Read koho Lebi 13 Bible Online

Lebi 13 - koho bible

Lebi 13

²“Tòm tŭ cau lơi gơs as hala toh prền hala tềl bò di gơltau khai dê mơ gơ gơlik gơs dun tòm gơltau, gen cau pal lam khai tus hơ Arôn cau gơnoar ơn phan duh khoai hala tus hơ dô nă tòm ală kòn klau khai dê la cau gơnoar ơn phan duh khoai.

³Cau gơnoar ơn phan duh khoai pal sền sơwì tiah sồt di gơltau cau hơ̆ dê, mơ dilah sơnò di tiah sồt neh gơlik gơs kò mơ tềl sồt sền gơlơh be neh gơ sa jrô rlau gơltau gen hơ̆ la dô bơta sồt dun tòm gơltau. Tòm tŭ cau gơnoar ơn phan duh khoai neh sền sơwì khai gen pal yal lah cau hơ̆ la ò goh jat bơta sồr lam duh khoai.

⁴Dilah tiah hơđang gơltau khai dê la bò mơ sền ò gơlơh be neh sa jrô rlau mơ gơltau mơ sơnò tòm tiah hơ̆ ò gơlik kò gen cau gơnoar ơn phan duh khoai pal lòi cau hơ̆ ơm is mìng dô nă khai lơm tòm poh ngai.

⁵Tòm ngai dơ̆ poh, cau gơnoar ơn phan duh khoai pal sền sơwì cau hơ̆, mơ dilah khai gŏ tiah sồt ò tòmgơl mơ neh ò gơ sa rì tòm gơltau gen khai pal lòi cau hơ̆ ơm is mìng dô nă khai tòm poh ngai tai.

⁶Tòm ngai poh, cau gơnoar ơn phan duh khoai pal sền sơwì cau hơ̆ tai, mơ dilah tiah sồt neh gơlik pàl pàl mơ neh ò gơ sa rì tòm gơltau, gen cau gơnoar ơn phan duh khoai pal yal tơlik lah cau hơ̆ la goh; bơta hơ̆ mìng la dô bơta sồt be òs gơ dê lơm. Cau hơ̆ pal pìh ală ồi ào khai dê mơ khai rơp geh goh.

⁷Mơya dilah tiah sồt gơ sa rì tòm gơltau khai dê tơnơ̆ mơ tŭ khai neh tus mơ cau gơnoar ơn phan duh khoai mơ neh geh yal tơlik khai la goh, gen khai pal lòt tus tai di đap cau gơnoar ơn phan duh khoai.

⁸Cau gơnoar ơn phan duh khoai pal sền sơwì cau hơ̆ mơ dilah tiah sồt neh gơ sa rì tòm gơltau, khai pal yal tơlik lah cau hơ̆ la ò goh; bơta hơ̆ la dô bơta kòp dun tòm gơltau.

⁹Tòm tŭ cau lơi gơs tềl dun tòm gơltau gen khai pal geh cèng tus hơ cau gơnoar ơn phan duh khoai.

¹⁰Cau gơnoar ơn phan duh khoai pal sền sơwì cau hơ̆, mơ dilah gơs tiah as bò tòm gơltau lơh sơnò in gơlik kò mơ dilah gơs poac pơrhê tòm tiah as,

¹¹gen hơ̆ la dô bơta sồt tòm gơltau neh jŏ ngai, mơ cau gơnoar ơn phan duh khoai pal yal tơlik lah cau hơ̆ la ò goh. Cau gơnoar ơn phan duh khoai ò càng lòi cau hơ̆ ơm is tai, tài bơh khai neh gơlik gơs ò goh rau.

¹²Dilah bơta sồt jê gơlik tòm làm jơh gơltau khai dê jat be cau gơnoar ơn phan duh khoai neh gŏ, hơ̆ la gơ neh gơlik làm jơh tòm gơltau bơh bồ tus di jơng cau kòp hơ̆ dê,

¹³gen cau gơnoar ơn phan duh khoai pal sền sơwì cau hơ̆, mơ dilah bơta sồt neh gơs làm să cau hơ̆ dê gen khai pal yal tơlik lah cau hơ̆ la goh. Tài bơh bơta sồt neh gơlik gơs bò làm să, khai geh goh.

¹⁴Mơya tòm tŭ poac khai gơs pơrhê, gen khai rơp gơlik ò goh.

