Read koho Lebi 19 Bible Online

Lebi 19 - koho bible

Lebi 19

¹Yàng Jehôwa đơs mơ Môise lah:

²“Yal tĕ jơh mpồl jơnum Israel dê mơ đơs mơ bol khai lah: ‘Sàng goh tĕ tài bơh Añ Jehôwa Yàng Tom Trồ bol mê dê, la sàng goh.

³Kòp nă bol mê pal ki ngàm di mè bèp he dê, mơ bol mê pal prap gàr ngai Saƀat Añ jê. Añ la Jehôwa Yàng Tom Trồ bol mê dê.

⁴Bañ wèt hơ ală rùp ràk hala lơh gơs bol mê in ală yàng tŏ mơ màh priă. Añ la Jehôwa Yàng Tom Trồ bol mê dê.

⁵Tòm tŭ bol mê ơn dô nơm phan ơn bơta ring lơngai Yàng Jehôwa in, gen ơn tĕ mbe lơi tồ geh dòp bol mê in.

⁶Pal sa phan ơn hơ̆ tòm ngai bol mê ơn mơ tòm ngai tơnơ̆; phan lơi gam wơl jơl tus di ngai pe gen pal chu pơrguc jơh.

⁷Dilah tus ngai pe mơ gam sa phan hơ̆ gen la ngkòr ngkàc, mơ rơp ò geh dòp.

⁸Cau lơi sa gơ gen pal kong glài he dê tài bơh khai neh lơh ƀơ̆ ƀơl phan neh ơn is sàng goh Yàng Jehôwa in; cau hơ̆ pal kong tă tơlik bơh di làng bol khai dê.

⁹Tòm tŭ bol mê toès kòi tòm lơgar bol mê dê gen bañ toès tus di ală nhàr ƀlàng sre bol mê dê, hala dòñ wơl ală sơnyùr kòi neh rung tòm tŭ toès.

¹⁰Bañ lòt wơl dơ̆ bàr tòm suơn ño bol mê dê nàng dòñ ală plai ño neh rung tòm ù. Lòi tĕ ală plai hơ̆ cau rƀah lơòi mơ ală cau làng bơdìh in. Añ la Jehôwa Yàng Tom Trồ bol mê dê.

¹¹Bañ ntung kơñau. Bañ đơs blac. Bañ pơrlồm bal mơ gơp.

¹²Bañ ai sơnđan Añ nàng srat să blac mơ lơh ƀơ̆ sơnđan Yàng Tom Trồ bol mê dê. Añ la Yàng Jehôwa.

¹³Bañ pơrlồm cau ơm rềp di bol mê hala tòmpìt ai phan khai dê. Bañ prap lòi wơl jền tơngai dô nă cau lơh ơpah dê jơl tus di ngai hìng.

¹⁴Bañ srat rma cau tĭ hala ơn dô nơm phan gơtup jơng di đap cau jơngo, mơya rngòt tĕ di Yàng Tom Trồ bol mê dê. Añ la Yàng Jehôwa.

¹⁵Bañ lơh rkwet rkwe bơta song ring; bañ bơklơn cau rƀah lơòi hala dong tò cau pas sơm, mơya cahrña tĕ song ring cau gơp ƀòn mê in.

¹⁶Bañ bơtào bơta đơs blac digùl làng bol mê dê. Bañ lơh bơta lơi gơlơh iơh di bơta kis cau gơp ƀòn mê dê. Añ la Yàng Jehôwa.

¹⁷Bañ prap tòm nùs bơta gơjrañ kơuềng di oh mi bol mê dê. Ai tĕ nùs song ngan mơ lah pơrhơng cau gơp ƀòn bol mê dê nàng mê rơp ò kong bal mơ khai bơh tồi glài khai dê.

¹⁸Bañ jòi jat bơta sal tê hala prap tòm nùs bơta gơjrañ mañ tòmdră mơ dô nă cau tòm làng bol mê dê, mơya kòñ gơboh tĕ cau gơp ƀòn mê dê be să tòm mê. Añ la Yàng Jehôwa.

¹⁹Prap gàr tĕ ală bơta sồr lam Añ jê. Bañ lòi ală phan poan jơng jơi krơi tòmjă bal. Bañ tam bàr bơta gar sơntìl is tòm dô nơm ƀlàng sre. Bañ soh ồi ào tàñ mơ bàr bơta che brài krơi is.

