Read koho Esai 49 Bible Online

Esai 49 - koho bible

Esai 49

¹Ơ ală bồt pơlào, iat tĕ añ! Ơ ală làng bol tòm ală lơgar ngài, kơrhia tĕ! Yàng Jehôwa neh hòi añ lài mơ tŭ añ òhềt deh, Kơnràñ neh tơmoh sơnđan añ tòm tŭ añ gam ơm tòm kơndul mè añ jê.

²Kơnràñ neh lơh bơr añ kung be đào sồt; Kơnràñ neh pồn ndơp añ tòm mƀur tê Kơnràñ dê; Kơnràñ neh lơh añ in gơlik kung be kam geh tho àng goh, mơ pồn añ tòm ding kam Kơnràñ dê.

³Kơnràñ đơs mơ añ lah: “Mê la cau duh broă Añ, tòm Israel Añ rơp geh bơta gơklŏ bơh mê.”

⁴Mơya añ neh đơs lah: “Añ neh lơh broă bòl glar ò bồ; añ neh roh pràn kơldang ò kwơ mơ roh lơm. Bulah behơ̆ bơta gơrềng tus di añ ơm tòm tê Yàng Jehôwa dê, mơ phan ƀàn añ jê la bal mơ Yàng Tom Trồ añ jê.”

⁵Tŭ do, Yàng Jehôwa la Bơtau neh mòn gơs añ tòm kơndul mè nàng lơh gơs cau duh broă Kơnràñ dê, tồ lam Jakôp rê wơl hơ Kơnràñ, mơ pơjum tơrgòm Israel wơl hơ Kơnràñ, bơh añ geh kòp la dờng màng di đap mat Yàng Jehôwa, mơ Yàng Tom Trồ añ jê gơlik gơs bơta pràn añ jê.

⁶Kơnràñ đơs lah: “Hơ̆ la dô nơm broă dềt rhền mơ mê geh lơh gơs cau duh broă Añ jê nàng bơtào wơl ală jơi bơtiàn Jakôp dê, mơ cèng brê wơl ală cau Israel gam kis. Añ rơp lơh mê in gơs dô bơta àng ală làng bol in, tồ mê in cèng bơta dong klàs Añ jê tus hơ ală tiah lồi dut plai ù.”

⁷Yàng Jehôwa đơs be do: Bơtau Dong Tơwài Israel dê mơ la Bơtau Sàng Goh Kơnràñ dê, mơ cau kong sền òsơp, kong ƀòn lơgar sền ngkòr ngkàc cù kìr, la dĭ gơna ală cau kwang at bồ, lah: “Ală cau bơtau rơp gŏ mê mơ ñă ntào, ală cau kwang dờng rơp gŏ mơ tơmbic să, tài bơh Yàng Jehôwa la Bơtau dòn song, Bơtau Sàng Goh Israel dê la Bơtau neh sac rwah mê.”

⁸Yàng Jehôwa đơs be do: “Tòm dô tŭ Añ niam nùs, Añ neh ho wơl mê in, mơ tòm ngai dong klàs Añ neh dong kòl mê; Añ rơp sền gàr mê mơ ai mê in be dô bơta ho bal làng bol in, nàng bơt bơtào wơl lơgar, mơ tòmpà pơnah sre brê neh lòi srau gòi gơ dê,

⁹nàng đơs mơ ală cau ơm jàm lah: ‘Lik tĕ,’ mơ đơs mơ ală cau ơm tòm klam jơngo lah: ‘Lòt khat gơboh tĕ!’ Bol khai rơp geh ròng siam di gah ală gùng, mơ geh ƀlàng ñhơt hơđang kòp nơm dòr kơlờl.

¹⁰Bol khai rơp ò jơgloh ò tơhìr, kơnhồl duh tòm ƀlàng bràs hala mattơngai rơp ò àl hơđang bol khai. Bơtau kòñ nđàc di bol khai rơp tề lam bol khai, mơ cèng bol khai tus rềp di croh dà.

¹¹Añ rơp lơh ală mơnơm Añ jê gơlik gùng lòt, mơ ală gùng me Añ jê rơp geh bơt bơtào.

¹²Do, ală cau do rơp tus bơh tiah ngài; cau ƀà rơp tus bơh đah đang, cau ƀà tus bơh đah mattơngai mut, cau ƀà tai tus bơh kơnhwàl Sinim.

¹³Ơ ală tap trồ, driau chò tĕ; Ơ plai ù, hòn chò tĕ; Ơ ală mơnơm, pò bơr đơs chò tĕ! Bơh Yàng Jehôwa pơndòm pơniang làng bol Kơnràñ dê, mơ rơp kòñ nđàc ală cau bòl glar moat jrùng Kơnràñ dê.”

