Read koho Esai 41 Bible Online

Esai 41 - koho bible

Esai 41

¹Ơ bol mê la ală bồt pơlào, ơm tĕ mŏ mŏ di đap Añ mơ iat! Lòi ală làng bol gơs tĕ pràn pa; Lòi tĕ bol khai tus rềp mơ đơs! Lòi bol he tus rềp bal nàng cahrña!

²Ñcau neh tơngguh dô nă cau geh pha lin bơh đah mattơngai lik, bơtào khai tòm bơta duh broă khai dê? Kơnràñ jào ală lơgar tòm tê khai, mơ jă trơm ală bơtau hơđơm jơng khai dê. Kơnràñ lơh bol khai mơ đào gơlik kung be kơmbuh ù, lơh bol khai mơ àtak gơlik be rhe ro kòl càl khồm.

³Kơnràñ ting jat bol khai mơ sơrlèt rlau tòm bơta ring lơngai tòm tŭ jơng pa jă di gùng.

⁴Ñcau neh lơh gơs mơ lơh sir ală bơta do, hòi ală rài bơh tŭ sơnròp taih? Añ, la Yàng Jehôwa, Añ Bơtau Sơnròp mơ Lồi Dut.

⁵Ală bồt pơlào neh gŏ bơta hơ̆ mơ rngòt rngơt, ală tiah lồi dut plai ù gơlơnggơr, bol khai tus rềp mơ tus;

⁶Kòp nă dong kòl cau ndai, mơ đơs mơ dô nă cau ndai lah: “Lơh tĕ khin cha!”

⁷Cau chài pac sềr chồl bơtrut nùs cau chài tiar màh, mơ cau chài drèp chồl bơtrut nùs cau chài tiar; bol khai đơs bơh tiah pơnđềt trà lah: “Niam ngan.” Khai ai đìn pơng nàng rùp ràk ò gơ ơwañ.

⁸Mơya bol mê, ơ Israel, la cau duh broă Añ jê, Jakôp la cau Añ neh sac rwah, bol mê la jơi bơtiàn Abraham cau bơyô Añ jê;

⁹La cau Añ neh tă bơh di ală tiah lồi dut plai ù, Añ neh hòi sac mê bơh di ală tiah ngài rlau jơh mơ mum plai ù dê, mơ đơs mơ mê lah: “Mê la cau duh broă Añ jê; Añ neh sac rwah mê, mơ neh ò sang lòi mê.”

¹⁰Bañ rngòt, bơh Añ ơm bal mơ mê; bañ rngòt rngơt, bơh Añ la Yàng Tom Trồ mê dê. Añ rơp lơh mê in pràn kơldang, Añ rơp dong kòl mê mơ rơp yò tơngguh mê mơ tê ma pha lin rlau Añ jê.

¹¹Jơh ală cau gơhào gơjrañ di mê rơp kong ƀàssìl mơ kòl sền òsơp. Ală cau tòmdră mơ mê rơp gơlik ò kwơ mơ kong roh rui.

¹²Mê rơp jòi cau sò tơm di mê, mê jòi mơya ò bàn. Ală cau lơh kơlìn tòmlơh mơ mê rơp gơkòl roh rui be ò gơs phan lơi.

¹³Bơh Añ la Jehôwa Yàng Tom Trồ mê dê, rơp tề di tê ma mê mơ hơ̆ la Añ đơs mơ mê lah: “Bañ rngòt, Añ rơp dong kòl mê.”

¹⁴Ơ tu rhài Jakôp dê, bañ rngòt! Ơ kih rhài Israel dê! Añ rơp dong kòl mê, Yàng Jehôwa behơ̆ đơs! Bơtau Dong Tơwài mê, la Bơtau Sàng Goh Israel dê đơs behơ̆.

¹⁵Do, Añ rơp lơh mê in gơlik gơs phan pòng kòi, pa mơ sơmplàñ gơs oă sề. Mê rơp gì ală mơnơm mơ tơnlề gơ, lơh ală dòr gơlik gơs kung be nsiap kòi.

