Read koho Lebi 12 Bible Online

Lebi 12 - koho bible

Lebi 12

¹Yàng Jehôwa đơs mơ Môise lah:

²“Đơs tĕ mơ cau Israel lah: ‘Dô nă cau ùr neh bun mơ deh dô nă kòn klau gen rơp gơlik gơs ò goh tòm poh ngai jat bơta sồr lam tòm toh kung be tòm tŭ khai gơlik să kòp kơnhai behơ̆ sơl.

³Tòm ngai phàm kòn klau hơ̆ pal geh siat gơltau.

⁴Lồc behơ̆ cau ùr hơ̆ pal gơn pe jơt pe ngai nàng lơh goh bơh di bơta gơlik să khai dê. Khai ò di ƀư di phan lơi neh ơn is sàng goh hala lòt tus hơ tiah sàng goh jơl tus di ală ngai bơh bơta lơh goh khai dê neh tơl.

⁵Dilah khai deh kòn ùr gen khai rơp gơlik gơs ò goh tòm bàr poh kung be tòm tŭ khai gơlik să kòp kơnhai. Lồc behơ̆ khai pal gơn prau jơt prau ngai tai nàng geh goh bơh di bơta gơlik să khai dê.

⁶Tòm tŭ ală ngai lơh goh khai dê bơh kòn klau hala kòn ùr neh tơl, khai pal cèng tus hơ cau gơnoar ơn phan duh khoai di tiah mut Sàl Tòm Mat dô nơm belàt kòn neh gơs dô nam nàng lơh gơs phan ơn chu pơrguc mơ dô nơm kòn sềm ntòp hui hala dô nơm sềm ntòp nàng lơh gơs phan ơn tơwài glài.

⁷Khai pal ơn ală phan hơ̆ di đap Yàng Jehôwa nàng lơh gơs phan ơn tơwài glài khai in, lồc behơ̆ khai geh goh jat bơta sồr lam duh khoai bơh di bơta gơlik să khai dê. Hơ̆ la ală bơta boh lam bơh dô nă cau ùr deh kòn klau hala kòn ùr.

⁸Dilah khai ò rgơi gơs dô nơm belàt kòn gen khai rgơi cèng tus dô yô kòn sềm ntòp hui, dô nơm lơh gơs phan ơn chu pơrguc mơ dô nơm ne lơh gơs phan ơn tơwài glài; gen cau gơnoar ơn phan duh khoai rơp lơh bơta tơwài glài cau ùr hơ̆ in, mơ khai rơp geh goh.’”