Read koho Esai 5 Bible Online

Esai 5 - koho bible

Esai 5

¹Añ rơp đơs chò cau añ kòñ gơboh in dô bơta đơs chò bơh suơn ño khai dê: Cau añ kòñ gơboh neh gơs dô nơm suơn ño hơđang dòr ù bơkah tiah lơngồt.

²Khai tò ù mơ tă sang jơh ală lŭ, mơ tam tềng hơ̆ ală tòm ño niam rlau jơh. Khai bơt dô nơm theng kơp gàr tòm hơ̆, mơ tò dô nơm trồm pat ño tòm hơ̆. Gen khai kơp gơn gơlik oă plai ño niam, mơya gơ gơlik plai ño brê.

³“Tŭ do, ơ cau ơm tòm Jerusalem mơ làng bol Juda, cahrña tĕ digùl Añ mơ suơn ño Añ jê.

⁴Ñchi Añ rơp lơh tai suơn ño Añ in mơ Añ ò lơh gơ in taih? Tòm tŭ Añ kơp gơn plai ño niam, ñchi bơh tài gơlik plai ño brê behơ̆ taih?

⁵Tŭ do, Añ rơp yal bol mê in bơta Añ rơp lơh di suơn ño Añ jê: Añ rơp tă sang pơnggàr gơ dê, mơ gơ rơp kong sa loan; Añ rơp sòr tơrlah dơrñang gơ dê, mơ gơ rơp kong jă trơm.

⁶Añ rơp lơh gơ in gơlik gơs tiah srau gòi, gơ rơp ò kòl koh crè, hala ò pŏ lơh lơbơn ù, tòm lò mơ lò mrơt rơp hòn tềng hơ̆. Añ rơp ai jơnau sồr mhwal bañ đùh mìu hơđang gơ.”

⁷Suơn ño Yàng Jehôwa Gơnap Gơnoar Dờng dê, hơ̆ la hìu Israel, mơ làng bol Juda la ală chi tam Kơnràñ kòñ gơboh. Kơnràñ kơp gơn bơta song ngan, mơya neh gŏ bơta lơh gơhòr mhàm; kơp gơn bơta song ring, mơya neh kơno jơnau nggà ñìm jê sồt bòl glar.

⁸Bòl glar bol mê in la cau bơtơl hìu tòm hìu, bơtơl sre tòm sre, jơl tus di tŭ ò gam tiah pah tai, mơ bol mê ơm is dô nă tòm lơgar.

⁹Yàng Jehôwa Gơnap Gơnoar Dờng neh srat să di tồr añ lah: “Ngan gơs oă hìu rơp lòi srau gòi, ală hìu dờng hàng mơnĕ rơp ò gơs cau ơm.

¹⁰Dô nơm suơn ño jơt lồ, mìng pat geh dô thùng tơrnòm ño; dô ôme gar sih; mìng toès geh dô epha kòi.”

¹¹Bòl glar ală cau guh gòñ bơh rìng àng drim nàng ting jat tơrnòm, mơ ơm pơrwài tus mang, gơlik duh trơàl bơh tơrnòm,

¹²Tòm tŭ yò sa dờng, bol khai gơs ală kơñi pĕ, kơñi rơs, sơnggơr dềt, kơwào, mơ tơrnòm; mơya bol khai ò ơn nùs bơh ală broă Yàng Jehôwa dê, ò sền gŏ ală broă tê Kơnràñ lơh.

¹³Behơ̆ tàng, làng bol Añ jê pal kong kup cèng gơs dĭ tài bơh ò gơs bơta git wă, cau dờng ryŭ bol khai dê rơp chơt jơgloh, jơh mpồl làng oă bol bol khai dê rơp chơt tơhìr.

¹⁴Behơ̆ tàng lơgar làng ƀồc sơlo pò ơnàng bơta jơgloh tơhìr gơ dê, mơ ha bơr dờng ngan ò git lơh; ală cau ryŭ ryơm Jerusalem dê mơ làng bol oă mơ jơh ală cau hòn chò tòm khai mù tềng hơ̆.

¹⁵Behơ̆ kòn mơnus rơp kong tơmù; jơh tơl nă rơp kong tơnliah, gar mat cau pơnhừ să rơp kong tơmù.

