Read koho Esai 66 Bible Online

Esai 66 - koho bible

Esai 66

¹Yàng Jehôwa đơs be do: “Trồ la sơbàn Añ, mơ plai ù la kơrnòl jơng Añ. Bol mê rơp bơt hìu mbe lơi Añ in taih? Mơ tiah ơm rlô bòl Añ jê mbe lơi taih?

²Jơh ală bơta do la bơh tê Añ neh lơh gơs, mơ jơh ală bơta do gơrê mơ Añ.” Yàng Jehôwa đơs behơ̆. “Mơya do la cau mơ Añ sền dờng màng: hơ̆ la cau pơndêt să mơ gơs hwềng nùs jê sồt moat jrùng bơh tồi glài, mơ rơm să rngòt tòm tŭ kơno jơnau đơs Añ jê.

³Mơya cau lơi hàl dô nơm kơnrồ dam gen kung be cau tơnchơt dô nă cau, mơ cau lơi ơn pơdơng dô nơm belàt kòn, gen kung be cau dơrpă ngko dô nơm so; cau lơi ai kòi mbo lơh gơs phan ơn, gen kung be cau ơn mhàm sur, mơ cau lơi chu kơlhô nàng kah kirsơnre, gen kung be cau duh khoai rùp ràk. Bol khai neh sac rwah gùng is bol khai dê, mơ hwềng soàn bol khai dê chò hòp tòm ală bơta tồi glài iơh bơsak bol khai dê.

⁴Behơ̆ Añ kung rơp sac rwah bơta bơrsèl tơnhial bol khai, mơ cèng hơđang bol khai bơta bol khai rngòt rngơt. Tài bơh tòm tŭ Añ neh hòi, ò gơs cau lơi neh ho wơl; Tòm tŭ Añ neh đơs, bol khai ò bài iat. Bol khai lơh bơta iơh di đap mat Añ, mơ sac rwah bơta Añ ò niam nùs.”

⁵Iat tĕ jơnau Yàng Jehôwa dê, Ơ bol mê la cau kơno jơnau Kơnràñ dê mơ rngòt rơm să: “Làng bol bol mê dê gơjrañ di bol mê, mơ sang lòi bol mê tài bơh sơnđan Añ; mơ neh đơs lah: ‘Dan Yàng Jehôwa in geh gơklŏ, nàng bol hi in gŏ bơta hòn chò bol mê dê!’ Mơya bol khai la cau rơp kong ƀàssìl.”

⁶Iat tĕ jơnau nggồr nggàc hơ̆ bơh ƀòn dờng; iat tĕ ntas hơ̆ bơh di hìu duh khoai! Hơ̆ la ntas Yàng Jehôwa dê, Kơnràñ tơm wơl ală cau sò tơm di Kơnràñ jơh ală bơta bol khai pal kong.

⁷Lài mơ tŭ òhềt jê deh, khai neh deh kòn; lài mơ tŭ òhềt tus bơta jê deh, khai neh deh dô nă kòn klau.

⁸Gơs tŭ lơi cau neh kơno bơh dô bơta behơ̆ sơl ơ? Gơs tŭ lơi cau neh gŏ ală bơta ndròm behơ̆ sơl ơ? Dô nơm lơgar rgơi geh deh mìng tòm dô ngai ơ? Hala dô nơm làng bol rgơi geh tơnggơs mìng tòm dô ơthoa sơl ơ? Bulah behơ̆, tòm tŭ Siôn pa jê deh gen gơ neh tơnggơs kòn sau rau.

⁹Yàng Jehôwa đơs lah: “Añ neh lơh hìu kòn gơ pò, mơ Añ ò ai deh kòn sơl ơ? Yàng Jehôwa bol mê dê đơs behơ̆. Añ la cau neh ai gơnoar deh kòn, mơ kơryan hìu kòn ơ?” Yàng Tom Trồ mê dê đơs behơ̆.

¹⁰Hòn chò tĕ mơ Jerusalem, mơ chò hòp tĕ bơh gơ, hòn chò tĕ bơh gơ! Ơ bol mê jơh tơl nă la cau neh ñìm rac pơt wòl bơh Jerusalem, chò hòp dờng tĕ bal mơ gơ.

¹¹Bơh bol mê rơp pô toh mơ geh hòm lai, mơ geh pơndòm pơniang bơh dà toh gơ dê; bol mê rơp hùc hòm ngan mơ chò hòp bơh bơta tơngkah tơngkañ gơ dê.

