Read koho Lebi 11 Bible Online

Lebi 11 - koho bible

Lebi 11

¹Yàng Jehôwa đơs mơ Môise mơ Arôn lah:

²“Đơs tĕ mơ cau Israel: ‘Tòm jơh ală phan poan jơng kis tòm lơgar, do la ală phan mơ bol mê rgơi sa poac gơ:

³Bol mê rgơi sa poac phan poan jơng lơi gơs nđias jơng cah bàr mơ gơ tơrging wơl ñhơt.

⁴Mơya gơs phan poan jơng ƀà mìng tơrging wơl ñhơt hala mìng gơs nđias cah bàr, bol mê ò di sa poac bol gơ: làkđa, bulah gơ tơrging wơl ñhơt mơya gơ ò gơs nđias cah bàr, gơ la ò goh bol mê in.

⁵Pì lŭ, bulah gơ tơrging wơl ñhơt, gơ ò gơs nđias jơng cah bàr, gơ la ò goh bol mê in.

⁶Tơrpài, bulah gơ tơrging wơl ñhơt, gơ ò gơs nđias jơng cah bàr; gơ la ò goh bol mê in.

⁷Mơ sur, bulah gơs nđias jơng cah bàr, gơ ò tơrging wơl; gơ la ò goh bol mê in.

⁸Bol mê ò di sa poac bol gơ hala ƀư di ƀồc chơt gơ dê; bol gơ la ò goh bol mê in.

⁹Bơh tòm jơh ală phan kis neh geh crơng gơs tòm ală dàlềng, ală croh, ală hiòng dê, bol mê rgơi sa phan lơi gơs sơnòr mơ ngkàp,

¹⁰Mơya jơh ală phan kis neh geh crơng gơs tòm ală dàlềng hala tòm ală croh ală hiòng ò gơs sơnòr mơ ngkàp, bulah digùl jơh ală phan re gơs mpồl hala digùl jơh ală phan kis neh geh crơng gơs tòm dà, bol mê pal cù kìr di bol gơ.

¹¹Bol mê pal cù kìr di bol gơ, bol mê bañ sa poac bol gơ mơ bol mê pal cù kìr di ƀồc chơt bol gơ dê.

¹²Phan lơi tòm dà mơ ò gơs sơnòr mơ ngkàp gen pal la cù kìr bol mê in.

¹³Do la ală sềm mơ bol mê pal cù kìr mơ bañ sa poac tài bơh bol gơ la cù kìr: klàng bung, klàng liă; grơt,

¹⁴klàng sah sat; klàng pơrhê, ală jơi klàng jù;

¹⁵ală jơi kơnđà;

¹⁶klàng ngke, iar ềt, klàng bơkào, klàng dàlềng, ală jơi klàng iar,

¹⁷klàng bơku, klàng dềt, klàng dờng,

¹⁸krìng kò, klàng kò; klàng chờng: klàng ƀlàng bràs, klàng ka,

¹⁹klàng kò, ală jơi klàng kò, klàng bồ sùng, mơ rềt.

²⁰Jơh ală tu rhài par mơ pơnđar mơ gơs poan nơm jơng gen la cù kìr bol mê in

²¹Bulah behơ̆, gơs ală phan par mơ pơnđar mơ lòt mơ poan nơm jơng mơ bol mê rgơi sa bol gơ: hơ̆ la ală phan gơs jơng rgơi sơnđoh hơđang ù.

²²Bơh tòm ală phan hơ̆ mê rgơi sa ală jơi srah, srah kòi, lềl hala ală jơi srah nting.

²³Mơya jơh ală phan ndai gơs pơnđar mơ poan nơm jơng gen bol mê pal cù kìr di bol gơ.

²⁴Bol mê rơp lơh să tòm he in gơlik ƀơ̆ ƀơl bơh ală phan hơ̆; cau lơi ƀư di ƀồc chơt ală phan hơ̆ dê gen rơp gơlik ƀơ̆ ƀơl jơl tus di trồ mho.

²⁵Cau lơi tă cèng dô nơm tòm ală ƀồc chơt bol gơ dê gen pal pìh ồi ào he dê, mơ khai rơp gơlik ƀơ̆ ƀơl jơl tus trồ mho.

²⁶Kòp nơm phan poan jơng gơs nđias jơng cah bàr hala ò tơrging wơl ñhơt la ò goh bol mê in; cau lơi ƀư di ƀồc chơt dô nơm tòm ală phan hơ̆ gen rơp gơlik ò goh.

²⁷Bơh di jơh ală phan lòt poan jơng, phan lơi lòt mơ mpàng jơng gơ dê gen la ò goh bol mê in; cau lơi ƀư di ƀồc chơt bol gơ dê gen gơlik ò goh jơl tus di trồ mho.

²⁸Cau lơi tă cèng ƀồc chơt bol gơ dê gen pal pìh ồi ào khai dê, mơ khai rơp gơlik ò goh jơl tus di trồ mho. Bol gơ la ò goh bol mê in.

