Read koho Lebi 2 Bible Online

Lebi 2 - koho bible

Lebi 2

¹Tòm tŭ gơs cau lơi cèng ơn Yàng Jehôwa in dô nơm phan ơn mơ kòi mbo, gen phan ơn khai dê pal geh sac la kơmbuh phe rhền. Khai pal tuh mơñà hơđang gơ, ơn kơlhô hơđang gơ.

²Mơ cèng gơ tus hơ ală kòn klau Arôn dê la ală cau gơnoar ơn phan duh khoai. Cau gơnoar ơn phan duh khoai ai dô sơmbat kơmbuh phe mơ mơñà bal mơ jơh kơlhô mơ chu phan hơ̆ lơh gơs dô pơnah lòi kirsơnre hơđang cơnòng duh khoai, dô nơm phan ơn chu mơ ồs. Hơ̆ la dô nơm phan ƀô bơlhu niam nùs Yàng Tom Trồ.

³Pơnah gam wơl bơh phan ơn mơ kòi mbo hơ̆ gơrê bal mơ Arôn mơ ală kòn klau khai dê; hơ̆ la pơnah sàng goh rlau jơh tòm phan ơn chu mơ ồs ơn Yàng Jehôwa in.

⁴Dilah bol mê cèng ơn dô nơm phan ơn mơ kòi mbo buh tòm bơnhă ồs gen gơ pal lơh gơs bơh kơmbuh phe rhền mơ lơh gơs ală piang lă ò gơs kañ bơcă bal mơ mơñà, hala ală piang lă ò gơs kañ gơs mơñà tuh hơđang gơ.

⁵Dilah phan ơn mơ kòi mbo bol mê dê neh rcang hơđang dô nơm phan ngui nàng buh gen phan ơn hơ̆ pal lơh mơ kơmbuh phe rhền bơcă bal mơ mơñà, mơ ò gơs kañ.

⁶Dơrkă piang lă hơ̆ dô pet, dô pet mơ tuh mơñà hơđang gơ; hơ̆ la dô nơm phan ơn mơ kòi mbo.

⁷Dilah phan ơn mơ kòi mbo bol mê dê la phan neh rcang gơm tòm glah, gơ pal lơh gơs mơ kơmbuh phe rhền mơ mơñà.

⁸Cèng tĕ phan ơn mơ kòi mbo lơh gơs bơh ală phan hơ̆ nàng ơn Yàng Jehôwa in; cèng tĕ hơ cau gơnoar ơn phan duh khoai mơ khai rơp cèng tus hơ cơnòng duh khoai.

⁹Cau gơnoar ơn phan duh khoai rơp tă dô pơnah lòi kah kirsơnre bơh di phan ơn nàng ơn Yàng Jehôwa in, mơ chu gơ hơđang cơnòng duh khoai lơh gơs dô nơm phan ơn chu mơ ồs, gơs ƀô bơlhu niam nùs Yàng Jehôwa.

¹⁰Pơnah gam wơl phan ơn mơ kòi mbo dê gơrê bal mơ Arôn mơ ală kòn klau khai dê, hơ̆ la pơnah sàng goh rlau jơh tòm phan ơn chu mơ ồs ơn Yàng Jehôwa in.

¹¹Kòp nơm phan ơn mơ kòi mbo mơ bol mê cèng ơn Yàng Jehôwa in pal la phan ơn ò gơs kañ, bơh bol mê ò di chu kañ hala dà lơwe tòm dô nơm phan ơn chu mơ ồs ơn Yàng Jehôwa in.

¹²Bol mê rgơi cèng ală phan hơ̆ tus hơ Yàng Jehôwa lơh gơs phan ơn plai bồ sơnam, mơya ală phan hơ̆ ò di ơn hơđang cơnòng duh khoai lơh gơs phan ơn pơdơng ƀô bơlhu.

¹³Tĕ bơtơl boh di jơh ală phan ơn mơ kòi mbo bol mê dê. Tài bơh boh la tềl sơnio bơta ho bal digùl Yàng Tom Trồ mơ bol mê. Bol mê pal ơn tĕ boh di jơh ală phan ơn bol mê dê.

¹⁴Dilah bol mê cèng dô nơm phan ơn mơ kòi mbo la plai bồ sơnam bol mê dê ơn Yàng Jehôwa in gen pal piah kòi pa mơ ceh gơtòm ồs lơh gơs kơmbuh.

¹⁵Ơn tĕ mơñà mơ kơlhô hơđang gơ; hơ̆ la dô nơm phan ơn mơ kòi mbo.

¹⁶Cau gơnoar ơn phan duh khoai rơp chu pơnah kòi neh piah mơ mơñà, bal mơ jơh kơlhô, lơh gơs dô nơm phan ơn chu mơ ồs ơn Yàng Jehôwa in.