¹⁵Tòm tŭ cau gơnoar ơn phan duh khoai gŏ poac pơrhê, khai rơp yal tơlik cau hơ̆ la ò goh. Poac pơrhê la ò goh; cau hơ̆ gơs bơta kòp dun tòm gơltau.

¹⁶Dilah poac pơrhê gơtòmgơl mơ gơlik bò gen khai pal lòt tus hơ cau gơnoar ơn phan duh khoai.

¹⁷Cau gơnoar ơn phan duh khoai pal sền sơwì cau hơ̆, mơ dilah ală tiah sồt neh gơlik bò gen cau gơnoar ơn phan duh khoai rơp yal tơlik cau sồt jê hơ̆ la goh; gen khai geh goh.

¹⁸Tòm tŭ cau lơi gơs dô nơm toh as di gơltau khai dê mơ gơ neh bòi rau,

¹⁹mơ di tiah neh gơs toh as hơ̆ gơlik as bò hala pơrhê dô êt gen khai pal lòt tơlik să tòm khai di đap cau gơnoar ơn phan duh khoai.

²⁰Cau gơnoar ơn phan duh khoai pal sền sơwì tiah hơ̆, mơ dilah tiah hơ̆ sền gơlơh kung be gơ neh sa jrô rlau mơ gơltau mơ sơnò tiah hơ̆ neh gơlik kò, gen cau gơnoar ơn phan duh khoai pal yal tơlik cau hơ̆ la ò goh. Hơ̆ la dô bơta kòp dun tòm gơltau neh gơlik gơs di tiah neh gơs as bơh lài.

²¹Mơya dilah tòm tŭ cau gơnoar ơn phan duh khoai sền sơwì gơ gen ò gŏ sơnò kò tòm hơ̆, mơ gơ ò di jrô rlau mơ gơltau mơ neh gơlik pàl pàl, gen cau gơnoar ơn phan duh khoai pal lòi cau hơ̆ ơm is dô nă khai tòm poh ngai.

²²Dilah gơ sa rì làm tòm gơltau gen cau gơnoar ơn phan duh khoai pal yal tơlik cau hơ̆ la ò goh; hơ̆ la kòp dun tòm gơltau.

²³Mơya dilah tiah hơ̆ ò gơtòmgơl mơ gơ ò sa rì gen gơ mìng la dô nơm tềl lòi wơl bơh dô nơm toh as, mơ cau gơnoar ơn phan duh khoai rơp yal tơlik cau hơ̆ la goh.

²⁴Tòm tŭ cau lơi gơs ồs sa di gơltau lơh gơltau in gơ gơs dà pơrhê hala gơlik bò di poac pơrhê tòm tiah ồs sa,

²⁵gen cau gơnoar ơn phan duh khoai pal sền sơwì tiah hơ̆, mơ dilah sơnò tòm tiah hơ̆ neh gơlik kò, mơ tiah hơ̆ sền gơlơh be jrô rlau mơ gơltau, hơ̆ la dô bơta kòp dun neh gơlik gơs tòm tiah ồs sa. Cau gơnoar ơn phan duh khoai pal yal tơlik lah cau hơ̆ ò goh; hơ̆ la dô bơta sồt dun tòm gơltau.

²⁶Mơya dilah cau gơnoar ơn phan duh khoai neh sền sơwì tiah hơ̆ mơ ò gŏ sơnò kò di tiah hơ̆, mơ dilah tiah hơ̆ ò jrô rlau mơ gơltau mơ neh gơlik pàl pàl, gen cau gơnoar ơn phan duh khoai pal lòi cau hơ̆ ơm is dô nă khai tòm poh ngai.

²⁷Tòm ngai dơ̆ poh, cau gơnoar ơn phan duh khoai pal sền sơwì khai, mơ dilah gơ neh sa rì tòm gơltau gen cau gơnoar ơn phan duh khoai pal yal tơlik khai la ò goh, hơ̆ la dô bơta sồt dun tòm gơltau.

²⁸Bulah behơ̆, dilah tiah hơ̆ ò gơtòmgơl mơ gơ ò sa rề tòm gơltau mơya neh gơlik pàl pàl, hơ̆ la dô bơta as bơh ồs sa, mơ cau gơnoar ơn phan duh khoai pal yal tơlik cau hơ̆ la goh; hơ̆ mìng la dô nơm tềl lòi wơl bơh ồs sa.

