Read koho Lebi 27 Bible Online

Lebi 27 - koho bible

Lebi 27

¹Yàng Jehôwa đơs mơ Môise lah:

²“Yal tĕ ală cau Israel in mơ đơs mơ bol khai lah: ‘Dilah cau lơi ho nền ơn kòn mơnus Yàng Jehôwa in gen pal ơn khà priă tòm toh di pal mơ cau hơ̆,

³Lơh nền tĕ ntum khà priă dô nă cau klau digùl bàr jơt nam mơ prau jơt nam la pram jơt sieklơ priă jat sieklơ Tiah Sàng Goh dê;

⁴mơ dilah hơ̆ la dô nă cau ùr, lơh nền tĕ ntum khà priă khai dê la pe jơt sieklơ.

⁵Dilah la dô nă cau digùl pram nam mơ bàr jơt nam, lơh nền tĕ ntum khà priă dô nă cau klau la bàr jơt sieklơ mơ dô nă cau ùr la jơt sieklơ.

⁶Dilah la dô nă cau digùl dô kơnhai mơ pram nam, lơh nền tĕ ntum khà priă dô nă cau klau la pram sieklơ, mơ dô nă cau ùr la pe sieklơ.

⁷Dilah la dô nă cau prau jơt nam hala kra rlau, lơh nền khà priă dô nă cau klau la jơt pram sieklơ mơ dô nă cau ùr la jơt sieklơ.

⁸Dilah cau lơi neh ho nền la cau rƀah lơòi ngan ò rgơi tơm jat be ntum khà priă neh lơh nền, khai pal cèng cau lơh gơs phan ơn hơ̆ tus hơ cau gơnoar ơn phan duh khoai mơ cau gơnoar ơn phan duh khoai rơp lơh nền khà priă jat be cau neh ho nền hơ̆ rgơi tơm.

⁹Dilah phan khai neh ho ơn la dô nơm phan poan jơng geh ơn lơh gơs phan ơn Yàng Jehôwa in, phan poan jơng ơn Yàng Jehôwa in hơ̆ gơlik gơs sàng goh.

¹⁰Khai ò di tòmgơl gơ hala ơn dô nơm niam ala dô nơm ò niam, hala dô nơm ò niam ala dô nơm niam; dilah khai pal ơn dô nơm phan poan jơng do ala dô nơm ne gen jơh bàr nơm phan ơn hơ̆ gơlik gơs sàng goh.

¹¹Dilah phan khai neh ho ơn la dô nơm phan poan jơng ò goh, la phan ò geh dòp lơh gơs phan ơn Yàng Jehôwa in, phan hơ̆ pal cèng tus di đap cau gơnoar ơn phan duh khoai,

¹²gen cau gơnoar ơn phan duh khoai rơp sơwì lơh nền bơh phan ơn hơ̆ la niam hala ò. Cau gơnoar ơn phan duh khoai lơh nền phan hơ̆ kas màng kàr lơi, gen jat bơta kas màng behơ̆.

¹³Mơya dilah cau ơn phan hơ̆ kòñ tơwài wơl phan poan jơng hơ̆, khai pal ai bơtơl dô pơnah pram khà jền kas màng phan hơ̆ dê.

¹⁴Dilah dô nă cau ơn hìu ơm khai dê lơh gơs dô nơm phan sàng goh Yàng Jehôwa in, cau gơnoar ơn phan duh khoai pal lơh nền bơta kas màng hìu hơ̆ dê: la niam hala ò. Cau gơnoar ơn phan duh khoai rơp lơh nền hìu hơ̆ kas màng kàr lơi gen hơ̆ la bơta kas màng hìu hơ̆ dê.

¹⁵Dilah cau ơn hìu hơ̆ kòñ tơwài wơl hìu khai dê gen khai pal ai bơtơl dô pơnah pram ntum khà jền kas màng hìu hơ̆ dê, mơ hìu hơ̆ rơp gơrê wơl mơ cau tòm yau gơ dê.

¹⁶Dilah dô nă cau ơn Yàng Jehôwa in dô pơnah ù tiah hìu nhă khai dê, bơta kas màng ù tiah hơ̆ rơp geh lơh nền jat be ntum khà sieklơ kòi gar pal gơs tơl nàng sih tòm ù hơ̆, pram jơt sieklơ priă dô hômer gar kòi tràng.

¹⁷Dilah khai ơn ù tiah khai dê tòm Nam Hòn Chò, ntum khà jền kas màng ù tiah hơ̆ neh lơh nền gen gơ gam ò tòmgơl.

