Read koho Lebi 23 Bible Online

Lebi 23 - koho bible

Lebi 23

¹Yàng Jehôwa đơs mơ Môise lah:

²“Yal tĕ cau Israel in mơ đơs tĕ mơ bol khai lah: ‘Do la ală ngai wèr neh bơtào gơs Yàng Jehôwa dê, mơ mê pal yal tơnggit be ală bơta pơjum sàng goh.

³Gơs prau ngai nàng bol mê lơh broă, mơya ngai poh la dô ngai Saƀat nàng rlô, dô ngai pơjum sàng goh. Bol mê bañ lơh broă lơi; bulah bol mê ơm tiah lơi, hơ̆ la ngai Saƀat Yàng Jehôwa in.

⁴Do la ală ngai wèr neh geh pồ bơtào Yàng Jehôwa dê, la ală bơta pơjum sàng goh mơ mê pal yal tơnggit di dê tơngai lơh nền bol gơ dê:

⁵Ngai pơjum sa lòt gan Yàng Jehôwa dê rơp sơntòm bơh trồ mho ngai jơt poan kơnhai dùl.

⁶Tòm ngai jơt pram kơnhai hơ̆ gen ngai pơjum sa Piang Lă Ò Gơs Kañ Yàng Jehôwa dê rơp sơntòm; tòm poh ngai bol mê pal sa Piang Lă Ò Gơs Kañ.

⁷Tòm ngai dùl gen gơs tĕ dô bơta pơjum sàng goh mơ bañ lơh broă jat be òs.

⁸Tòm poh ngai ơn tĕ dô nơm phan ơn chu tòm ồs Yàng Jehôwa in. Mơ tòm ngai dơ̆ poh gen gơs tĕ dô bơta pơjum sàng goh mơ bañ lơh broă lơi òs lơh.’”

⁹Yàng Jehôwa đơs mơ Môise lah:

¹⁰“Yal tĕ mơ cau Israel mơ đơs mơ bol khai lah: ‘Tòm tŭ bol mê mut tòm lơgar mơ Añ rơp ai bol mê in mơ bol mê toès kòi gơ dê, cèng tĕ cau gơnoar ơn phan duh khoai in dô cap kòi sơnròp mơ bol mê neh toès.

¹¹Khai pal tơyài cap kòi hơ̆ di đap Yàng Jehôwa tồ gơ in geh dòp bol mê in; cau gơnoar ơn phan duh khoai pal tơyài gơtòm ngai tơnơ̆ mơ ngai Saƀat.

¹²Tòm ngai bol mê tơyài cap kòi, bol mê pal ơn Yàng Jehôwa in dô nơm belàt gơs dô nam mơ ò gơs tềl sồt lơh gơs phan ơn chu pơrguc,

¹³bal mơ phan ơn mơ kòi mbo gơ dê la bàr pơnah jơt epha kơmbuh phe rhền bơcă bal mơ mơñà lơh gơs dô nơm phan ơn chu tòm ồs gơs ƀô bơlhu niam ơn Yàng Jehôwa in, mơ phan ơn pơdơng ñô dô lit tơrnòm ño.

¹⁴Bol mê bañ sa piang lă lơi, hala mồ hala gar kòi bơnung, jơl tus tòm toh di ngai bol mê cèng phan ơn do Yàng Tom Trồ bol mê in. Bơta do pal la dô bơta sồr lam gam sùm sùm ală rài tơnơ̆ in, bulah bol mê ơm tiah lơi kung behơ̆.’”

¹⁵“‘Bơh di ngai tơnơ̆ mơ ngai Saƀat, ngai bol mê cèng cap kòi ơn tơyài, gen kòp tĕ poh poh wil tơl.

¹⁶Tòm ngai dơ̆ pram jơt tơnơ̆ mơ ngai Saƀat dơ̆ poh, hơ̆ la tơnơ̆ mơ ngai Saƀat dơ̆ poh, gen ơn tĕ phan ơn gar pa Yàng Jehôwa in.

¹⁷Bơh di tiah lơi bol mê ơm, cèng tĕ bàr nơm piang lă lơh gơs bơh bàr pơnah jơt epha kơmbuh phe rhền bal mơ kañ, lơh gơs phan ơn plai bồ sơnam tơyài ơn Yàng Jehôwa in.

¹⁸Bal mơ piang lă, ơn tĕ poh nơm belàt dam, kòp nơm gơs dô nam mơ ò gơs tềl sồt, dô nơm kơnrồ gam dềt mơ bàr nơm belàt dam. Ală phan do pal ơn lơh gơs phan ơn chu pơrguc Yàng Jehôwa in, bal mơ ală phan ơn mơ kòi mbo bol khai dê mơ ală phan ơn pơdơng lơh gơs dô nơm phan ơn gơs ƀô bơlhu niam nùs Yàng Jehôwa.

¹⁹Lồc behơ̆ ơn tĕ dô nơm be dam lơh gơs phan ơn tơwài glài mơ bàr nơm belàt, kòp nơm gơs dô nam, lơh gơs phan ơn ring lơngai.

²⁰La dô nơm phan ơn sàng goh Yàng Jehôwa in mơ rơp gơrê bal mơ cau gơnoar ơn phan duh khoai.

²¹Kung tòm dô ngai hơ̆, bol mê pal yal tơnggit dô bơta pơjum sàng goh mơ bañ lơh dô nơm broă lơi òs lơh. Bơta hơ̆ rơp la dô bơta sồr lam gam sùm sùm ală rài rơp tus bol mê in bulah bol mê ơm tiah lơi kung behơ̆ sơl.