¹⁶Mê rơp tòmpơr gơ, càl rơp cèng pơrdô gơ, càl rbut dờng rơp rsìh bol gơ roh jơh. Mơya mê rơp hòn chò tòm Yàng Jehôwa, geh gơklŏ tòm Bơtau Sàng Goh Israel dê.

¹⁷Ală cau rƀah lơòi mơ cau siơ̆u siar jòi dà mơya ò gơs; lơmpiat bol khai dê ro rañ tài bơh tơhìr. Mơya Yàng Jehôwa rơp ho wơl bol khai; Añ la Yàng Tom Trồ Israel dê, rơp ò sang lòi bol khai.

¹⁸Añ rơp lơh ală hiòng dà gơhòr hơđang ală mơnơm kơlờl, mơ ală croh dà ngŏ bơh digùl thòng. Añ rơp lơh ƀlàng bràs in gơlik gơs tơnau dà, mơ lơh ù rañ rsơh in gơlik gơs croh dà.

¹⁹Añ rơp ơn tòm ƀlàng bràs ală chi nho rề, chi pơnàng, chi mơñàng mơ chi ôlibe. Añ rơp ơn chi nho tòm ƀlàng ngềt ngơt, chi pơnggŏ bal mơ tòm cha,

²⁰tồ làng bol sền mơ git, sền sơwì mơ wă wơng lah tê Yàng Jehôwa neh lơh bơta hơ̆, Bơtau Sàng Goh Israel dê neh crơng gơs bơta hơ̆.

²¹Yàng Jehôwa đơs lah: “Ràng tơlik tĕ sră tòmyă bol mê dê,” Bơtau Jakôp dê đơs lah: “Cèng tĕ ală jơnau lơh cơng bol mê dê.”

²²Cèng ală rùp ràk bol mê dê tus rềp nàng yal bol hi in ală bơta rơp gơlik tus. Yal tĕ bol he in ală bơta neh gơs bơh lài, nàng bol he in sền sơwì bơh ală bơta hơ̆, mơ git wă ală bơta lồi dut gơ dê, hala yal loh bol hi in ală bơta rơp gơlik gơs.

²³Yal tĕ bol he in bơh ală bơta rơp gơlik gơs tòm ngai tơnơ̆, tồ bol he in git bol mê la ală yàng. Lơh bơta lơi niam hala lơh bơta iơh, tồ bol he in rngòt rngơt mơ kìr.

²⁴Bol mê ngan la ơm gòi ò gơs phan lơi, ală broă lơh bol mê dê jơh ală la ò kwơ lơm; cau lơi sac rwah bol mê hơ̆ la dô nă cau cù kìr.

²⁵Añ neh chồl bơtrut dô nă cau bơh đah đang mơ khai neh tus; bơh đah mattơngai lik khai hòi di sơnđan Añ, khai jă hơđang ală cau kwang at bồ kung be jă ù bŏ, be cau chài mòn glah jă ù kơnàng.

²⁶Ñcau neh yal bơta hơ̆ bơh tŭ sơnròp tồ bol he in rgơi git, hala neh yal lài bơta hơ̆ nàng bol he đơs lah: “Khai đơs di” taih? Mơya ò gơs cau lơi yal, ò gơs cau lơi yal tơnggit, ò gơs dô nă cau lơi neh kơno jơnau bol mê.

²⁷Añ la cau sơnròp neh yal lài Siôn in, mơ Añ ai Jerusalem in dô nă cau kong sồr lòt yal jơnau niam

²⁸Mơya tòm tŭ Añ sền mơ ò gơs dô nă cau lơi; tòm mpồl bol khai ò gơs dô nă cau lơi ai jơnau bơto sơnio, ò gơs dô nă cau lơi ho wơl tòm tŭ Añ lùp.

²⁹Ò di, jơh tơl nă bol khai la blac pơrlồm lơm! Broă lơh bol khai dê la ò kwơ, rùp pac sềr bol khai dê kung be càl khồm gòi.