²⁹Bơh di ală phan poan jơng lòt wañ hơđang ù, do la ală phan ò goh bol mê in: đe cut, đe, ală jơi bơs bơrlak,

³⁰pakke, pang kwai, bơrtùm, ban ba, sưrdưt.

³¹Bơh digùl ală phan lòt wañ hơđang ù, hơ̆ la ală phan ò goh bol mê in. Cau lơi ƀư di ală phan hơ̆ tòm tŭ gơ neh chơt rau rơp gơlik ò goh jơl tus di trồ mho.

³²Tòm tŭ dô nơm tòm ală phan hơ̆ chơt mơ dùh hơđang phan lơi gen phan hơ̆, bulah la phan ngui tòm broă lơi gen kung gơlik gơs ò goh, bulah gơ la phan lơh mơ chi, mơ brài, mơ gơltau hala mơ che dơmài. Ơn tĕ gơtòm dà; jơl tus di trồ mho, gen gơ rơp geh goh.

³³Dilah dô nơm tòm ală phan hơ̆ dùh tòm dô nơm gri mơ ù gen jơh ală phan ơn tòm gơ rơp gơlik gơs ò goh, mơ bol mê pal jan bơcah gri hơ̆.

³⁴Phan sa lơi rgơi sa mơya gơs dà tòm dô nơm gri behơ̆ tơioh hơđang, hala dà lơi tòm gri hơ̆ rgơi hùc rơp gơlik gơs ò goh.

³⁵Phan lơi gơs dô nơm ƀồc chơt bơh di ală phan hơ̆ dùh hơđang gen rơp gơlik gơs ò goh; kung be dô nơm bơnhă ồs hala dô nơm glah gơm phan sa gen pal jan bơcah. Ală phan hơ̆ la ò goh, mơ bol mê pal sền ală phan hơ̆ la ò goh.

³⁶Bulah behơ̆, dô nơm croh dà hala dô nơm tơrlung ơn dà gen gam goh, mơya cau lơi ƀư di dô nơm phan hơ̆ neh chơt gen gơlik gơs ò goh.

³⁷Dilah dô nơm phan hơ̆ chơt dùh hơđang gar sơntìl lơi rơp sih gen gar sơntìl hơ̆ gam goh.

³⁸Mơya, dilah dà neh ơn hơđang gar sơntìl mơ dô nơm phan chơt dùh hơđang gơ gen gơ gơlik ò goh bol mê in.

³⁹Dilah dô nơm phan poan jơng lơi mơ bol mê geh gơnoar sa poac gơ mơ gơ neh chơt gen cau lơi ƀư di phan chơt hơ̆ rơp gơlik gơs ò goh jơl tus di trồ mho.

⁴⁰Cau lơi sa poac chơt ală phan hơ̆ dê gen pal pìh ală ồi ào khai dê, mơ khai rơp gơlik gơs ò goh jơl tus trồ mho. Cau lơi tă cèng dô nơm phan chơt hơ̆ pal pìh ală ồi ào khai dê. Mơ khai rơp gơlik gơs ò goh jơl tus di trồ mho.

⁴¹Kòp nơm phan lơi wìn hơđang ù la cù kìr; ò di sa phan hơ̆.

⁴²Bol mê ò di sa phan lơi tòm ală phan neh geh crơng gơs mơ wìn hơđang ù, bulah gơ wìn mơ kơndul hala lòt mơ jơh poan nơm jơng hala mơ oă jơng; ală phan hơ̆ la cù kìr.

⁴³Bañ lơh ƀơ̆ ƀơl să tòm bol mê dê bơh dô nơm phan lơi tòm ală phan neh geh crơng gơs hơ̆. Bañ lơh să tòm bol mê in gơlik gơs ƀơ̆ ƀơl tài bơh ală phan hơ̆ hala lòi ală phan hơ̆ lơh bol mê in gơlik gơs ò goh.

⁴⁴Añ la Jehôwa Yàng Tom Trồ bol mê dê; ơn is tĕ sàng goh să tòm bol mê dê mơ gơlik gơs tĕ sàng goh, tài bơh Añ la sàng goh. Bañ lơh să tòm bol mê in gơlik gơs ò goh tài bơh dô nơm phan neh geh crơng gơs lơi wìn hơđang ù.

⁴⁵Añ la Yàng Jehôwa, la Bơtau neh cèng bol mê lik bơh di Ejiptơ nàng lơh gơs Yàng Tom Trồ bol mê dê; gen tàng gơlik gơs tĕ sàng goh, tài bơh Añ la sàng goh.

⁴⁶Hơ̆ la ală sơnoa rnoas gơwèt mơ ală phan poan jơng, ală sềm, ală phan kis re tòm dà mơ ală phan neh geh crơng gơs lòt mơ wañ hơđang ù.

⁴⁷Bol mê pal git cah is digùl bơta ò sàng goh mơ bơta sàng goh, digùl ală phan kis neh geh crơng gơs mơ bol mê rgơi sa poac bol gơ dê mơ ală phan mơ bol mê ò di sa poac bol gơ dê.’”