Read koho Lebi 10 Bible Online

Lebi 10 - koho bible

Lebi 10

¹Ală kòn klau Arôn dê la Nadap mơ Abihu ai gri ơn kơlhô bol khai dê, ơn ồs tòm hơ̆ mơ ơn kơlhô hơđang ồs; bol khai ơn ồs ò geh gơnoar ơn di đap Yàng Jehôwa, gơsơlơ̆u wơl mơ jơnau sồr Kơnràñ dê.

²Behơ̆ gơs ồs gơlik bơh di đap mat Yàng Jehôwa mơ sa pơrguc bol khai, mơ bol khai chơt di đap Yàng Jehôwa.

³Gen Môise đơs mơ Arôn lah: “Do la jơnau Yàng Jehôwa neh đơs bơh bơta hơ̆: Digùl ală cau tus rềp di Añ; Añ rơp yal tơlik să tòm Añ sàng goh, mơ di đap jơh ală làng bol Añ rơp geh jòng ro.” Arôn ơm mŏ mŏ.

⁴Môise hòi Misael mơ Elsaphan, ală kòn klau Usiel la wa Arôn dê, mơ đơs mơ bol khai lah: “Tus tĕ tềng do mơ cèng ƀồc ală oh mi bol mê dê hơ bơdìh sàl ơm, ngài bơh di tiah sàng goh.”

⁵Behơ̆ bol khai tus mơ cèng ƀồc bol hơ̆ gam soh ào dơlam tus hơ đah bơdìh sàl ơm jat be Môise neh sồr.

⁶Gen Môise đơs mơ Arôn bal mơ ală kòn klau khai dê la Eleajar mơ Ithamar lah: “Bañ lòi sŏ bol mê dê ò kèr, mơ bañ crè ồi ào bol mê dê, rngòt bol mê rơp chơt mơ Yàng Jehôwa rơp gơjrañ di jơh mpồl làng bol mòn. Mơya jơh gơp bơtiàn bol mê dê, jơh ală hìu nhă Israel dê rgơi ñìm rac bơh ală cau mơ Yàng Jehôwa neh tơnroh tòm ồs.

⁷Bañ lik bơh di mpồng mut tòm Sàl Tòm Mat rngòt bol mê rơp chơt, tài bơh mơñà bong Yàng Jehôwa dê gơ neh ơm hơđang bol mê.” Behơ̆ bol khai lơh jat be jơnau Môise neh đơs.

⁸Gen Yàng Jehôwa đơs mơ Arôn lah:

⁹“Mê mơ ală kòn klau mê dê bañ ñô tơrnòm hala phan ñô lơi ndai gơs kañ tŭ lơi mut tòm Sàl Tòm Mat, rngòt bol mê rơp chơt. Hơ̆ la dô jơnau sồr gam sùm sùm bơh rài do tus hơ rài ne.

¹⁰Bol mê pal git cah is digùl phan sàng goh mơ phan òs, digùl bơta ò sàng goh mơ bơta sàng goh,

¹¹mơ bol mê pal bơto cau Israel jơh ală bơta sồr lam mơ Yàng Jehôwa neh kơnòm di Môise ai bol khai in.”

¹²Môise đơs mơ Arôn, Eleajar mơ Ithamar la bàr nă kòn klau gam wơl Arôn dê lah: “Ai tĕ phan ơn mơ kơmbuh phe gam tơngkah wơl bơh phan ơn duh khoai ngui ồs pơdơng Yàng Jehôwa in mơ sa tĕ ò bơcă mơ kañ rềp di cơnòng duh khoai, tài bơh la dô nơm phan sàng goh ngan.

¹³Sa tĕ ală phan hơ̆ tòm dô bă tiah sàng goh tài bơh hơ̆ la pơnah mê dê mơ ală kòn klau mê dê bơh di ală phan ơn chu tòm ồs ơn Yàng Jehôwa in, bơh hơ̆ la jơnau añ neh geh sồr.

¹⁴Mơya mê mơ ală kòn klau kòn ùr mê dê rgơi sa piang lă mơ ntơh neh ơn tơyơr bal mơ bơnô neh ơn. Sa tĕ ală phan hơ̆ tòm dô bă tiah neh ơn is sàng goh; ală phan hơ̆ neh geh ai mê mơ ală kòn sau mê in, hơ̆ la pơnah ai bol mê in bơh di ală phan ơn ring lơngai cau Israel dê.

¹⁵Bơnô neh ơn mơ ntơh neh tơyài pal geh cèng tus bal mơ ală pơnah dơngi ală phan ơn chu tòm ồs dê, nàng tơyài di đap Yàng Jehôwa lơh gơs phan ơn tơyài. Hơ̆ rơp la pơnah òs ai mê in mơ ală kòn sau mê in jat be Yàng Jehôwa neh sồr.”

¹⁶Tòm tŭ Môise lùp bơh dô nơm be lơh gơs phan ơn tơwài glài mơ git lah gơ neh chu pơrguc tòm ồs rau gen khai gơjrañ di Eleajar mơ Ithamar la bàr nă kòn klau gam wơl Arôn dê, mơ lùp lah:

¹⁷“Ñchi bơh tài bol mê ò sa phan ơn tơwài glài tòm tiah gơrê bal mơ hìu duh khoai taih? Hơ̆ la phan sàng goh rlau jơh; gơ neh geh ai bol mê in nàng tă sang bơta tồi glài mpồl jơnum dê kơnòm di phan ơn tơwài glài bol khai in di đap Yàng Jehôwa.

¹⁸Tài bơh mhàm gơ dê ò gŏ cèng tus di Tiah Sàng Goh, bol mê pal sa poac behơ̆ tòm tiah gơrê bal mơ hìu duh khoai jat be añ neh sồr.”

¹⁹Arôn ho wơl mơ Môise lah: “Ngai do bol khai ơn phan ơn tơwài glài bol khai in mơ ơn phan ơn chu pơrguc bol khai dê di đap Yàng Jehôwa, mơya bơta hơ̆ neh gơlik gơs di añ. Yàng Jehôwa rơp niam nùs sơl dilah añ neh sa phan ơn tơwài glài tòm ngai do?”

²⁰Tòm tŭ Môise neh kơno jơnau hơ̆ gen khai rài nùs.