Read koho Esai 35 Bible Online

Esai 35 - koho bible

Esai 35

¹Ƀlàng ngềt ngơt mơ tiah ro rañ rơp chò hòp; ƀlàng bràs rơp hòn chò mơ gơcat bơkào be bơkào Rmit.

²Gơcat bơkào lìu làc mơ hòn chò mơ chò hòp đơs chò. Bơta gơklŏ Liban dê rơp geh ai gơ in, bơta ryŭ ryơm Karmel mơ Sarôn dê; bol gơ rơp gŏ bơta gơklŏ Yàng Jehôwa dê, mơ bơta ryŭ ryơm Yàng Tom Trồ bol he dê.

³Lơh tĕ pràn ală mpàng tê lơbơn lơño in, lơh tĕ kơ̆ ală gơltang ơrơm in.

⁴Đơs tĕ mơ ală cau gơs nùs rngòt rngơt lah: “Kơ̆ tĕ nùs, bañ rngòt; do la Yàng Tom Trồ bol mê dê, Kơnràñ rơp tus nàng sal tê; bal mơ bơta rngòt cù kìr mơ bơta sal wơl. Kơnràñ rơp tus nàng dong klàs bol mê.”

⁵Gen mat cau jơngo rơp geh àng, tồr cau tĭ rơp geh kơno.

⁶Tŭ hơ̆ cau kwet kơlte rơp sơnđoh be jun, lơmpiat cau kloat rơp đơs chò bơta hòn chò in. Dà rơp gơcat tòm ƀlàng ngềt ngơt, mơ ală croh dà rơp gơhòr tòm ƀlàng bràs.

⁷Bràs duh rơp gơlik gơs tơnau dà, ù tiah rañ rsơh rơp gơlik gơs croh dà. Trồm so brê ơm rơp gơlik tiah bŏ nàk, ƀlàng ñhơt rơp hòn bal mơ proh tràng.

⁸Tềng hơ̆ rơp gơs dô nơm gùng me, gơ rơp geh sơnđan la Gùng Bơta Sàng goh. Cau ò goh rơp ò geh lòt tòm hơ̆; mơya lòi ală làng bol Yàng Tom Trồ in, cau lòt gùng bulah bơrngơl gơla kung rơp ò lòt tìs nrah.

⁹Tòm gùng hơ̆ rơp ò gơs klìu triă, rơp ò gơs dô nơm phan brê jàñ bơsak lơi; ò bàn bol gơ tềng hơ̆. Mơya mìng ală cau geh dong tơwài rơp lòt tềng hơ̆.

¹⁰Mơ ală cau Yàng Jehôwa neh tơwài rơp rê wơl. Bol khai mut tòm Siôn bal mơ jơnau đơs chò; bơta hòn chò gam sùm sùm rơp tơndau hơđang bồ bol khai. Bol khai rơp bềng lìu bơta chò hòp mơ hòn chò, bơta moat jrùng mơ rac ròc rơp roh thit.