Read koho Lebi 20 Bible Online

Lebi 20 - koho bible

Lebi 20

¹Yàng Jehôwa đơs mơ Môise lah:

²“Đơs tĕ mơ cau Israel lah: ‘Cau Israel hala cau làng bơdìh lơi ơm tòm Israel ai kòn lơi tòm ală kòn khai dê Molok in gen cau hơ̆ pal kong tơnchơt. Làng bol tòm lơgar pal cơm lŭ tơnchơt khai.

³Añ rơp wèt mat tòmdră mơ cau hơ̆ mơ rơp tă sang khai bơh di làng bol khai dê; bơh bơta ai kòn sau khai dê Molok in, khai neh lơh ƀơ̆ ƀơl tiah sàng goh Añ jê mơ lơh ƀơ̆ iơh di sơnđan sàng goh Añ jê.

⁴Dilah làng bol tòm mpồl jơnum ñềm mat bol khai dê tòm tŭ gơs cau ai dô nă tòm ală kòn sau khai dê Molok in mơ bol khai ò tơnchơt cau hơ̆,

⁵gen Añ rơp wèt mat tòmdră mơ cau hơ̆ mơ hìu nhă khai dê, mơ tă sang khai mơ jơh ală cau jat khai bơh di làng bol bol khai dê, tài bơh să tòm bol khai tìs glài rềs àr bơrnàn mơ Molok.

⁶Añ rơp wèt mat tòmdră mơ cau jòi jat ală cau gru bơjơu mơ ală cau juh proh mơ să tòm bol khai rềs àr mơ bol hơ̆, mơ Añ rơp tă sang bol khai bơh di làng bol khai dê.

⁷Ơn is tĕ sàng goh să tòm bol mê dê tài bơh Añ la Jehôwa Yàng Tom Trồ bol mê dê.

⁸Prap gàr tĕ ală bơta sồr lam Añ jê mơ lòt jat ală bơta hơ̆. Añ la Jehôwa Yàng Tom Trồ la Bơtau lơh bol mê in gơs sàng goh.

⁹Dilah cau lơi srat rma bèp hala mè khai dê gen cau hơ̆ pal kong tơnchơt. Khai neh srat rma bèp khai dê hala mè khai dê, mhàm khai rơp tuh wơl hơđang bồ să tòm khai dê.

¹⁰Dilah cau lơi tìs glài rềs àr bơrnàn mơ bau ùr dô nă cau ndai, mơ bau ùr cau ơm rềp mơ khai gen jơh bàr nă cau klau mơ cau ùr rềs àr bơrnàn hơ̆ pal kong tơnchơt.

¹¹Dilah dô nă cau bic mơ bau ùr bèp khai dê, khai neh lơh ƀàssìl di bèp khai. Jơh bàr nă cau klau mơ cau ùr pal kong tơnchơt; mhàm bol khai rơp tuh wơl hơđang bồ să tòm bol khai dê.

¹²Dilah dô nă cau bic mơ ƀan khai dê, gen bàr nă bol khai pal kong tơnchơt. Bơta bol khai neh lơh la dô bơta tồi glài iơh rmơh, mhàm bol khai rơp tuh wơl hơđang bồ să tòm bol khai dê.

¹³Dilah dô nă cau klau bic mơ dô nă cau klau kung be dô nă cau klau bic mơ dô nă cau ùr, gen glài khai rơp tuh wơl hơđang bồ să tòm bol khai dê.

¹⁴Dilah dô nă cau klau bau mơ jơh bàr nă cau ùr bal mơ mè cau ùr hơ̆ dê, hơ̆ la dô bơta iơh bơsak. Jơh pe nă cau hơ̆ pal kong chu tòm ồs tồ ò gơs bơta iơh bơsak ơm digùl bol mê.

¹⁵Dilah dô nă cau bic mơ dô nơm phan poan jơng, khai pal kong tơnchơt, mơ bol mê pal sreh tơnchơt phan poan jơng hơ̆.

