ kòp nơm dòr.

²⁶Mat kơnhai rơp àng kung be mattơngai, mơ bơta àng mattơngai dê rơp àng poh dơ̆ rlau, be bơta àng poh ngai wil tơl, tòm ngai Yàng Jehôwa pùt ală tiah sồt làng bol Kơnràñ dê mơ sơmbòi tềl sồt mơ Kơnràñ neh lơh di bol khai bơh nhơm khồm Kơnràñ dê.

²⁷Sền ne, Sơnđan Yàng Jehôwa tus bơh tiah ngài, tus bal mơ bơta gơjrañ dờng Kơnràñ dê be mhwal jù mơ ñhŭ par guh; sơndồi Kơnràñ dê bềng bơta gơjrañ dờng, lơmpiat Kơnràñ dê la ồs sa pơrguc.

²⁸Nhơm tă Kơnràñ dê ò gơkrơi kung be gùng dà hòr pràn, bam tus di ngko. Kơnràñ nggum ală lơgar bơh dô nơm đồng bơta tơnroh, Kơnràñ gla kàng ală làng bol nàng lam bol khai lòt tìs gùng.

²⁹Bol mê rơp đơs chò kung be tòm mang gơs bơta pơjum sa ngai wèr sàng goh; nùs bol mê rơp gơs bơta hòn chò kung be cau uh kơwào, mơ guh hơđang mơnơm Yàng Jehôwa dê la Pơnai Lŭ Klềr Israel dê.

³⁰Yàng Jehôwa rơp lơh cau in kơno sap đơs ryŭ ryơm Kơnràñ dê, mơ rơp ai bol khai in sền gŏ tơwòr tê Kơnràñ dê tơndùh bơta gơjrañ dờng bal mơ ồs sa pơrguc, càl khồm druh, càl rbut dờng, mơ mìu piar.

³¹Sap đơs Yàng Jehôwa dê rơp lơh Asiri in rngòt rngơt; Kơnràñ rơp ai gai Kơnràñ dê mơ pù lơh Asiri;

³²Kòp dơ̆ Yàng Jehôwa lơh bol khai mơ gai lơh glài, mơ Yàng Jehôwa neh lơh nền hơđang gơ, gen kung be ntas sơnggơr dềt mơ kơñi pĕ mơ Kơnràñ pò tê tòmlơh mơ gơ.

³³Bơh Tôphet neh rcang bơh jŏ rau; gơ geh rcang sir cau bơtau in. Brong ồs gơ dê jrô mơ ơnàng, gơs ồs mơ lòng oă ngan; nhơm tă Yàng Jehôwa dê kung be dô nơm croh siau sa hơng gơ.