¹⁶Mơya Yàng Jehôwa Gơnap Gơnoar Dờng rơp geh yò tơngguh bơh bơta song ngan, mơ Yàng Tom Trồ Sàng Goh rơp ràng tơlik să tòm Kơnràñ sàng goh bơh bơta song ring

¹⁷Gen ală belàt rơp sa ñhơt kung be tòm ƀlàng ñhơt tòm gơ dê, ală phan poan jơng lơmă mơ belàt kòn rơp sa digùl ală tiah tơrlah tơrling dê.

¹⁸Bòl glar ală cau in ai bơta ma blac lơh gơs kung be ală che nàng hwài bơta tồi glài mơ bol khai hwài tồi glài kung be hwài rơndeh;

¹⁹Bol khai đơs lah: “Lòi Kơnràñ lơh mhar gơlik gơs broă Kơnràñ dê, mơ lòi Kơnràñ đơs jơnau Kơnràñ dê tồ bol he in gŏ! Lòi bơta lơh nền Bơtau Sàng Goh Israel dê gơlik di ngan tồ bol hi in git!”

²⁰Bòl glar cau lơi in sơnđan bơta iơh la niam, bơta niam la iơh, sền bơta jơngo la àng, bơta àng la jơngo, kòp phan bơtang la lơngồt, phan lơngồt la bơtang!

²¹Bòl glar ală cau lơi in sền is să tòm he la jak chài, gŏ is să tòm he la àng loh!

²²Bòl glar ală cau in geh sơnđan la cau jak ñô tơrnòm, la cau jak khà dùl bơcă ală phan ñô bơñul,

²³la cau sa loă mơ cahrña cau gơs glài la song ring, mơ ò cahrña song ring cau ò gơs glài!

²⁴Gen tàng, kung be lơmpiat ồs sa loan rhe, mơ kung be ñhơt ro kòl pơrguc tòm lơmpiat ồs, gen kung behơ̆ sơl, tòm ryas bol khai dê rơp ồm lề, mơ bơkào bol khai gơ par roh thit kung be thul; tài bơh bol khai neh sang lòi bơta boh lam Yàng Jehôwa Gơnap Gơnoar Dờng dê mơ sền òsơp jơnau đơs Bơtau Sàng Goh Israel dê.

²⁵Tài behơ̆ tàng bơta gơjrañ Yàng Jehôwa dê gơhào khuh tòmdră mơ làng bol Kơnràñ dê; Kơnràñ neh pò tơlik tê sòdră mơ lơh bol khai. Ală mơnơm gơlơnggơr, mơ ală ƀồc cau chơt kung be sù siă tòm ală gùng. Bơh bơta hơ̆, bơta gơjrañ Kơnràñ dê ò pleh ngài, mơ tê Kơnràñ gam pò tơlik.

²⁶Kơnràñ rơp pò tơngguh bồng bi dô nơm làng bol ơm ngài in, Kơnràñ hwac hòi dô nơm làng bol di tiah lồi plai ù. Do, bol khai sơrbac sơrbang tus mhar!

²⁷Ò gơs dô nă lơi tòm bol khai bòl glar hala gơtup pừ, ò gơs dô nă lơi bic guh hala bic lơhă; ò gơs dô nơm che but lơi lơhwang di but, ò gơs dô dang che gơltau jă lơi tac.

²⁸Kam sơna bol khai dê sơmplàñ, jơh àtak bol khai dê neh wàr; kơnđias ơseh bol khai dê kră be lŭ tơrneh, kong rơndeh bol khai dê kung be càl rbut.

²⁹Bol khai ơluh ơhùm be klìu triă, bol khai ơluh ơhùm kung be klìu triă brồ dam, bol khai ơluh ơhùm tòm tŭ kup geh phan mòc mơ cèng lòt, ò gơs dô nă cau lơi rgơi dong tă.

³⁰Tòm ngai hơ̆, bol khai rơp driau dờng tòmdră mơ gơ ò gơkrơi be nggồr dàlềng. Mơ dilah gơs cau sền tòm lơgar, mìng gŏ klam jơngo mơ bòl glar; bulah bơta àng kung rơp gơlik jơngo bơh ală puk mhwal.