²⁹Dilah dô nă cau klau hala dô nă cau ùr gơs dô nơm toh jê hơđang bồ hala di kang,

³⁰gen cau gơnoar ơn phan duh khoai pal sền sơwì toh jê hơ̆, mơ dilah toh hơ̆ gơlơh be jrô rlau mơ gơltau mơ sŏ di tiah hơ̆ gơlik rmit mơ gam mìng dô êt, gen cau gơnoar ơn phan duh khoai pal yal tơlik cau hơ̆ la ò goh; hơ̆ la dô bă tiah toh kiat, la dô bơta sồt dun hơđang bồ hala di kang.

³¹Mơya dilah tòm tŭ cau gơnoar ơn phan duh khoai sền sơwì dô nơm toh behơ̆ mơ sền gơlơh ò di jrô rlau mơ gơltau mơ ò gŏ sơnò jù tòm hơ̆, gen cau gơnoar ơn phan duh khoai pal lòi cau hơ̆ ơm is dô nă khai tòm poh ngai.

³²Tòm ngai dơ̆ poh, cau gơnoar ơn phan duh khoai pal sền sơwì toh as hơ̆ tai, mơ dilah tiah toh kiat hơ̆ ò gơ sa rì mơ ò gơs sơnò rmit tòm hơ̆ mơ sền gơlơh ò jrô rlau mơ gơltau,

³³gen cau hơ̆ pal koah sơnò, lòi mìng tiah neh gơs toh jê, mơ cau gơnoar ơn phan duh khoai pal lòi cau hơ̆ ơm is khai tòm poh ngai tai.

³⁴Tòm ngai dơ̆ poh, cau gơnoar ơn phan duh khoai pal sền sơwì tiah toh kiat hơ̆, mơ dilah gơ ò sa rề tòm gơltau, mơ sền gơlơh be ò jrô rlau mơ gơltau, gen cau gơnoar ơn phan duh khoai pal yal tơlik cau hơ̆ la goh. Khai pal pìh ală ồi ào khai dê, mơ khai rơp geh goh.

³⁵Mơya dilah tiah toh kiat gơ sa rì tòm gơltau tơnơ̆ mơ tŭ khai neh geh yal tơlik la goh,

³⁶gen cau gơnoar ơn phan duh khoai pal sền sơwì cau hơ̆, mơ dilah tiah toh kiat neh sa rì tòm gơltau, cau gơnoar ơn phan duh khoai ò càng jòi gŏ sơnò rmit, cau hơ̆ neh gơlik gơs ò goh rau.

³⁷Bulah behơ̆, dilah jat bơta sền sơwì khai dê gen tiah hơ̆ ò gơtòmgơl, mơ sơnò jù neh hòn tòm tiah hơ̆ gen tiah toh kiat neh bòi. Cau hơ̆ geh goh, mơ cau gơnoar ơn phan duh khoai pal yal tơlik lah cau hơ̆ neh geh goh.

³⁸Tòm tŭ dô nă cau klau hala cau ùr gơs ală tiah bò tòm gơltau,

³⁹gen cau gơnoar ơn phan duh khoai pal sền sơwì ală tiah hơ̆, mơ dilah ală tiah bò hơ̆ la ò bò ngan gen hơ̆ la dô bă tiah kiat gòi lơm, gơ ò sa rì tòm gơltau; cau hơ̆ la goh.

⁴⁰Tòm tŭ dô nă cau gơjrùh sŏ mơ lòl bồ, khai geh goh.

⁴¹Dilah khai jrùh sŏ mơ lòl bồ di đap bìng liang, gen khai geh goh.

⁴²Mơya dilah khai gơs dô bă tiah sồt jê dà pơrhê hơđang bồ lòl khai dê hala di bìng liang khai dê gen hơ̆ la dô bơta sồt dun neh gơlik gơs hơđang bồ khai dê hala hơđang bìng liang khai dê.

⁴³Cau gơnoar ơn phan duh khoai pal sền sơwì cau hơ̆, mơ dilah tiah as sồt hơđang bồ khai dê hala hơđang bìng liang khai dê gơ gơs dà pơrhê kung be sồt dun tòm gơltau,

⁴⁴cau hơ̆ neh gơs dun mơ cau hơ̆ la ò goh. Cau gơnoar ơn phan duh khoai pal yal tơlik khai la ò goh tài bơh tiah sồt hơđang bồ khai dê.

