Read koho Esai 31 Bible Online

Esai 31 - koho bible

Esai 31

¹Bòl glar ală cau in mù hơ Ejiptơ nàng dan dong kòl, kơnòm di ală ơseh, kơnòm di oă ngan rơndeh lòs tòmlơh mơ kơnòm di bơta pràn kơldang oă ngan ală cau ling hào ơseh dê, mơya ò sền tơnggòr di Bơtau Sàng Goh Israel dê, hala jòi lùp Yàng Jehôwa.

²Mơya Kơnràñ la Bơtau jak chài mơ tơndùh bơta rung rài, Kơnràñ ò hòi rê wơl jơnau Kơnràñ neh đơs. Kơnràñ rơp guh tòmdră mơ hìu cau iơh bơsak, mơ tòmdră mơ ală cau dong kòl cau lơh bơta iơh.

³Mơya cau Ejiptơ la kòn mơnus, ò di la Yàng Tom Trồ; ơseh tòmlơh bol khai dê mìng la poac să, ò di la hwềng. Tòm tŭ Yàng Jehôwa pò tê Kơnràñ dê gen cau dong kòl rơp gơpừ, cau geh dong kòl rơp gơplơ̆, jơh bàr đah rơp kong roh rui bal.

⁴Yàng Jehôwa neh đơs mơ añ be do: “Kung be dô nơm klìu triă hala dô nơm kòn klìu triă ơluh ơhùm tòm tŭ kup geh phan sa, bulah dô mpồl cau ê belàt pơjum bal nàng tòmdră mơ gơ, gơ ò rngòt bơh jơnau driau dờng bol khai dê, hala bơta pơhìn bơta lơh nggồr nggàc bol khai dê. Behơ̆ Yàng Jehôwa Gơnap Gơnoar Dờng rơp mù nàng tòmlơh hơđang mơnơm Siôn mơ hơđang ală dòr gơ dê.

⁵Kung be sềm par srà hơđang bồ, behơ̆ Yàng Jehôwa Gơnap Gơnoar Dờng rơp sền gàr Jerusalem, Kơnràñ rơp cang kìng mơ dong tă gơ, Kơnràñ rơp prap lòi gơ mơ rơp dong tă gơ.

⁶Ơ kòn sau Israel, rê wơl tĕ mơ Kơnràñ la Bơtau mơ bol mê neh jơh nùs tòmdră.

⁷Bơh tòm ngai hơ̆, jơh tơl nă bol mê rơp sang sơrbì rùp ràk mơ màh mơ priă la phan bol mê neh ngui tê bềng tồi glài he dê mơ lơh gơs.

⁸Gen cau Asiri rơp gơpừ bơh lơmpiat đào, ò di đào kòn mơnus dê; mơ đào ò di la đào kòn mơnus dê rơp sa loan bol khai. Bol khai rơp dô bơh di đap đào hơ̆, mơ ală cau klau pơnu bol khai rơp kong duh broă bòl glar.

⁹Pơnai lŭ bol khai dê rơp lòt rlau tòm bơta rngòt rngơt; ală cau kwang at bồ ling bol khai dê rơp rơm să rngòt tòm tŭ gŏ bồng bi.” Yàng Jehôwa la Bơtau gơs ồs tòm Siôn mơ gơs bơnhă ồs tòm Jerusalem đơs behơ̆.