Read koho Lebi 18 Bible Online

Lebi 18 - koho bible

Lebi 18

¹Yàng Jehôwa đơs mơ Môise lah:

²“Yal tĕ mơ cau Israel mơ đơs mơ bol khai lah: Añ la Jehôwa Yàng Tom Trồ bol mê dê.

³Bol mê ò di lơh be bol khai lơh tòm Ejiptơ la tiah bol mê neh ơm, mơ bol mê ò di pal lơh be bol khai lơh tòm lơgar Kanaan la tiah Añ cèng bol mê tus. Bañ lơh jat bơta bol khai òs lơh.

⁴Bol mê pal dòn bơr lơh jat ală bơta boh lam Añ jê mơ kơrhia lơh jat ală bơta Añ neh lơh nền. Añ la Jehôwa Yàng Tom Trồ bol mê dê.

⁵Prap gàr tĕ ală bơta lơh nền mơ ală bơta boh lam Añ jê; bơh cau lơi lơh jat ală bơta hơ̆ gen bơh hơ̆ rơp kis. Añ la Yàng Jehôwa.

⁶Bañ gơs dô nă cau lơi tus rềp mơ dô nă cau gơp bơtiàn khai dê mơ bic mơ khai. Añ la Yàng Jehôwa.

⁷Bañ sền òsơp di bèp bol mê dê mơ bic mơ mè bol mê dê. Cau ùr hơ̆ la mè bol mê dê, bañ gơs ală bơta hơ̆ mơ khai.

⁸Bañ bic mơ bau ùr bèp bol mê dê; bơta hơ̆ rơp lơh ƀàssìl bèp bol mê dê.

⁹Bañ bic mơ oh ùr bol mê dê, bulah khai la kòn ùr bèp bol mê dê hala kòn ùr mè bol mê dê, bulah khai neh deh tòm dô nơm hìu bal mơ bol mê hala tòm tiah ndai.

¹⁰Bañ bic mơ kòn ùr deh bơh kòn klau bol mê dê hala kòn ùr deh bơh kòn ùr bol mê dê; bơta hơ̆ lơh bol mê in gơkòl sền òsơp.

¹¹Bañ bic mơ kòn ùr bau ùr bèp bol mê dê, deh bơh bèp bol mê; cau ùr hơ̆ la oh ùr bol mê dê.

¹²Bañ bic mơ oh ùr bèp bol mê dê; cau ùr hơ̆ la gơp bơtiàn rềp mơ bèp bol mê dê.

¹³Bañ bic mơ oh ùr mè bol mê dê, tài bơh cau ùr hơ̆ la gơp bơtiàn rềp mè bol mê dê.

¹⁴Bañ lơh ƀàssìl bi bèp bol mê dê bơh tus rềp di bau ùr khai dê nàng bic; cau ùr hơ̆ la mơi bol mê dê.

¹⁵Bañ bic mơ ƀan bol mê dê. Cau ùr hơ̆ la bau ùr kòn klau bol mê dê; bañ bic mơ khai.

¹⁶Bañ bic mơ bau ùr oh mi bol mê dê; bơta hơ̆ lơh bol mê in gơkòl sền òsơp.

¹⁷Bañ bic mơ dô nă cau ùr bal mơ kòn ùr khai dê. Bañ bau mơ sau kòn klau hala sau kòn ùr khai dê; bol khai la ală cau gơp bơtiàn rềp cau ùr hơ̆ dê. Hơ̆ la tràl sơrbil.

¹⁸Bañ bau mơ oh ùr bau ùr mê dê lơh gơs bau ùr bơrcek ƀoah pơrñat mơ bic mơ khai tòm tŭ bau ùr bol mê dê gam kis.

¹⁹Bañ tus rềp mơ dô nă cau ùr nàng bic mơ khai tòm tŭ khai ò goh bơh gơlơh să.

²⁰Bañ bic mơ bau ùr cau gơp ƀòn bol mê mơ lơh să tòm bol mê dê gơlik ƀơ̆ ƀơl bal mơ khai.

²¹Bañ ai dô nă kòn lơi bol mê dê lơh gơs phan ơn duh khoai Molok in, bơh bol mê ò di lơh ƀơ̆ sơnđan Yàng Tom Trồ bol mê dê. Añ la Yàng Jehôwa.

²²Bañ bic mơ dô nă cau klau kung be cau bic mơ dô nă cau ùr; bơta hơ̆ la ƀơ̆ iơh.

²³Bañ bic mơ dô nơm phan poan jơng mơ lơh să tòm bol mê dê gơlik ƀơ̆ ƀơl mơ gơ. Dô nă cau ùr ò di bic mơ dô nơm phan poan jơng; hơ̆ la dô bơta tồi glài iơh rmơh.

²⁴Bañ lơh să tòm bol mê gơlik ƀơ̆ ƀơl bơh dô nơm broă lơi tòm ală broă hơ̆, tài bơh hơ̆ la bơta neh lơh ală làng bol mơ Añ rơp bơtrơh tơlik bơh di đap bol mê gơlik gơs ƀơ̆ ƀơl.

²⁵Lơgar kung neh gơlik gơs ƀơ̆ ƀơl; behơ̆ Añ lơh glài gơ bơh tồi glài gơ dê, mơ lơgar neh hă làng bol gơ dê.

²⁶Mơya bol mê pal prap gàr ală bơta sồr lam mơ ală bơta boh lam Añ jê. Ală cau deh tòm lơgar mơ ală cau làng bơdìh ơm digùl bol mê ò di pal lơh dô bơta lơi tòm ală bơta ƀơ̆ iơh do,

²⁷bơh làng bol neh ơm tòm lơgar do lài mơ bol mê, neh lơh jơh ală bơta do, mơ lơgar neh gơlik gơs ƀơ̆ ƀơl.

²⁸Mơ dilah bol mê lơh lơgar gơlik gơs ƀơ̆ ƀơl, gơ rơp hă bol mê kung be gơ neh hă ală làng bol neh ơm tòm hơ̆ lài mơ bol mê.

²⁹Kòp nă cau lơi lơh dô bơta lơi tòm ală bơta ƀơ̆ iơh do, ală cau behơ̆ pal kong tă sang bơh di làng bol bol khai dê.

³⁰Prap gàr tĕ ală bơta Añ sồr lơh jat, mơ bañ lơh jat dô bơta lơi tòm ală bơta òs lơh ƀơ̆ iơh cau òs lơh lài mơ tŭ bol mê tus, mơ bañ lơh să tòm bol mê gơlik gơs ƀơ̆ ƀơl mơ bol gơ. Añ la Jehôwa Yàng Tom Trồ bol mê dê.”