Read koho Lebi 22 Bible Online

Lebi 22 - koho bible

Lebi 22

¹Yàng Jehôwa đơs mơ Môise lah:

²“Yal tĕ Arôn mơ ală kòn klau khai in pal ki ngàm di ală phan ơn sàng goh mơ cau Israel ơn Añ in, nàng bol khai rơp ò lơh ƀơ̆ sơnđan sàng goh Añ jê. Añ la Yàng Jehôwa.

³Đơs tĕ mơ bol khai lah: ‘Bơh ală rài rơp tus, dilah cau lơi tòm kòn sau mê dê gơlik ò goh mơ cau hơ̆ tus rềp di ală phan ơn sàng goh mơ cau Israel ơn Yàng Jehôwa in, gen cau hơ̆ pal kong tă sang bơh di đap mat Añ. Añ la Yàng Jehôwa.

⁴Dilah dô nă kòn sau Arôn gơs toh sa rì tòm gơltau hala gơs ală bơta hòr lik bơh di să jan gen khai ò rgơi sa ală phan ơn sàng goh jơl tus di tŭ khai geh goh. Khai kung rơp kòl ò goh dilah khai ƀư di phan lơi neh ò goh tài bơh dô nơm ƀồc chơt hala tài bơh dô nă cau lơi gơlik kung be tòm tŭ bic mơ cau ùr,

⁵hala dilah khai ƀư di dô nơm tu rhài lơi lơh khai in gơlik ò goh, hala cau lơi ndai lơh khai in gơlik ò goh, hala bơta ò goh lơi ndai tai.

⁶Dô nă cau neh ƀư di phan lơi tòm ală phan behơ̆ rơp kòl ò goh jơl tus di trồ mho. Khai ò di sa phan ơn sàng goh lơi, mìng tòm tŭ khai neh um să khai tòm dà.

⁷Tòm tŭ mattơngai mut, khai rơp geh goh, mơ tơnơ̆ mơ hơ̆ khai rgơi sa ală phan ơn sàng goh, bơh ală phan hơ̆ la phan sa khai dê.

⁸Khai ò di sa phan lơi neh chơt hala bơh ală phan poan jơng tòm brê crè poac, nàng gơlik gơs ò goh bơh gơ. Añ la Yàng Jehôwa.

⁹Bol khai pal prap gàr ală jơnau Añ sồr, tồ bol khai ò gơkòl tìs glài mơ chơt bơh neh sền òsơp di ală phan sàng goh hơ̆. Añ la Yàng Jehôwa, la Bơtau lơh bol khai in gơs sàng goh.

¹⁰Ò gơs cau lơi bơdìh hìu nhă cau gơnoar ơn phan duh khoai dê geh sa phan ơn duh khoai sàng goh. Cau nac dô nă cau gơnoar ơn phan duh khoai dê hala cau khai ơpah lơh broă kung ò geh sa phan hơ̆ sơl.

¹¹Mơya dilah cau gơnoar ơn phan duh khoai ngui jền blơi dô nă cau dĭ, hala dilah dô nă cau dĭ neh deh tòm hìu nhă khai dê gen cau dĭ hơ̆ geh sa phan sa khai dê.

¹²Dilah dô nă kòn ùr cau gơnoar ơn phan duh khoai bau mơ cau lơi ndai ò di la cau gơnoar ơn phan duh khoai, khai ò di sa phan dô êt lơi tòm ală phan ơn sàng goh.

¹³Mơya dilah dô nă kòn ùr cau gơnoar ơn phan duh khoai dê gơlik gơs ùr bơnrau hala neh gơkòl bau klau sang lòi, khai ò gơs kòn mơ khai neh rê wơl ơm tòm hìu bèp khai dê kung be tòm tŭ khai gam ơruh, khai geh sa tòm phan sa bèp khai dê. Bulah behơ̆, ală cau ò geh gơnoar sa phan hơ̆ gen bañ sa dô êt lơi tòm hơ̆.

¹⁴Dilah cau lơi neh rlau sa dô nơm phan ơn sàng goh, khai pal tơm wơl cau gơnoar ơn phan duh khoai in phan ơn khai neh sa hơ̆, mơ bơtơl dô pơnah pram bơta kas màng phan ơn hơ̆ dê.

¹⁵Ală cau gơnoar ơn phan duh khoai ò di lơh ò goh ală phan ơn mơ cau Israel ơn Yàng Jehôwa in,

¹⁶bơh sa ală phan ơn sàng goh neh lơh bol khai in gơkòl glài mơ pal tơm wơl ală phan hơ̆. Añ la Yàng Jehôwa, la Bơtau lơh bol khai in gơs sàng goh.’”

