Read koho Esai 43 Bible Online

Esai 43 - koho bible

Esai 43

¹Mơya tŭ do, Yàng Jehôwa đơs be do: ơ Jakôp! Yàng Jehôwa la Bơtau neh crơng gơs mê! Ơ Israel, Bơtau neh mòn gơs mê, đơs be do: “Bañ rngòt, bơh Añ neh tơwài mê; Añ neh ai sơnđan mê mơ hòi mê; mê gơrê bal mơ Añ.

²Tòm tŭ mê tiă gan ală dà, Añ rơp ơm bal mơ mê; mơ tòm tŭ mê tiă gan ală hiòng, gơ rơp ò tơnkram mê. Tòm tŭ mê lòt gan ồs, mê rơp ò kòl ồs sa, ală lơmpiat ồs rơp ò chu mê.

³Bơh Añ la Jehôwa Yàng Tom Trồ mê dê, Bơtau Sàng Goh Israel dê, Yàng Dong Klàs mê dê. Añ ai Ejiptơ lơh gơs phan tơwài mê, Ethiôpi mơ Seba lơh gơs phan ala mê.

⁴Tài bơh mê la dờng màng mơ di pal jòng ro di đap Añ, mơ tài bơh Añ neh kòñ gơboh di mê, Añ rơp ai ală cau nàng tòmgơl mơ mê, mơ làng bol nàng tòmgơl bơta kis mê dê.

⁵Bañ rngòt, bơh Añ ơm bal mơ mê; Añ rơp cèng kòn sau mê tus bơh đah mattơngai lik, mơ pơjum mê bơh đah mattơngai mut.

⁶Añ rơp đơs mơ đah đang lah: ‘Tơngklàs tĕ!’ mơ đah đơm: ‘Bañ kup bol khai.’ Cèng tĕ ală kòn klau Añ jê bơh tiah ngài, mơ ală kòn ùr Añ jê bơh ală tiah lồi dut plai ù dê,

⁷hơ̆ la kòp nă cau geh tơmoh bơh sơnđan Añ, la ală cau mơ Añ neh crơng gơs bơta gơklŏ Añ in; ală cau Añ neh mòn gơs mơ neh lơh gơs.”

⁸Cèng tơlik tĕ ală cau gơs mat mơya ò gŏ, gơs tồr mơya ò kơno.

⁹Jơh ală lơgar tơrgòm dô bă bal, ală làng bol pơjum tĕ bal! Ñcau tòm bol khai yal lài bơta do, mơ yal tơnggit bol he in ală bơta neh gơlik gơs bơh yau òr taih? Lòi tĕ bol khai cèng tus ală cau lơh cơng bol khai dê nàng dong tò bol khai la di, mơ lòi bol khai in kơno mơ đơs lah: “Hơ̆ la song ngan.”

¹⁰Yàng Jehôwa đơs lah: “Bol mê la ală cau lơh cơng Añ jê, mơ la cau duh broă mơ Añ neh sac rwah, nàng mê in git mơ dòn Añ, mơ git wă lah Añ la Bơtau hơ̆. Ò gơs yàng lơi neh geh crơng mòn lài mơ Añ, tơnơ̆ mơ Añ kung rơp ò gơs.

¹¹Añ, să tòm Añ la Yàng Jehôwa, rlau mơ Añ ò gơs bơtau dong klàs lơi ndai tai.

¹²Añ neh yal tơlik, neh dong klàs, mơ neh yal tơnggit. Hơ̆ la Añ, ò di la dô nă yàng lơgar bơdìh ơm digùl bol mê.” Yàng Jehôwa đơs lah: “Bol mê la cau lơh cơng bơh Añ, mơ Añ la Yàng Tom Trồ!

¹³Ngan, bơh ngai yau òr Añ la Yàng Tom Trồ. Ò gơs cau lơi geh dong klàs bơh tê Añ. Tòm tŭ Añ lơh gơs, ñcau rgơi tòmgơl taih?”

