Read koho Lebi 26 Bible Online

Lebi 26 - koho bible

Lebi 26

¹“Bañ lơh bol mê in ală rùp ràk hala bơtào gơs dô nơm rùp hala dô nơm pơnai lŭ nàng duh khoai, mơ bañ bơtào tòm lơgar bol mê dê dô pơnai lŭ pac sềr nàng cùn khoai di đap gơ. Añ la Jehôwa Yàng Tom Trồ bol mê dê.

²Prap gàr tĕ ală ngai Saƀat Añ jê mơ ki ngàm tĕ di Tiah Sàng Goh Añ jê. Añ la Yàng Jehôwa.

³Dilah bol mê lòt jat ală bơta sồr lam Añ jê mơ kơrhia lơh jat ală jơnau sồr Añ jê,

⁴Añ rơp đùh mìu bol mê in tòm toh kơnhai, ù tiah rơp gơlik kòi mbo mơ ală chi gơlik plai đo gơ dê.

⁵Kơnhai pơrjòt kòi bol mê dê rơp pơnjat tus kơnhai pic plai ño, mơ kơnhai pic plai ño rơp pơnjat tus di kơnhai tam gơ, mơ bol mê rơp sa jơh ală phan sa bol mê kòñ mơ ơm kis lơngap lơngai tòm lơgar bol mê dê.

⁶Añ rơp ai bơta ring lơngai tòm lơgar, bol mê rơp bic mang mơ ò gơs cau lơi lơh bol mê in rngòt. Añ rơp tă tơlik ală phan brê bơh di lơgar, mơ đào rơp ò lòt gan lơgar bol mê dê.

⁷Bol mê rơp ting jat ală cau sò tơm bol mê dê, mơ bol khai rơp gơpừ bơh đào di đap bol mê.

⁸Pram nă tòm bol mê rơp ting jat dô rhiang nă, mơ dô rhiang nă tòm bol mê rơp ting jat jơt rbô nă, mơ ală cau sò tơm bol mê dê rơp gơpừ bơh đào di đap bol mê.

⁹Añ rơp ai bơta nđàc wèt sền di bol mê mơ lơh bol mê in tơnggơs bơtơl oă, mơ Añ rơp prap gàr bơta ho bal Añ jê mơ bol mê.

¹⁰Tòm tŭ bol mê gam sa phan neh toès nam lài gen bol mê pal tă cèng ơn gơ tiah ndai, lòi tiah nàng cèng prap phan pa toès.

¹¹Añ rơp ơn tiah ơm Añ jê digùl bol mê, mơ Añ rơp ò cù kìr di bol mê.

¹²Añ rơp lòt digùl bol mê mơ lơh gơs Yàng Tom Trồ bol mê dê, mơ bol mê rơp lơh gơs làng bol Añ jê.

¹³Añ la Jehôwa Yàng Tom Trồ bol mê dê, la Bơtau neh tă cèng bol mê bơh di Ejiptơ tồ bol mê ò gam ơm dĭ cau Ejiptơ in; Añ neh dơrpă yô bol mê dê mơ neh lơh bol mê in pò bồ jòng hơđang mơ lik lòt.

¹⁴Mơya dilah bol mê ò bài iat Añ mơ prap gàr lơh jat jơh ală jơnau sồr do,

¹⁵dilah bol mê sang lòi ală jơnau lơh nền Añ jê mơ cù kìr ală bơta boh lam Añ jê mơ ò lơh jat jơh ală jơnau sồr Añ jê, behơ̆ nàng bol mê rơp lơh tìs mơ bơta ho bal Añ jê,

¹⁶gen Añ rơp lơh bơta do bol mê in: Añ rơp đùh hơđang bol mê bơta rngòt rngơt dô bă nisơna, bơta kòp jê bơsiă hian mơ kòp prơm tơnroh bơta àng mat bol mê dê mơ pơndut bơta kis bol mê dê. Bol mê rơp sih gar mơ gơlik ò kwơ, bơh ală cau sò tơm bol mê dê rơp sa gơ.

¹⁷Añ rơp wèt mat Añ jê tòmdră mơ bol mê, lòi bol mê kong alah di đap ală cau sò tơm bol mê dê, ală cau gơjrañ kơuềng di bol mê rơp at bồ hơđang bol mê, mơ bol mê rơp ntoat dô bulah ò gơs cau ting jat bol mê.

