Read koho Lebi 24 Bible Online

Lebi 24 - koho bible

Lebi 24

¹Yàng Jehôwa đơs mơ Môise lah:

²“Sồr tĕ cau Israel cèng mê in mơñà sàng neh pat bơh plai ôlibe nàng chu ồs đèng tồ ală ồs đèng gơs ồs gam hìt sùm.

³Arôn rơp ơn ồs đèng hơ̆ tòm Sàl Tòm Mat đah bơdìh bài kơrnìng cang Đài Bơta Ho Bal, mơ lòi gơ hìt sùm di đap Yàng Jehôwa bơh trồ mho jơl tus àng drim. Hơ̆ rơp la dô bơta sồr lam gam sùm sùm ală rài in.

⁴Arôn rơp ơn ală ồs đèng hơđang jơng đèng mơ màh ngan di đap Yàng Jehôwa pal geh hìt sùm.

⁵Ai tĕ kơmbuh phe rhền mơ jơt bàr nơm piang lă, ngui bàr pơnah jơt epha dê nàng lơh gơs dô nơm piang lă.

⁶Pràng gơtòm bàr sèng, kòp sèng prau nơm hơđang cơnòng mơ màh ngan di đap Yàng Jehôwa.

⁷Rò gah kòp sèng ơn tĕ dô êt kơlhô ngan lơh gơs dô pơnah lòi kirsơnre bơh piang lă mơ lơh gơs dô nơm phan ơn chu tòm ồs ơn Yàng Jehôwa in.

⁸Piang lă hơ̆ pràng di đap Yàng Jehôwa sùm sùm, bơh ngai Saƀat do tus hơ ngai Saƀat ne, ală cau Israel, lơh gơs dô bơta ho bal gam sùm sùm.

⁹Piang lă hơ̆ gơrê bal mơ Arôn mơ ală kòn klau khai dê, bol khai pal sa piang lă hơ̆ tòm tiah sàng goh, tài bơh gơ la pơnah sàng goh rlau jơh tòm pơnah bol khai ơn lơh gơs phan ơn chu tòm ồs Yàng Jehôwa in.”

¹⁰Mơ tai, gơs dô nă kòn klau gơs mè la dô nă cau Israel mơ bèp la dô nă cau Ejiptơ lik lòt digùl ală cau Israel, mơ dô bơta tòmlơh neh gơlik gơs tòm sàl digùl kòn klau hơ̆ mơ dô nă cau Israel.

¹¹Kòn klau cau ùr Israel dê srat sơntơm mơ đơs tràl sơrbil di Sơnđan Yàng Jehôwa; behơ̆ bol khai cèng kòn klau hơ̆ tus hơ Môise. Mè kòn klau hơ̆ sơnđan la Selômit, kòn ùr Dibri cau jơi bơtiàn Dan.

¹²Bol khai jàm kòn klau hơ̆ jơl tus di tŭ nùs kòñ Yàng Jehôwa dê rơp yal tơlik loh làng bol khai in.

¹³Gen Yàng Jehôwa đơs mơ Môise lah:

¹⁴“Cèng tĕ cau đơs tràl sơrbil hơ̆ đah bơdìh sàl ơm. Jơh ală cau neh kơno khai đơs tràl sơrbil pal ơn tê bol khai dê hơđang bồ cau hơ̆, mơ jơh dô mpồl jơnum pal cơm lŭ tơnchơt khai.

¹⁵Đơs tĕ mơ cau Israel lah: ‘Dilah cau lơi srat sơntơm Yàng Tom Trồ khai dê, khai pal kong glài,

¹⁶cau lơi đơs tràl sơrbil di Sơnđan Yàng Jehôwa gen cau hơ̆ pal kong tơnchơt. Jơh dô mpồl jơnum pal cơm lŭ tơnchơt khai. Bulah la dô nă cau làng bơdìh hala dô nă cau deh tòm lơgar, tòm tŭ khai đơs tràl sơrbil di Sơnđan Yàng Jehôwa gen khai pal kong tơnchơt.

¹⁷Dilah dô nă cau lơi tă bơta kis dô nă kòn mơnus dê, gen cau hơ̆ pal kong tơnchơt.

¹⁸Cau lơi tă bơta kis dô nơm phan poan jơng cau ndai dê gen cau hơ̆ pal tơm wơl, bơta kis ala bơta kis.

¹⁹Dilah cau lơi lơh cau gơp ƀòn khai dê kong sồt jê, gen tơm tĕ khai in bơta mơ khai neh lơh:

²⁰tiah pă tơm tiah pă, mat tơm mat, sề tơm sề. Khai pal kong sồt jê kung be khai neh lơh sồt jê cau ndai in

²¹Cau lơi tơnchơt dô nơm phan poan jơng gen pal tơm wơl, mơya cau lơi tơnchơt dô nă cau gen cau hơ̆ pal kong tơnchơt.

²²Bol mê pal gơs mìng dô bơta boh lam cau làng bơdìh mơ cau deh tòm lơgar in. Añ la Jehôwa Yàng Tom Trồ bol mê dê.’”

²³Gen Môise đơs mơ cau Israel, mơ bol khai cèng cau đơs tràl sơrbil hơ đah bơdìh sàl ơm mơ cơm tŭ tơnchơt khai. Cau Israel lơh jat be Yàng Jehôwa neh sồr Môise.