¹⁴Yàng Jehôwa, Bơtau Dong Tơwài bol mê dê, Bơtau Sàng Goh Israel dê đơs be do lah: “Tài bơh bol mê, Añ rơp sồr tus hơ Babilôn, lơh tơrlơm jơh ală mpồng ƀòn dờng dê, mơ ală jơnau driau cau Kalde dê rơp gơlik gơs jơnau ñìm rac.

¹⁵Añ la Yàng Jehôwa, Bơtau Sàng Goh bol mê dê, la Bơtau Crơng Gơs Israel, mơ la Bơtau At Bồ bol mê dê.”

¹⁶Do la jơnau đơs Yàng Jehôwa dê, la Bơtau neh pò dô nơm gùng tòm dàlềng, dô nơm gùng lòt gan ală dà hòr pràn.

¹⁷Bơtau cèng ală rơndeh lòs tòmlơh mơ ală ơseh, mpồl ling tòmlơh mơ mpồl ling khin cha tòmlơh, lơh bol khai gơpừ jơh tềng hơ̆, ò tŭ lơi guh tai, kong tơnroh mơ đơp chơt kung be ồs di brài đèng:

¹⁸Bơtau hơ̆ đơs lah: “Hŭi tĕ ală bơta neh yau, bañ ơm sùm tòm ală ngai neh rlau.

¹⁹Do, Añ mòr lơh dô bơta pa! Tŭ do gơ rơp gơlik gơs mo; bol mê ò đal git ơ? Añ rơp pò dô nơm gùng tòm ƀlàng bràs, mơ pò ală croh dà tòm ƀlàng ngềt ngơt.

²⁰Ală phan poan jơng tòm brê duh rngòt di Añ, so brê bal mơ klàng kò kung behơ̆, tài bơh Añ rcang gơs dà tòm ƀlàng bràs, mơ ală croh dà tòm ƀlàng ngềt ngơt, nàng ai làng bol geh sac rwah Añ jê geh dà hùc.

²¹Hơ̆ la làng bol mơ Añ neh mòn gơs să tòm Añ in nàng bol khai rơp yal tơlik bơta jòng ro Añ.

²²Mơya, ơ Jakôp, mê neh ò hòi dan mơ Añ, Ơ Israel, mê neh kong bòl glar să tòm mê dê Añ in.

²³Mê neh ò cèng belàt lơh gơs phan ơn chu pơrguc Añ in, neh ò ơn phan ơn duh khoai nàng dòn duh Añ. Añ ò lơh kơnjơ̆ kơnjut di mê bơh phan ơn mơ kòi mbo, kung ò tơmbòl mê chu kơlhô.

²⁴Mê neh ò blơi Añ in chi ƀô niam lơi, kung neh ò ơn Añ in dơngi ală phan ơn duh khoai. Mơya mê lơh Añ in kơnjơ̆ bơh tồi glài mê dê, mơ tơmbòl Añ bơh ală bơta tồi glài iơh bơsak mê dê.

²⁵Añ, să tòm Añ la Bơtau jùt sang jơh ală bơta tìs glài mê dê; tài bơh să tòm Añ, Añ ò kah tai ală bơta tồi glài mê dê.

²⁶Yă tĕ Añ; bol he lòt tòmpơrlòng tĕ, tơlik tĕ ală bơta gơrềng tus mơ mê; nàng lơh cơng mê la di.

²⁷Pàng yau sơnròp mê dê neh tìs glài, ală cau yal tơlik jơnau đơs mê dê neh sơrlèt rlau tòmdră wơl mơ Añ.

²⁸Behơ̆ tàng Añ rơp lơh ƀàssìl ală cau lam bồ tòm hìu duh khoai mê dê, Añ rơp phi Jakôp nàng kong tơnroh, mơ Israel nàng kong lah sơrpah.”