²²Tòm tŭ bol mê toès kòi tòm lơgar bol mê dê, gen bañ toès tus di ală nhàr ƀlàng sre bol mê dê hala dòñ ală sơnyùr kòi rung kơnhai toès bol mê dê. Lòi tĕ ală sơnyùr kòi hơ̆ ală cau rƀah lơòi mơ ală cau làng bơdìh in. Añ la Jehôwa Yàng Tom Trồ bol mê dê.’”

²³Yàng Jehôwa đơs mơ Môise lah:

²⁴“Đơs tĕ mơ cau Israel lah: ‘Tòm ngai sơnròp kơnhai poh bol mê pal gơs dô ngai rlô, dô ngai pơjum uh kơlwòk lòi kirsơnre sàng goh.

²⁵Bañ lơh dô nơm broă lơi òs lơh, mơya ơn tĕ dô nơm phan ơn chu tòm ồs Yàng Jehôwa in.’”

²⁶Yàng Jehôwa đơs mơ Môise lah:

²⁷“Ngai jơt kơnhai poh la ngai tơwài glài. Pơjum tĕ dô bơta pơjum sàng goh mơ ơt sa mơ ơn dô nơm phan ơn chu tòm ồs Yàng Jehôwa in.

²⁸Bañ lơh dô nơm broă lơi òs lơh tòm ngai hơ̆, tài bơh hơ̆ la ngai tơwài glài, tòm tŭ bơta tơwài glài neh lơh gơs bol mê in di đap Yàng Jehôwa la Yàng Tom Trồ bol mê dê.

²⁹Tòm ngai hơ̆, cau lơi ò ơt sa gen pal kong tă sang bơh di làng bol khai dê.

³⁰Añ rơp tơnroh bơh digùl làng bol khai dê cau lơi lơh dô nơm broă lơi tòm ngai hơ̆.

³¹Bol mê bañ lơh dô nơm broă lơi. Bơta hơ̆ rơp la dô bơta sồr lam gam sùm sùm ală rài rơp tus in, bulah bol mê ơm tiah lơi kung behơ̆ sơl.

³²Hơ̆ la dô ngai Saƀat ơm rlô bol mê in, mơ bol mê pal ơt sa. Bơh di trồ mho ngai sin kơnhai do jơl tus di trồ mho ngai hìng bol mê pal prap gàr ngai Saƀat.”

³³Yàng Jehôwa đơs mơ Môise lah:

³⁴“Đơs tĕ mơ cau Israel lah: ‘Tòm ngai jơt pram kơnhai poh gen bơta Pơjum sa ală Sàl Ing Yàng Jehôwa dê rơp sơntòm, mơ gơ gơs tòm poh ngai.

³⁵Ngai sơnròp la dô bơta pơjum bal sàng goh; bañ lơh dô nơm broă lơi òs lơh.

³⁶Tòm poh ngai ơn tĕ ală phan ơn chu tòm ồs Yàng Jehôwa in, mơ tòm ngai phàm gen gơs tĕ dô bơta pơjum bal sàng goh mơ ơn tĕ dô nơm phan ơn chu tòm ồs Yàng Jehôwa in. Hơ̆ la lồi bơta pơjum bal; bañ lơh dô nơm broă lơi òs lơh.

³⁷Hơ̆ la ală ngai pơjum sa Yàng Jehôwa dê neh geh pồ bơtào, mơ bol mê pal yal tơnggit lơh gơs ală bơta pơjum sàng goh nàng cèng ală phan ơn chu tòm ồs ơn Yàng Jehôwa in, hơ̆ la ală phan ơn chu pơrguc mơ ală phan ơn mơ kòi mbo, ală phan ơn mơ phan poan jơng mơ ală phan ơn pơdơng pal ơn kòp ngai.

³⁸Ală phan ơn do la ală phan ơn bơtơl di ală phan ơn ngai Saƀat Yàng Jehôwa dê, mơ bơtơl di ală phan ai gòi bol mê dê mơ ală bơta lơi mơ bol mê neh srat să ho nền mơ jơh ală phan ơn jat nùs kòñ mơ bol mê ơn Yàng Jehôwa in.

³⁹Behơ̆, rơp sơntòm bơh di ngai jơt pram kơnhai poh, tơnơ̆ mơ tŭ bol mê neh toès kòi tòm lơgar rau, pơjum sa tĕ dô bơta pơjum sa tòm poh ngai Yàng Jehôwa in; ngai sơnròp la ngai rlô, mơ ngai phàm kung rơp la ngai rlô.

⁴⁰Tòm ngai sơnròp, bol mê pal ai ală plai neh sac rwah bơh di ală tòm chi, ală nha gòl, ală ntê gơs oă nha mơ ntê chi nrài mơ hòn chò di đap Jehôwa Yàng Tom Trồ bol mê dê tòm poh ngai.

⁴¹Pơjum sa tĕ ngai pơjum sa do mơ lơh gơs dô ngai pơjum sa Yàng Jehôwa in tòm poh ngai kòp nam. Hơ̆ rơp la dô bơta sồr lam gam sùm sùm ală rài rơp tus in; pơjum sa tĕ tòm kơnhai poh.

⁴²Ơm tĕ tòm ală sàl ing tòm poh ngai: jơh ală cau Israel deh tòm lơgar pal ơm tòm ală sàl ing,

⁴³tồ ală kòn sau bol mê dê rơp git lah Añ neh gơs cau Israel ơm tòm ală sàl ing tòm tŭ Añ cèng bol khai lik lòt bơh di Ejiptơ. Añ la Jehôwa Yàng Tom Trồ bol mê dê.’”

⁴⁴Behơ̆ Môise yal tơnggit cau Israel in ală bơta pơjum sa neh lơh nền Yàng Jehôwa dê.