¹⁸Dilah tơnơ̆ mơ jơh ală bơta hơ̆ mơ bol mê gam ò iat jơnau Añ, Añ rơp lơh glài bol mê tai kơnjơ̆ poh dơ̆ rlau.

¹⁹Añ rơp tơnroh bơta pơnhừ să kơldang bồ bol mê dê mơ lơh trồ hơđang bol mê gơlik gơs be lòs mơ ù tiah hơđơm bol mê gơlik gơs be kòng.

²⁰Bơta pràn kơldang bol mê dê gơlik gơs ò kwơ tài bơh ù tiah rơp ò gơlik cồng nha gơ dê, ală chi tòm lơgar kung ò gơlik plai gơ dê.

²¹Dilah bol mê kư̆ gam tòmdră mơ Añ mơ ò bài iat Añ, Añ rơp bơtơl bơta rung rài bòl glar bol mê in poh dơ̆ rlau tai, di pal mơ ală bơta tồi glài bol mê dê.

²²Añ rơp sồr ală phan poan jơng tòm brê tus tòmdră mơ bol mê, mơ bol gơ rơp kơñau ală kòn sau bol mê dê bơh di bol mê, tơnroh ală phan poan jơng bol mê dê, pơndut ntum khà bol mê dê, lơh ngềt ngơt ală gùng lòt bol mê dê.

²³Dilah bulah neh gơlik gơs ală bơta hơ̆ mơ bol mê ò bài dòp rò bơta lơh glài tơmàl di bol mê, mơya kư̆ gam tòmdră mơ Añ,

²⁴gen să tòm Añ rơp tòmdră mơ bol mê, mơ lơh bol mê in kong bòl glar poh dơ̆ rlau tai, tài bơh ală bơta tồi glài bol mê dê.

²⁵Mơ Añ rơp cèng đào tus hơđang bol mê nàng sal tê bơh bơta bol mê gơltac bơta ho bal. Tòm tŭ bol mê ruc wơl tòm ală ƀòn dờng bol mê dê, Añ rơp đùh bơta kòp jê pluh plàng digùl bol mê, mơ bol mê rơp kong jào phi tòm tê ală cau sò tơm bol mê dê.

²⁶Tòm tŭ Añ ò tai rcang ai phan sa bol mê in, jơt nă cau ùr rơp rgơi gơm piang bal mìng hơđang dô nơm bơnhă ồs lơm, bol khai rơp kơr phan sa ai bol mê in; bol mê rơp sa mơya ò hòm.

²⁷Dilah bulah neh gơlik gơs behơ̆, bol mê kư̆ gam ò iat Añ, mơ kư̆ pơnjat tòmdră mơ Añ,

²⁸gen tòm bơta gơjrañ Añ jê, Añ rơp tòmdră mơ bol mê, mơ să tòm Añ rơp lơh glài bol mê kơnjơ̆ poh dơ̆ rlau tai.

²⁹Bol mê rơp sa poac ală kòn klau bol mê dê mơ poac ală kòn ùr bol mê dê.

³⁰Añ rơp tơnroh ală tiah jơnhoa duh khoai bol mê dê, koh sang ală cơnòng chu kơlhô bol mê dê mơ tơƀù ală ƀồc bol mê dê hơđang ală rùp ràk ò gơs bơta kis bol mê dê, mơ Añ rơp cù kìr di bol mê.

³¹Añ rơp lơh ală ƀòn dờng bol mê dê gơlik gơs ală gơnru tơrlah tơrlơm mơ lơh ală tiah sàng goh bol mê dê gơlik gơs tiah sang lòi srau gòi, mơ Añ rơp cù kìr di ƀô bơlhu ală phan ơn bol mê dê.

³²Añ rơp lơh lơgar gơlik gơs tiah sang lòi rhàng gòi, tian gơs ală cau sò tơm di bol mê ơm tềng hơ̆ kung ai lơh krơi ngan.

³³Añ rơp rsìh bol mê tòm gùl ală làng bol mơ Añ rơp tă đào ting jat bol mê. Lơgar bol mê dê rơp gơkòl sang lòi srau gòi, mơ ală ƀòn dờng bol mê dê rơp kong tơnroh.