²⁰Dilah dô nă cau klau bic mơ dô nă cau ùr ơm dĭ neh ho bau mơ dô nă cau klau ndai mơya cau ùr hơ̆ òhềt geh tơwài hala geh hồ toh khat gơboh, gen bơta hơ̆ pal kong lơh glài. Bulah behơ̆ bol khai ò pal kong tơnchơt tài bơh cau ùr hơ̆ òhềt geh hồ toh khat gơboh.

²¹Bulah behơ̆, cau klau hơ̆ pal cèng dô nơm belàt dam tus hơ tiah mut Sàl Tòm Mat dê nàng lơh gơs phan ơn tơwài glài Yàng Jehôwa in.

²²Cau gơnoar ơn phan duh khoai rơp ngui belàt dam hơ̆ lơh gơs phan ơn tơwài glài nàng tơwài glài cau hơ̆ in di đap Yàng Jehôwa bơh tồi glài khai neh tìs, mơ tồi glài khai dê rơp geh toh.

²³Tòm tŭ bol mê mut tòm lơgar mơ tam tòm chi lơi nàng sa plai, gen kòp tĕ plai gơ dê la plai bơkơ̆u. Tòm pe nam bol mê pal kòp plai hơ̆ la plai bơkơ̆u sa; ò di sa gơ.

²⁴Tòm nam dơ̆ poan jơh ală plai gơ dê rơp geh sàng goh, mơ gơlik gơs phan ơn jòng ro Yàng Jehôwa in.

²⁵Mơya tòm nam dơ̆ pram bol mê rgơi sa plai gơ dê. Lơh behơ̆ gen plai đo bol mê dê rơp geh gơbơtơl oă. Añ la Jehôwa Yàng Tom Trồ bol mê dê.

²⁶Bañ sa poac lơi gam gơs mhàm tòm gơ. Bañ lơh jat bơta sền dà mơ juh proh.

²⁷Bañ koh sŏ di bàr đah bìng liang bol mê dê hala koh cồng sơnò tềp bol mê dê.

²⁸Bañ koah să jan bol mê dê bơh cau neh chơt hala cih rùp di să jan bol mê dê. Añ la Yàng Jehôwa.

²⁹Bañ lơh ƀơ̆ iơh di kòn ùr bol mê dê bơh lơh khai in gơlik gơs ùr dri, hala lơh lơgar in gơlik gơs dri tơlàr mơ bềng lìu bơta gơlềng gơlàng.

³⁰Prap gàr ală ngai Saƀat Añ jê mơ ki ngàm tĕ di Hìu sàng goh Añ jê. Añ la Yàng Jehôwa.

³¹Bañ wèt hơ ală cau gru bơjơu hala jòi jat ală cau juh proh bơh bol mê rơp gơlik ƀơ̆ ƀơl bơh bol khai. Añ la Jehôwa Yàng Tom Trồ bol mê dê.

³²Ñă ntào tĕ di đap mat cau jòng sơnam, ki ngàm tĕ di ală cau kra mơ duh rngòt tĕ di Yàng Tom Trồ. Añ la Yàng Jehôwa.

³³Tòm tŭ cau làng bơdìh ơm bal mơ bol mê tòm lơgar, bañ lơh iơh di khai.

³⁴Pal gơwèt hơ cau làng bơdìh ơm bal mơ bol mê kung be dô nă tòm ală cau làng tòm. Kòñ gơboh di khai kung be să tòm bol mê dê, bơh mê bơh lài la cau làng bơdìh ơm tòm Ejiptơ. Añ la Jehôwa Yàng Tom Trồ bol mê dê.

³⁵Bol mê bañ sa kơrlơm tòm ală phan sơnoa rnoas nàng was, kơr hala kòp.

³⁶Bol mê pal gơs ală phan kơr mơ phan was tòm toh sơnoa rnoas, ngui epha mơ hin song ngan, Añ la Jehôwa Yàng Tom Trồ bol mê dê neh cèng bol mê lik bơh di Ejiptơ.

³⁷Prap gàr tĕ jơh ală bơta sồr lam mơ ală bơta boh lam Añ jê mơ lơh jat ală bơta hơ̆. Añ la Yàng Jehôwa.’”