¹⁶Dilah dô nă cau ùr tus rềp di dô nơm phan poan jơng nàng bic mơ gơ, tơnchơt tĕ cau ùr bal mơ phan poan jơng hơ̆. Khai mơ gơ pal kong tơnchơt; mhàm khai mơ mhàm gơ rơp tuh wơl hơđang bồ khai mơ hơđang bồ gơ dê.

¹⁷Dilah dô nă cau klau bau mơ oh ùr khai dê, la kòn ùr bèp khai dê hala kòn ùr mè khai dê, hơ̆ la dô bơta ƀàssìl ƀàsso. Bol khai pal kong tă sang bơh di làng bol bol khai dê. Cau klau hơ̆ neh lơh ƀàssìl ƀàsso oh ùr khai dê, mơ pal kong bơta lơh glài.

¹⁸Dilah dô nă cau klau bic mơ dô nă cau ùr tòm tŭ cau ùr hơ̆ gơs gơlik să khai dê, cau klau hơ̆ neh ràng tơlik bơta gơlik mhàm cau ùr hơ̆ dê, mơ cau ùr hơ̆ kung neh ràng tơlik bơta hơ̆. Bàr nă bol khai pal kong tă sang bơh di làng bol bol khai dê.

¹⁹Bañ bic mơ oh ùr mè hala bèp bol mê dê bơh bơta hơ̆ lơh ƀàssìl dô nă gơp bơtiàn rềp he dê; bàr nă bol hơ̆ rơp kong bơta lơh glài.

²⁰Dilah dô nă cau klau bic mơ bau kồñ wa khai dê, khai neh lơh ƀàssìl di kồñ wa khai. Bol khai pal kong lơh glài; bol khai rơp chơt ò gơs kòn.

²¹Dilah dô nă cau klau bau mơ bau ùr bi khai dê, hơ̆ la dô nơm broă lơh ò goh; khai neh lơh bơta ƀàssìl di bi khai. Bol khai rơp ò gơs kòn.

²²Prap gàr tĕ jơh ală bơta sồr lam Añ jê mơ lơh jat ală bơta hơ̆, tồ lơgar mơ Añ neh cèng bol mê tus nàng ơm rơp ò hă bol mê.

²³Bol mê ò di kis jat ală bơta òs yau ală làng bol mơ Añ rơp ting bơtrơh bơh di đap bol mê. Tài bơh bol khai neh lơh jơh ală bơta hơ̆, gen tàng Añ cù kìr di bol khai.

²⁴Mơya Añ đơs mơ bol mê lah: “Bol mê rơp dòp geh lơgar bol khai dê; Añ rơp ai gơ bol mê in lơh gơs sre brê, dô nơm lơgar bềng lìu dà toh mơ dà lơwe.” Añ la Jehôwa Yàng Tom Trồ bol mê dê, la Bơtau neh cah is bol mê bơh di ală làng bol.

²⁵Gen tàng bol mê pal git cah is ală phan poan jơng goh mơ ò goh, mơ ală sềm goh mơ ò goh. Bañ lơh ƀơ̆ ƀơl să tòm bol mê dê bơh phan poan jơng lơi hala sềm lơi hala phan lơi kis hơđang ù, ală phan mơ Añ neh cah is la ò goh bol mê in.

²⁶Bol mê pal la sàng goh Añ in, tài bơh Añ, Yàng Jehôwa, la sàng goh, mơ Añ neh cah is bol mê bơh di ală làng bol nàng bol mê gơrê is bal mơ Añ.

²⁷Dô nă cau klau hala cau ùr sền dà hala juh proh digùl bol mê gen pal kong tơnchơt. Bol mê pal cơm lŭ tơnchơt bol khai; mhàm bol khai rơp gơtuh wơl hơđang bồ să tòm bol khai dê.’”