¹⁴Mơya Siôn đơs lah: “Yàng Jehôwa neh sang lòi añ. Yàng Jehôwa neh hŭi añ.”

¹⁵“Dô nă mè rgơi hŭi kòn ơm pô toh khai dê, mơ ò gơs nùs kòñ nđàc di kòn dềt khai neh deh sơl ơ? Bulah digơlan khai hŭi, mơya Añ rơp ò tŭ lơi hŭi mê ò!

¹⁶Do, Añ neh pac mê tòm ală kơndồm tê Añ jê; ală dơrñang mê dê gơ ơm sùm di đap Añ.

¹⁷Ală cau bơt bơtào mê dê lin rlau mơ ală cau lơh tơnroh mê, mơ ală cau neh lơh gơprah mê rơp lik ngài bơh di mê.

¹⁸Mê pò tĕ mat mơ sền gùt dar; bol khai jơh tơl nă pơjum bal mơ tus hơ mê.” Yàng Jehôwa đơs lah: “Di ngan kung be Añ kis, mê rơp ngui jơh ală bol khai kung be ală phan bơka să, mê rơp dòp soh bol khai kung be dô nă ƀan pa.

¹⁹Bulah mê neh gơprah gơpring mơ kòl sang ngềt ngơt, mơ lơgar mê dê gơkòl lòi srau gòi, tŭ do mê rơp gơlik gơs hat hal làng bol mê in, mơ ală cau neh sa loan mê rơp ơm ngài bơh di mê.

²⁰Kòn sau mê neh deh tòm pah ngai ñìm ƀồc mê dê rơp đơs tòm tồr mê lah: ‘Tiah do la hat hal ngan bol hi in; dan ai bơtơl tiah bol hi in nàng kis tềng hơ̆.’

²¹Gen bol mê rơp đơs tòm nùs bol mê dê lah: ‘Ñcau neh tơnggơs añ in ală kòn do taih? Añ neh ñìm ƀồc mơ ơm kơnền; Añ neh kong kup cèng mơ ơm tiah ngài. Ñcau neh ròng siam ală kòn do taih? Añ neh gơkòl sang lòi ơm is dô nă, mơya ală kòn do neh tus bơh lơi taih?’”

²²Yàng Jehôwa At Bồ Hơđang Jơh đơs be do: “Do, Añ rơp pò tê lơh tềl hơđang ală lơgar, Añ rơp bơtào bồng bi Añ jê hơđang ală làng bol; bol khai rơp cèng ală kòn klau bol mê tòm tơwòr tê bol khai dê, mơ mă àñ ală kòn ùr bol mê hơđang pơnì bol khai dê.

²³Ală cau bơtau rơp lơh gơs bèp ròng bol mê dê, ală bơtau ùr bol khai dê rơp lơh gơs mè siam mơ tơmpô bol mê. Bol khai rơp tơmbic să blup mat tòm ù di đap bol mê; bol khai rơp liap kơmbuh ù di jơng bol mê. Gen mê rơp git lah Añ la Yàng Jehôwa; ală cau gơn kơnòm di Añ rơp ò ƀàssìl.

²⁴Rgơi tă ai phan tòmpìt geh bơh di ală cau pràn kơldang sơl? Hala rgơi dong tă ală cau neh gơkòl kup cèng bơh di cau jàñ bơsak sơl ơ?”

²⁵Mơya Yàng Jehôwa đơs be do: “Tian gơs ală cau neh kong kup cèng rơp geh dong tă bơh di ală cau pràn kơldang, mơ ală phan tòmpìt geh rơp geh ai wơl bơh di ală cau jàñ bơsak. Añ rơp tòmdră wơl mơ cau sò tơm mê, mơ să tòm Añ rơp dong tă kòn sau mê dê. Añ rơp tòmlơh mơ ală cau tòmlơh mơ mê, mơ ală kòn sau mê dê rơp geh dong klàs.

²⁶Añ rơp lơh ală cau neh rồn bơklơn bol mê sa is poac tòm bol khai dê; bol khai rơp bơñul is bơh mhàm tòm bol khai dê, kung be bơñul bơh tơrnòm. Gen jơh ală jơi kòn mơnus rơp git lah Añ, Yàng Jehôwa, la Bơtau Dong Klàs mê dê, la Bơtau Dong Tơwài mê dê, hơ̆ la Bơtau Gơnap Gơnoar Dờng Làm Jơh Jakôp dê!”