¹⁷Yàng Jehôwa đơs mơ Môise lah:

¹⁸“Yal tĕ mơ Arôn mơ ală kòn klau khai dê bal mơ jơh ală cau Israel mơ đơs lah: ‘Dilah cau lơi tòm bol mê, bulah la cau Israel hala cau làng bơdìh ơm tòm Israel, ơn dô nơm phan ơn lơh gơs phan chu pơrguc Yàng Jehôwa in nàng lơh gơlik wil tơl dô jơnau neh srat să tòmho hala lơh gơs dô nơm phan ơn jat nùs kòñ,

¹⁹gen bol mê pal ơn dô nơm phan poan jơng dam ò gơs tềl sồt tòm mpồl gơ dê, belàt hala be nàng gơ rgơi geh dòp ala bol mê in.

²⁰Bañ cèng dô nơm phan lơi gơs tềl sồt tài bơh gơ rơp ò geh dòp ală bol mê in.

²¹Tòm tŭ cau lơi cèng kơnrồ hala belàt bơh di mpồl gơ dê nàng lơh gơs dô nơm phan ơn ring lơngai Yàng Jehôwa in nàng lơh gơlik wil tơl dô jơnau srat să ho nền dờng màng lơi hala ơn lơh gơs dô nơm phan ơn jat nùs kòñ, phan ơn hơ̆ pal la phan wil tơl, ò sồt rmàñ sồng geh dòp.

²²Bañ ơn Yàng Jehôwa in dô nơm phan poan jơng jơngo mat, pă jơng, gơkòl gơcrè poac hala sồt jê, hala ală bơta ndai kung be toh sa mồr tòm gơltau. Bañ ơn phan lơi behơ̆ hơđang cơnòng duh khoai lơh gơs phan ơn chu tòm ồs Yàng Jehôwa in.

²³Bulah behơ̆, bol mê rgơi ơn dô nơm kơnrồ hala dô nơm belàt pă hala gơs să jan ò niam lơh gơs phan ơn jat nùs kòñ, mơya gơ rơp ò geh dòp lơh gơs phan ơn geh gơlik gơs wil tơl jơnau srat să ho nền.

²⁴Bol mê pal kơrhia bañ ơn Yàng Jehôwa in dô nơm phan poan jơng gơs tơrklào neh bơcah, sồt hala neh koh. Tê tòm bol mê dê bañ lơh bơta hơ̆,

²⁵mơ bol mê bañ dòp ală phan poan jơng behơ̆ bơh di tê dô nă cau làng bơdìh nàng ơn ală phan hơ̆ lơh gơs phan sa Yàng Tom Trồ bol mê dê. Ală phan hơ̆ ò geh dòp bol mê in, tài bơh gơ ò wil tơl mơ sồt rmàñ.’”

²⁶Yàng Jehôwa đơs mơ Môise lah:

²⁷“Tòm tŭ dô nơm kơnrồ kòn, dô nơm belàt hala dô nơm be pa deh gen gơ pal ơm mơ mè gơtòm poh ngai. Tơnơ̆ mơ ngai phàm gen gơ rơp geh dòp lơh gơs phan ơn chu tòm ồs ơn Yàng Jehôwa in.

²⁸Bañ hàl dô nơm kơnrồ hala dô nơm belàt tòm dô ngai bal mơ kòn pa deh gơ dê.

²⁹Tòm tŭ bol mê ơn dô nơm phan ơn ưnngài Yàng Jehôwa in, ơn tĕ mbe lơi nàng geh dòp bol mê in.

³⁰Pal sa phan hơ̆ tòm ngai ơn gơ; bañ lòi gam wơl pơnah lơi bơh phan ơn hơ̆ jơl tus diàng drim hìng. Añ la Yàng Jehôwa.

³¹Prap gàr tĕ ală bơta sồr lam Añ jê mơ lòt jat ală bơta hơ̆. Añ la Yàng Jehôwa.

³²Bañ lơh ƀơ̆ ƀơl sơnđan sàng goh Añ jê. Cau Israel pal đal git Añ la Bơtau sàng goh. Añ la Yàng Jehôwa,

³³la Bơtau lơh bol mê in gơs sàng goh, mơ la Bơtau neh cèng bol mê lik klàs bơh di Ejiptơ nàng lơh gơs Yàng Tom Trồ bol mê dê. Añ la Yàng Jehôwa.”