¹²Bơh Yàng Jehôwa đơs be do: “Añ rơp ai gơ in bơta pas gơs lơngai lơngò tus hơ khai kung be dô nơm hiòng dà, mơ bơta pas sơm ală làng bol dê kung be dà hòr pràn; bol mê rơp geh tơmpô, geh kơnđơt kơnđu tòm tơwòr tê khai dê, mơ rơnggô hơđang gơltang khai dê.

¹³Añ rơp pơndòm pơniang bol mê kung be mè pơndòm pơniang kòn, mơ bol mê rơp geh pơndòm pơniang tòm Jerusalem.

¹⁴Bol mê rơp gŏ ală bơta hơ̆, gen nùs bol mê rơp chò hòp, mơ să jan bol mê rơp hòn dờng kung be ñhơt; tê Yàng Jehôwa rơp yal tơnggit di ală cau duh broă Kơnràñ dê, mơya bơta gơjrañ dờng Kơnràñ dê rơp ràng tơlik ală cau in sò tơm di Kơnràñ.

¹⁵Do, Yàng Jehôwa rơp tus bal mơ ồs, mơ ală rơndeh tòmlơh Kơnràñ dê kung be càl wac brồng; Kơnràñ rơp đùh bơta gơjrañ Kơnràñ dê dô bă rngòt rngơt, mơ bơta lơh glài Kơnràñ dê bơh lơmpiat ồs hơng.

¹⁶Yàng Jehôwa rơp ai ồs lơh gơs bơta cahrña Kơnràñ dê; mơ đào hơđang jơh ală poac să, mơ oă ngan cau rơp kong sreh tơnchơt bơh Yàng Jehôwa.

¹⁷Ală cau ơn is sàng goh mơ lơh sàng goh is să he nàng mut digùl ală suơn, lòt jat dô nă cau ơm digùl ală cau sa poac sur, poac đe, mơ ală phan ƀơ̆ ƀơl cù kìr ndai bol khai rơp chơt bal mơ gơp,” Yàng Jehôwa đơs behơ̆.

¹⁸Bơh Añ git ală broă lơh bol khai dê mơ ală bơta kơlôi sơnơng bol khai dê; Añ rơp tus mơ pơjum tơrgòm jơh ală làng bol mơ ală jơnau đơs; bol khai rơp tus mơ gŏ bơta gơklŏ Añ jê.

¹⁹Añ rơp ơn dô nơm tềl digùl bol khai, mơ Añ rơp sồr dô êt cau tòm mpồl ală cau gam kis lòt tus tòm ală lơgar, hơ̆ la tus hơ Tarsi, Libi, mơ Lidi la làng bol jak pañ sơna, tus hơ Tubal mơ Grek, mơ tus hơ ală bồt pơlào ơm ngài, la tiah òhềt kơno jơnau jòng ro bơh Añ, mơ kung òhềt gŏ bơta gơklŏ Añ jê. Bol khai rơp yal tơlik bơta gơklŏ Añ jê tòm ală lơgar.

²⁰Yàng Jehôwa đơs lah: “Bol khai rơp cèng brê jơh ală gơp bơtiàn bol mê dê, bơh di jơh ală lơgar, hào ơseh, rơndeh tòmlơh, rơndeh pơdiang phan, alàng ơseh, làkđa, tus hơ mơnơm sàng goh Añ jê tòm Jerusalem, lơh gơs dô nơm phan ơn Yàng Jehôwa in. Bol khai rơp cèng bol hơ̆ kung be cau Israel cèng phan ơn mơ kòi mbo tus tòm hìu duh khoai Yàng Jehôwa dê, tòm dô nơm phan ngui sàng goh.”

²¹Yàng Jehôwa đơs lah: “Añ kung rơp sac rwah dô êt nă tòm bol khai nàng lơh gơs cau gơnoar ơn phan duh khoai mơ lơh gơs cau Lebi.”

²²Yàng Jehôwa đơs lah: “Kung be ală tap trồ pa mơ plai ù pa, mơ Añ rơp lơh gơs kư̆ gam sùm di đap Añ, gen sơnđan mơ jơi bơtiàn bol mê dê kung rơp kư̆ gam sùm behơ̆ sơl.”

²³Yàng Jehôwa đơs lah: “Bơh ngai dùl lik do tus di ngai dùl lik tơnơ̆, bơh ngai Saƀat do tus di ngai Saƀat ngkòi, jơh jơi poac să rơp tus mơ cùn khoai di đap Añ.

²⁴Bol khai rơp lik lòt mơ sền gŏ ƀồc chơt ală cau tòmdră mơ Añ; tu rhài bol khai dê rơp ò chơt, ồs bol khai dê kung rơp ò tŭ lơi chơt; mơ bol khai rơp la dô bơta ƀơ̆ ƀơl cù kìr jơh jơi poac să in.”