Read koho Esai 57 Bible Online

Esai 57 - koho bible

Esai 57

¹Cau song ring chơt roh, ò gơs cau lơi ơn nùs kơlôi tus; Cau dòn duh kong tă tơlik, ò gơs cau lơi git wă lah cau song ring kong tă tơlik klàs bơh di bơta rung rài;

²mơ bol khai mut tòm bơta lơngap lơngai; bol khai la ală cau lòt tòm bơta song ring; bol khai geh rlô bòl hơđang cơnòng bic bol khai dê.

³Mơya bol mê, la ală kòn klau cau ùr gru dê, la jơi bơtiàn ală cau rềs àr bơrnàn mơ ală cau ùr dri dê, tus tĕ hơ do!

⁴Bol mê sền òsơp di ñcau taih? Bol mê hel lơmpiat dơñŏ tơnhial di ñcau taih? Bol mê ò di la jơi bơtiàn cau jak tòmdră, kòn sau ală cau đơs blac ò ơ?

⁵Bol mê tòmbic tòmtir digùl ală tòm cha, mơ hơđơm kòp nơm rlau chi dờng; bol mê chu ală kòn sau bol mê dê lơh gơs phan ơn pơdơng tòm ală thòng mơ hơđơm ală tiah dàng lŭ klềr dê.

⁶Ală rùp ràk digùl ală pơnai lŭ sơngào tòm ală thòng la pơnah bol mê dê, bol gơ la pơnah gơrê mơ bol mê. Ngan, bol mê neh ơn bol gơ in ală phan ơn ñô bal mơ ală phan ơn mơ kòi mbo, gen Añ rơp tơnhuc bơta gơjrañ Añ jê bơh ală bơta do ơ?

⁷Bol mê neh lơh dô nơm mơnơm jơnhoa gơs cơnòng bic bol mê dê: tềng hơ̆ bol mê neh guh nàng ơn ală phan ơn.

⁸Đah ngkòi ală mpồng mơ ală jrong mpồng bol mê dê, bol mê neh ơn ală rùp tềl sơnio bol mê dê. Bơh bol mê sang lòi Añ mơ pò ồi lă hơđang cơnòng bic bol mê dê, bol mê hào hơđang cơnòng hơ̆ mơ pò ơnàng ồi tơ̆; bol mê lơh bơta ho bal mơ ală cau gơs cơnòng mơ bol mê kòñ gơboh, mơ bol mê rmê sền bơta ơm kuh lòi rồ bol khai dê.

⁹Bol mê neh cèng mơñà mơ bơtơl mơñà ƀô bơlhu ơn Molok in. Bol mê neh sồr ală cau kong sồr bol mê dê lòt hơ tiah ngài; tian gơs neh sồr mù tus hơ lơgar làng ƀồc!

¹⁰Bol mê neh bòl glar bơh lòt gùng ngài, mơya bol mê neh ò đơs lah: “Hơ̆ la ò kwơ.” Bol mê neh bàn wơl bơta kơp kòñ bol mê dê, behơ̆ tàng bol mê rơp ò gơkòl lơbơn lơño.

¹¹Bol mê neh rngòt mơ rơm să di ñcau mơ tian gơs bol mê neh đơs blac, mơ ò kah Añ mơ kung ò kơlôi sơnơng bơh bơta hơ̆ taih? Hơ̆ ò di la tài bơh Añ neh ơm mŏ mŏ ñềm mat Añ jê, gen tàng bol mê ò rngòt di Añ?

¹²Añ rơp dòp bơta song ring mơ ală broă lơh bol mê dê, mơ ală bơta hơ̆ rơp ò dong kòl bol mê.

¹³Tòm tŭ bol mê hòi dan, lòi tĕ ală rùp ràk mơ bol mê neh tơrgòm dong tă bol mê! Càl rơp cèng pơrdô jơh ală rùp ràk hơ̆, dô nhơm tă rơp khồm pơrdô bol gơ. Mơya cau lơi kìng crŭ tòm Añ rơp pơrdòn ù, mơ geh mơnơm sàng goh Añ jê lơh gơs sre brê.

¹⁴Mơ rơp gơs jơnau đơs lah: “Bơt tĕ, bơt tĕ, wàs tĕ gùng lòt! Tă sang tĕ ală phan kơryan gùng lòt làng bol Añ jê.”

¹⁵Bơh Bơtau hơđang jòng rlau jơh, la Bơtau ơm tòm tiah gam sùm sùm, Sơnđan Kơnràñ la Bơtau Sàng Goh, đơs be do: “Añ ơm tòm dô bă tiah jơnhoa mơ sàng goh, mơya kung ơm mơ cau gơs nùs jê sồt gơjrañ sang glài mơ pơndêt să, nàng lơh pa wơl hwềng nùs cau pơndêt să, mơ lơh pa wơl nùs cau gơjrañ sang glài.

¹⁶Añ rơp ò kơt glài sùm sùm, kung ò gơhào gơjrañ sùm sùm; bơh ală hwềng soàn rơp bòl glar di đap Añ, bulah hwềng kis mơ Añ neh crơng gơs.

¹⁷Tài bơh bơta hàm hà iơh bơsak bol khai dê Añ neh gơhào gơjrañ; Añ neh pòng lơh bol khai, mơ Añ neh pồn mat tòm tŭ gơjrañ, mơya khai kư̆ lòt tòm ală gùng jat nùs is bol khai dê.

¹⁸Añ neh sền gŏ ală gùng dà bol khai dê, mơya Añ rơp sơmbòi bol khai; Añ rơp tề lam bol khai mơ tơm wơl bol khai in mơ bơta pơndòm pơniang, tơnggơs bơta jòng ro di sơndồi ală cau ñìm ƀồc.

¹⁹Yàng Jehôwa đơs lah: ‘Lơngap lơngai, lơngap lơngai ală cau in ơm ngài mơ ơm rềp, mơ Añ rơp sơmbòi bol khai in.’

²⁰Mơya ală cau iơh bơsak ò gơkrơi kung be dàlềng gơlơnggac, gơ ò rgơi ơm ring lơngai, ală ryà dà gơtơngguh bŏ bil ƀơ̆ ƀơl lơm.”

²¹Yàng Tom Trồ añ jê đơs lah: “Ală cau iơh bơsak ò gơs bơta lơngap lơngai.”