Read koho Lebi 5 Bible Online

Lebi 5 - koho bible

Lebi 5

¹“Mơ dilah dô nă cau tìs glài tài bơh khai ò yal tơlik tòm tŭ khai neh srat să ho nền lơh cơng bơh dô jơnau lơi mơ khai neh gŏ hala neh git, gen khai rơp kong lơh nền glài.

²Hala dilah dô nă cau neh ƀư di dô nơm phan lơi ò goh jat bơta sồr lam, be ală ƀồc chơt ală phan poan jơng tòm brê dê hala ală phan poan jơng tòm hìu dê, hala ală phan ò goh wìn nsròng tòm ù, bulah khai ò đal git, khai kung neh gơlik gơs ò goh mơ neh tìs glài.

³Dilah dô nă cau lơi ƀư di phan ò goh kòn mơnus dê, ò git la phan lơi neh lơh khai in gơlik gơs ò goh, bulah khai ò đal git bơta hơ̆, tòm tŭ khai git bơh bơta hơ̆ rau gen khai gơkòl kòp la neh tìs glài.

⁴Dilah dô nă cau ò git kơrhia tòm bơta srat să ho nền nàng lơh dô bơta lơi, bulah la bơta niam hala iơh, tòm tŭ git bơta lơi mơ khai srat să ho nền dô bă ò git kơrhia, bulah khai ò git đal bơh bơta hơ̆, tòm tŭ khai git bơh bơta hơ̆ rau gen khai gơkòl kòp la neh tìs glài.

⁵Tòm tŭ cau lơi neh tìs glài tòm ală gùng behơ̆, khai pal yal glài khai neh tìs,

⁶mơ bơta lơh glài bơh glài khai neh tìs la khai pal cèng tus hơ Yàng Jehôwa dô nơm belàt kòn dra hala be dra bơh di mpồl belàt nàng lơh gơs phan ơn tơwài glài; mơ cau gơnoar ơn phan duh khoai rơp lơh bơta tơwài glài khai in bơh tồi glài khai dê.

⁷Mơya dilah khai ò rgơi tơl pràn nàng ơn dô nơm belàt kòn hala be kòn, khai pal cèng tus hơ Yàng Jehôwa bơh bơta tơm tồi glài khai dê, bàr nơm sềm ntòp hala bàr nơm kòn ntòp hui: dô nơm lơh gơs phan ơn tơwài glài mơ dô nơm lơh gơs phan ơn chu pơrguc.

⁸Khai rơp cèng ală phan hơ̆ tus hơ cau gơnoar ơn phan duh khoai, lài ngan cau gơnoar ơn phan duh khoai ơn dô nơm lơh gơs phan ơn tơwài glài. Khai rơp tơryoat ngko gơ dê mơ ò di lơh gơltac jơh,

⁹mơ rơp rsìh dô êt mhàm phan ơn tơwài glài dê di gah cơnòng duh khoai; mhàm gam wơl pal tuh jơh di jơng cơnòng duh khoai. Hơ̆ la phan ơn tơwài glài.

¹⁰Mơ sềm dơ̆ bàr, cau gơnoar ơn phan duh khoai rơp ơn be dô nơm phan ơn chu pơrguc, jat be bơta neh lơh nền gơs phan ơn tơwài glài khai in bơh tồi glài mơ khai neh tìs, mơ khai rơp geh toh glài.

¹¹Bulah behơ̆, dilah khai ò rgơi gơs bàr nơm sềm ntòp hala bàr nơm kòn ntòp hui, gen tài bơh tồi glài khai dê khai pal cèng tus dô pơnah jơt epha kơmbuh phe rhền nàng lơh gơs dô nơm phan ơn tơwài glài. Khai ò di ơn mơñà hala kơlhô ƀô bơlhu hơđang gơ, tài bơh hơ̆ la dô nơm phan ơn tơwài glài.

¹²Khai rơp cèng gơ tus hơ cau gơnoar ơn phan duh khoai, gen cau gơnoar ơn phan duh khoai rơp ai dô sơmbat kơmbuh phe hơ̆ lơh gơs dô pơnah lòi kirsơnre, mơ chu gơ hơđang cơnòng duh khoai hơđang ală phan ơn chu mơ ồs ơn Yàng Jehôwa in. Hơ̆ la dô nơm phan ơn tơwài glài.

¹³Lơh behơ̆ gen cau gơnoar ơn phan duh khoai rơp lơh gơs bơta tơwài glài cau hơ̆ in bơh ală bơta tồi glài mơ khai neh tìs, mơ khai rơp geh toh glài. Pơnah gam wơl phan ơn duh khoai dê rơp gơrê bal mơ cau gơnoar ơn phan duh khoai, kung be tòm phan ơn duh khoai mơ kòi mbo.”

¹⁴Yàng Jehôwa đơs mơ Môise lah:

¹⁵“Tòm tŭ gơs dô nă cau gơtup tìs tòm bơta sồr lam Yàng Jehôwa dê gơwèt hơ ală phan goh, gen tài bơh bơta lơh glài khai dê khai pal cèng tus hơ Yàng Jehôwa dô nơm belàt dam bơh di mpồl belàt khai dê, ò tềl sồt mơ kas màng di pal mơ khà priă lơh nền jat be sieklơ Tiah Sàng Goh dê. Hơ̆ la dô nơm phan ơn tơwài glài gơtup tìs.

¹⁶Khai pal tơm wơl bơta khai neh ò lơh tơl gơwèt hơ ală phan sàng goh, bơtơl tai dô pơnah pram bơta kas màng gơ dê mơ ai jơh cau gơnoar ơn phan duh khoai in, mơ cau gơnoar ơn phan duh khoai ngui belàt dam hơ̆ lơh gơs phan ơn tơwài glài nàng tơwài glài cau hơ̆ in bơh tồi glài mơ khai neh tìs, mơ khai rơp geh toh glài.

¹⁷Dilah dô nă cau tìs glài mơ lơh bơta neh bơkơ̆u tòm ală bơta sồr lam Yàng Jehôwa dê, khai neh tìs glài mơ pal kong lơh glài bơh bơta hơ̆.

¹⁸Khai pal cèng tus hơ cau gơnoar ơn phan duh khoai dô nơm phan ơn tơwài bơta tồi glài gơtup tìs la dô nơm belàt dam bơh di mpồl belàt khai dê, ò tềl sồt mơ kas màng di pal. Jat bơta neh lơh nền gen cau gơnoar ơn phan duh khoai rơp lơh gơs bơta tơwài glài khai in bơh bơta tìs mơ khai neh gơtup tìs, mơ khai rơp geh toh glài.

¹⁹Hơ̆ la phan ơn tơwài glài gơtup tìs, khai neh tìs glài bơh bơta tìs tòmdră mơ Yàng Jehôwa.”