¹⁸Mơya dilah khai ơn ù tiah khai dê tơnơ̆ mơ Nam Hòn Chò, cau gơnoar ơn phan duh khoai rơp lơh nền khà priă kas màng ù tiah hơ̆ dê jat be khà nam gam wơl jơl tus di Nam Hòn Chò pơnjat mơ Nam Hòn Chò hơ̆, mơ ntum khà priă kas màng gơ dê rơp geh pơndut.

¹⁹Dilah cau hơ̆ kòñ tơwài wơl ù tiah hơ̆, khai pal ai bơtơl dô pơnah pram khà priă kas màng gơ dê, mơ ù tiah hơ̆ rơp gơrê wơl mơ cau tòm bơh sơnròp.

²⁰Bulah behơ̆, dilah khai ò tơwài wơl ù tiah khai dê, hala dilah khai tac ù tiah hơ̆ mơ dô nă cau ndai, gen ù tiah hơ̆ ò tŭ lơi geh tơwài wơl.

²¹Tòm tŭ ù tiah rơp geh hồ toh tòm Nam Hòn Chò, gơ rơp gơlik gơs sàng goh kung be dô bă ù tiah neh ơn Yàng Jehôwa in, gơ rơp gơlik gơs phan tòm ală cau gơnoar ơn phan duh khoai dê.

²²Dilah dô nă cau ơn Yàng Jehôwa in dô bă ù tiah khai neh rwat, ò di la dô pơnah ù tiah hìu nhă dê,

²³gen cau gơnoar ơn phan duh khoai pal lơh nền bơta kas màng ù tiah hơ̆ dê jơl tus di Nam Hòn Chò, mơ cau blơi ù tiah hơ̆ pal tơm ntum khà priă tòm ngai hơ̆ lơh gơs dô nơm phan sàng goh Yàng Jehôwa in.

²⁴Tòm Nam Hòn Chò ù tiah hơ̆ rơp rê wơl hơ cau mơ khai neh rwat gơ, la cau tòm yau ù tiah hơ̆ dê.

²⁵Kòp ntum khà priă lơh nền bơh bơta kas màng gơ dê pal geh lơh nền jat sieklơ Tiah Sàng Goh dê, hơ̆ la bàr jơt gera dô sieklơ.

²⁶Bulah behơ̆, ò gơs cau lơi rgơi ơn kòn tơnhoa dô nơm phan poan jơng dê bơh kòn tơnhoa neh gơrê bal mơ Yàng Jehôwa rau; bulah la dô nơm kơnrồ hala dô nơm belàt, gơ neh gơrê bal mơ Yàng Jehôwa rau.

²⁷Dilah hơ̆ la dô nơm tòm ală phan poan jơng ò goh, gơ rơp geh tơwài jat khà priă lơh nền gơ in, mơ ai bơtơl dô pơnah pram tai; dilah gơ ò geh tơwài wơl, gen gơ rơp geh tac jat khà lơh nền bơta kas màng gơ dê.

²⁸Mơya, ò gơs phan lơi mơ dô nă cau neh ơn Yàng Jehôwa in, bulah la kòn mơnus hala phan poan jơng hala ù tiah hìu nhă dê rgơi tac hala tơwài wơl; jơh ală phan neh ơn rau la sàng goh rlau jơh Yàng Jehôwa in.

²⁹Ò gơs cau lơi neh ơn jào bơta tơnroh in rgơi geh tơwài wơl; bol khai pal kong tơnchơt.

³⁰Dô pơnah jơt bơh jơh ală phan gơlik gơs bơh di ù tiah, bulah la kòi mbo bơh di ù hala plai đo bơh di ală tòm chi, gơrê bal mơ Yàng Jehôwa; phan hơ̆ la sàng goh Yàng Jehôwa in.

³¹Dilah dô nă cau tơwài wơl dô pơnah jơt lơi khai dê, pal ơn bơtơl dô pơnah pram tòm hơ̆.

³²Jơh dô pơnah jơt kơnrồ mơ belàt, hơ̆ la kòp nơm phan poan jơng dơ̆ jơt lòt gan hơđơm gai lồng cau ê belàt dê, rơp la sàng goh Yàng Jehôwa in.

³³Khai ò di tă ai phan niam hala bơh di phan ò niam hala tòmgơl ala phan lơi. Dilah khai tòmgơl ala phan lơi gen jơh bàr nơm phan poan jơng mơ phan tòmgơl ala gơ gơlik gơs sàng goh mơ ò rgơi geh tơwài wơl.’”

³⁴Hơ̆ la ală bơta sồr lam cau Israel in mơ Yàng Jehôwa neh ai Môise in hơđang mơnơm Sinai.