⁴⁵Cau gơs bơta sồt dun behơ̆ pal soh ồi ào crè sèt, lòi bồ gòi, gòm sơnò tềp khai dê mơ driau dờng lah: ‘Ò goh! Ò goh!’

⁴⁶Khai gơkòl ò goh tòm jơh tŭ tơngai khai gơs bơta sồt dun hơ̆. Khai pal ơm is dô nă lơm; khai pal kis đah bơdìh sàl ơm làng bol dê.”

⁴⁷Dilah ồi ào lơi gơtòp bơta but bơsềt, ồi ào mơ sơnò belàt hala mơ che brài dơmài,

⁴⁸ồi ào tàñ mơ che brài dơmài hala mơ sơnò belàt, mơ gơltau hala lơh gơs mơ gơltau,

⁴⁹mơ dilah bơta neh gơtòp di ồi ào, hala di ồi ào lơh gơs mơ gơltau, hala ồi ào tàñ mơ sơnò belàt hala phan lơi lơh gơs mơ gơltau, bơta neh gơtòp hơ̆ la pàl pàl hala pơrhê, hơ̆ la gơ but bơsềt làm jơh mơ pal sơnio cau gơnoar ơn phan duh khoai in sền gŏ.

⁵⁰Cau gơnoar ơn phan duh khoai pal sền sơwì bơta but bơsềt hơ̆ mơ ơn is phan neh but bơsềt hơ̆ tòm poh ngai.

⁵¹Tòm ngai dơ̆ poh khai pal sền sơwì phan hơ̆ tai, mơ dilah bơsềt neh but làm tòm ồi ào, hala tòm phan neh tàñ mơ sơnò belàt hala neh lơh gơs mơ gơltau, bulah ngui tòm broă lơi, phan hơ̆ neh gơlik ò goh.

⁵²Khai pal chu tòm ồs ală ồi ào hala ală phan neh tàñ mơ sơnò belàt hala neh lơh gơs mơ gơltau mơ neh gơtòp bơta hơ̆, tài bơh but bơsềt hơ̆ la phan tơnroh; phan but bơsềt pal chu tòm ồs.

⁵³Mơya, dilah tòm tŭ cau gơnoar ơn phan duh khoai sền sơwì phan hơ̆, bơsềt ò gơ but làm tòm ồi ào, hala tòm phan neh tàñ mơ sơnò belàt hala neh lơh gơs mơ gơltau,

⁵⁴khai pal ai jơnau sồr pìh ală phan neh but bơsềt. Lồc behơ̆ khai pal ơn is phan hơ̆ tòm poh ngai tai.

⁵⁵Tơnơ̆ mơ tŭ phan but bơsềt neh geh pìh rau gen cau gơnoar ơn phan duh khoai rơp sền sơwì gơ, mơ dilah bơsềt ò gơtòmgơl mơ gam sền be lài, bulah gơ ò sa làm, gơ la ò goh. Chu gơtòm ồs, bulah bơsềt neh but dô đah do hala đah ne.

⁵⁶Dilah tòm tŭ cau gơnoar ơn phan duh khoai sền sơwì gơ, bơsềt neh roh tơnơ̆ mơ tŭ phan hơ̆ neh geh pìh, khai pal crè pơnah neh but bơsềt bơh di ồi ào, hala bơh di gơltau, hala bơh di phan tàñ mơ sơnò belàt.

⁵⁷Mơya dilah gơ but tai hơđang ồi ào, hala hơđang phan tàñ mơ sơnò belàt, hala hơđang phan mơ gơltau, gơ sa rì làm jơh, mơ phan lơi gơ but bơsềt gen pal chu gơtòm ồs.

⁵⁸Ồi ào, phan tàñ mơ sơnò belàt, phan ngui mơ gơltau neh pìh tòm dà mơ neh goh jơh bơh di bơsềt, ală phan hơ̆ pal pìh dơ̆ tai gen gơ rơp geh goh.

⁵⁹Hơ̆ la ală bơta boh lam nàng yal tơlik goh hala ò goh gơwèt hơ bơsềt but tòm ală ồi ào, tòm phan tàñ mơ sơnò belàt hala mơ che brài, hala tòm phan ngui lơh gơs mơ gơltau.