Read koho Esai 47 Bible Online

Esai 47 - koho bible

Esai 47

¹Ơ kòn ơruh dềt Babilôn dê, mù tĕ nggui tòm thul ơmul! Ơ kòn ùr cau Kalde, mù nggui tĕ tòm ù, ò gơs sơbàn! Bơh ai rơp ò tai geh sơnđan la lơbơn mơ hàng mơnĕ tai.

²Ai tĕ mpal lŭ gì kơmbuh phe; tă tĕ chèo gòm mat, srŭi tĕ ồi mbơn ai dê, lòi jơng gòi; nàng tiă dà hiòng.

³Bơta ơm kuh ai dê rơp ò geh jơm gòm, bơta ƀàssìl ai dê cau rơp sền gŏ! Añ rơp lơh bơta sal tê, ò pơlai dô nă cau lơi.

⁴Bơtau Dong tơwài bol he dê, Sơnđan Kơnràñ la Yàng Jehôwa Gơnap Gơnoar Dờng Làm Jơh, la Bơtau Sàng Goh Israel dê.

⁵Ơ ală kòn ùr cau Kalde dê, nggui tĕ mŏ mŏ, lòt tĕ tòm tiah klam jơngo! Bơh ai rơp ò geh sơnđan la cau ùr tòm ală lơgar bơtau tai.

⁶Añ neh gơhào gơjrañ di làng bol Añ jê, Añ lơh ƀơ̆ ƀơl sre brê Añ, Añ jào bol khai tòm tê ai dê, mơ ai ò yal tơlik bơta nđàc sơngit, Ai ơn dô nơm yô kơnjơ̆ rlau ir hơđang cau kra krồñ.

⁷Ai neh đơs lah: “Añ rơp la cau ùr tòm gam sùm sùm!” Bơh ai ò ơn nùs kơlôi sơnơng bơh ală bơta hơ̆, hala kah kơlôi bơh bơta lồi dut bol khai dê.

⁸Gen tàng tŭ do iat tĕ bơta do, ơ bol ai la cau kòñ bơta niam nùs; la cau nggui ơm lơngai lơngò, mơ đơs is lah: “Añ do, rlau mơ añ ò gơs cau lơi ndai tai! Añ rơp ò tŭ lơi ơm bơnrau, hala git bơta roh kòn.”

⁹Bàr bơta hơ̆ rơp gơlik tus hơđang ai tòm dô dơ̆ lĕ mơ tòm dô ngai lơm: hơ̆ la cau roh ală kòn mơ ơm bơnrau. Ală bơta hơ̆ rơp gơlik tus wil tơl hơđang ai, bulah ai gơs oă gru bơjơu, mơ jơh ală gơnoar juh proh ai dê!

¹⁰Ai ơm lơngap lơngai tòm bơta iơh bơsak ai dê mơ đơs lah: “Ò gơs cau lơi gŏ añ.” Bơta jak chài mơ bơta git wă ai dê neh lam ai lòt tìs gùng, tòm tŭ ai đơs is tòm nùs lah: “Añ do, rlau mơ añ ò gơs cau lơi ndai tai!”

¹¹Mơya bơta iơh rơp tus mơ ai, mơ ai rơp ò rgơi ting bơtrơh gơ. Dô bơta bòl glar rơp dùh hơđang ai, mơ ai ò geh pleh klàs kơnòm di phan tơwài; dô bơta tơnroh rơp tus hơđang ai nisơna la bơta ai ò git.

¹²Ntào kơ̆ tòm bơta juh proh mơ gru bơjơu ai dê mơ ai neh kong bòl glar bơh tŭ ai gam kơnòm să. Digơlan ai rơp gơlik cồng nha; mơ digơlan ai rơp cèng tus bơta kìr rngòt.

¹³Ai neh glar să bơh ală jơnau jòi lùp! Lòi ală cau sền trồ, sền sơmañ, kơnhai pa hơđang trồ mơ yal lài ală bơta rơp gơlik tus, ñă ntào dong tă ai klàs bơh di ală bơta rơp gơlik tus hơđang ai.

¹⁴Sền ne, bol khai kung be rhe, ồs rơp sa pơrguc bol khai; bol khai ò rgơi dong tă să tòm bol khai dê klàs bơh gơnoar lơmpiat ồs. Hơ̆ ò di la ồs rnga tơnram cau lơi, hơ̆ ò di la ồs nàng nggui rềp.

¹⁵Hơ̆ la jơh ală bơta mơ bol khai lơh bòl glar ai in, mơ lòt kă bro bal bơh tŭ gam kơnòm să. Bol khai jơh tơl nă lòt nrah nring tòm gùng bol khai dê; ò gơs cau lơi dong tă ai ò!