³⁴Gen ù tiah rơp geh ơm lơngai tòm ală nam rlô gơ dê tòm jơh tŭ tơngai gơkòl sang lòi srau gòi mơ bol mê ơm tòm lơgar ală cau sò tơm di bol mê; gen ù tiah rơp ơm rlô lơngai tòm ală nam Saƀat gơ dê.

³⁵Tòm jơh tŭ tơngai mơ gơ ơm sang lòi srau gòi, ù tiah rơp geh tŭ tơngai ơm rlô mơ gơ neh ò gơs ală nam Saƀat mơ bol mê ơm tòm gơ.

³⁶Ai đah pơnah ală cau sò tơm bol mê gam kis, Añ rơp lơh nùs bol khai in rngòt rngơt tòm lơgar ală cau sò tơm di bol khai, tian gơs ntas càl khồm nha chi kung lơh bol khai in ntoat dô. Bol khai rơp ntoat kung be ntoat dô bơh di đào ting jat, mơ bol khai rơp gơpừ bulah ò gơs cau ting jat bol khai.

³⁷Bol khai rơp gơtup pừ, cau do hơđang cau ne kung be ntoat dô bơh di đào ting jat bulah ò gơs cau lơi ting jat bol khai. Behơ̆ bol mê rơp ntào ò jai di đap ală cau sò tơm di bol mê.

³⁸Bol mê rơp roh rui digùl ală làng bol; ù tiah ală cau sò tơm di bol mê rơp sa loan bol mê.

³⁹Ală cau tòm bol mê gam kis rơp siar roh tòm ală lơgar ală cau sò tơm di bol khai, tài bơh ală bơta tồi glài bol khai dê; mơ kung tài bơh ală bơta tồi glài ală ồng pàng bol khai dê mơ bol khai kong siar roh.

⁴⁰Mơya dilah bol khai rơp yal ală bơta tồi glài bol khai dê mơ ală bơta tồi glài ală ồng pàng bol khai dê, hơ̆ la bơta neh tòmdră mơ Añ mơ ală bơta neh sò tơm di Añ,

⁴¹la ală bơta neh lơh Añ in sòdră di bol khai tian gơs Añ neh sang lòi bol khai tòm lơgar ală cau sò tơm di bol khai, gen tòm tŭ bol khai tơnliah nùs ò siat gơltau bol khai dê mơ kong dòp bơta lơh glài,

⁴²gen Añ rơp kah wơl bơta ho bal Añ jê neh bơtào mơ Jakôp mơ bơta ho bal Añ jê neh bơtào mơ Isak mơ bơta ho bal Añ jê neh bơtào mơ Abraham, mơ Añ rơp kah wơl lơgar bol khai dê.

⁴³Bơh lơgar bol khai dê pal kong bol khai sang lòi ngềt ngơt mơ rơp geh ơm rlô lơngai tòm ală nam Saƀat gơ dê tòm tŭ gơ ơm ngềt ngơt ò gơs mat bol khai dê. Bol khai pal kong lơh glài bơh ală bơta tồi glài bol khai dê, tài bơh bol khai sang lòi ală bơta boh lam Añ jê mơ cù kìr di ală bơta lơh nền Añ jê.

⁴⁴Bulah neh gơs ală bơta hơ̆, tòm tŭ bol khai ơm tòm lơgar ală cau sò tơm di bol khai, Añ rơp ò sang lòi bol khai hala cù kìr di bol khai nàng tơnroh jơh hir bol khai mơ sang lòi jơnau Añ neh ho bal mơ bol khai. Añ la Jehôwa Yàng Tom Trồ bol khai dê.

⁴⁵Mơya tài bơh bol khai Añ rơp kah wơl jơnau ho bal mơ ală ồng pàng bol khai dê la ală cau mơ Añ neh tă tơlik bơh di Ejiptơ di đap ală làng bol nàng lơh gơs Yàng Tom Trồ bol khai dê. Añ la Yàng Jehôwa.”

⁴⁶Hơ̆ la ală bơta lơh nền, ală bơta boh lam mơ ală sơnoa rnoas mơ Yàng Jehôwa neh bơtào gơs hơđang mơnơm Sinai digùl să tòm Kơnràñ mơ ală cau Israel gan di Môise.